କୋଲକାତା,୬।୧୦: ତୃଣମୂଳ କଂଗ୍ରେସର ସାଧାରଣ ସମ୍ପାଦକ ଅଭିଷେକ ବାନାର୍ଜୀ କେନ୍ଦ୍ର ଦ୍ୱାରା ପଶ୍ଚିମବଙ୍ଗର ମନରେଗା ପାଣ୍ଠି ବନ୍ଦ କରି ଦିଆଯାଇଥିବା ଅଭିଯୋଗରେ କୋଲକାତାର ରାଜଭବନ ନିକଟରେ ଧାରଣାରେ ବସିଛନ୍ତି। ଦିଲ୍ଲୀର ଜନ୍ତର ମନ୍ତରରେ ଦୁଇ ଦିନ ଧରି କେନ୍ଦ୍ର ବିରୋଧରେ ବିରୋଧ କରିବା ପରେ ଏବେ ସେ ରାଜ ଭବନ ନିକଟରେ ଧାରଣାରେ ବସିଛନ୍ତି।
ଅଭିଷେକ କହିଛନ୍ତି ଯେ, ରାଜ୍ୟପାଳ ସି.ଭି ଆନନ୍ଦ ବୋଷ ମନରେଗା ସମ୍ବନ୍ଧୀୟ ଦୁଇଟି ପ୍ରଶ୍ନର ଉତ୍ତର ନ ଦେବା ପର୍ଯ୍ୟନ୍ତ ସେ ଏଠାରେ ରହିବେ। ତାଙ୍କ ସହ ଦଳର ନେତାମାନେ ମଧ୍ୟ ବହୁ ସଂଖ୍ୟାରେ ବିରୋଧ ମଞ୍ଚରେ ଉପସ୍ଥିତ ଅଛନ୍ତି।
ଏହାପୂର୍ବରୁ ଗୁରୁବାର ତୃଣମୂଳ କଂଗ୍ରେସ ମଧ୍ୟ ରବୀନ୍ଦ୍ର ସଦନରୁ କୋଲକାତାର ରାଜ ଭବନ ପର୍ଯ୍ୟନ୍ତ ଏକ ବିଶାଳ ସମାବେଶ କରିଥିଲା। ଏହାର ନେତୃତ୍ୱ ନେଇଥିଲେ ଡାଇମଣ୍ଡ ହାର୍ବର ଏମ୍ପି ଅଭିଷେକ ବାନାର୍ଜୀ। ତାଙ୍କ ସହ କୋଲକାତାର ମେୟର, ମମତା କ୍ୟାବିନେଟରେ ମନ୍ତ୍ରୀ ଫିରହାଦ ହାକିମ ଏବଂ ଅନ୍ୟ ନେତାମାନେ ମଧ୍ୟ ଉପସ୍ଥିତ ଥିଲେ।