ଭୁବନେଶ୍ୱର,୨୯ା୭(ବ୍ୟୁରୋ): ଭଉଣୀ ଓ ଭାଇଙ୍କ ପବିତ୍ର ସମ୍ପର୍କକୁ ସୁଦୃଢ କରିବାକୁ ପ୍ରତିବର୍ଷ ପାଳନ କରାଯାଇଥାଏ ରାଖୀ ପୂର୍ଣ୍ଣିମା। ଭଉଣୀ ହାତରୁ ଭାଇ ରାଖୀ ପିନ୍ଧି ତା’ର ସୁରକ୍ଷା ଓ ଦୁଃଖସୁଖରେ ସାଥିରେ ଛିଡ଼ାହେବାକୁ ପ୍ରତିଜ୍ଞାବଦ୍ଧ ହୋଇଥାଏ। ଏହି ପର୍ବକୁ ପ୍ରତିବର୍ଷ ଧୁମ୍ଧାମରେ ପାଳନ କରାଯାଉଥିବାବେଳେ ଚଳିତବର୍ଷ କିନ୍ତୁ କରୋନା ଦାଉ ସାଧିଛି। କୋଭିଡ୍-୧୯ ଲକ୍ଡାଉନ୍ ଯୋଗୁ ଦୂରରେ ରହିଥିବା ଭଉଣୀ ରାଖୀ ବାନ୍ଧିବାକୁ ନା ଭାଇ ପାଖକୁ ଯାଇପାରିବ ନା ଭଉଣୀ ପାଖକୁ ଭାଇ ଆସିପାରିବ। ସେହିଭଳି କୋଭିଡ୍ କଟକଣା ଯୋଗୁ ଏଥର ରାଖୀ ଦୋକାନ ମଧ୍ୟ ଖୋଲିନାହିଁ। ତେଣୁ ରାଖୀ କିଣି ପୋଷ୍ଟାଲରେ ପଠାଇବା ଅସମ୍ଭବ। ଏଭଳିସ୍ଥଳେ ଏକମାତ୍ର ସାହାରା ପାଲଟିଛି ଅନ୍ଲାଇନ୍ରେ ରାଖୀ। ବିଭିନ୍ନ ଇ-କମର୍ସ ସାଇଟ୍ ସହ ଇ-ଗିଫ୍ଟିଂ ସାଇଟ୍ରେ ଏବେ ରାଖୀ ପଠାଇବା ଏକମାତ୍ର ଅପ୍ଶନ୍ ଭାବେ ଉଭାହୋଇଛି। ଆଉ ଏହାର ସୁଯୋଗ ନେଇ ‘ଓ୍ବି ଫର୍ ୟୁ’ ଏକ ଅଭିିନବ ପ୍ରୟାସ ଆରମ୍ଭ କରିଛି। ଦିବ୍ୟାଙ୍ଗ ତଥା ଅଟିଷ୍ଟିକ୍ ରୋଗରେ ପୀଡ଼ିତ କିଶୋରମାନଙ୍କୁ ଆତ୍ମନିର୍ଭରଶୀଳ କରିବା ଓ ସେମାନଙ୍କ ସମୟର ସଦୁପଯୋଗ ଉଦ୍ଦେଶ୍ୟରେ ସଂସ୍ଥା ପକ୍ଷରୁ ଏକ ନୂଆ କାର୍ଯ୍ୟକ୍ରମ ହାତକୁ ନିଆଯାଇଛି। ଏହି ପିଲାମାନଙ୍କ ଦ୍ୱାରା ପ୍ରସ୍ତୁତ ରାଖୀକୁ ଅନ୍ଲାଇନ୍ରେ ବିକ୍ରି ପାଇଁ ଉପଲବ୍ଧ କରାଯାଇଛି। ଫଳରେ ଲକ୍ଡାଉନରେ ଲୋକେ ଘରେ ରହି ନିଜ ମନପସନ୍ଦର ରାଖୀ ଅର୍ଡର କରିପାରିବେ କିମ୍ବା ନିଜ ପ୍ରିୟଜନଙ୍କୁ ପଠାଇପାରିବେ। ଏହାଦ୍ୱାରା କେବଳ ସେମାନେ ନିଜ ପସନ୍ଦର ରାଖୀ କିଣିବେନି, ବରଂ ଆଉଜଣଙ୍କ ମୁହଁରେ ହସ ଫୁଟାଇପାରିବେ ବୋଲି ସଂସ୍ଥା ପକ୍ଷରୁ କୁହାଯାଇଛି।
ଅଟିଷ୍ଟିକ୍ରେ ପୀଡ଼ିତ ଭୁବନେଶ୍ୱରର ୩ଜଣ କିଶୋରଙ୍କୁ ନେଇ ପ୍ରାଥମିକ ପର୍ଯ୍ୟାୟରେ ‘ଓ୍ବି ଫର୍ ୟୁ’ ପକ୍ଷରୁ ‘ଦ ଆବିଲିଟି ବଜାର’ ନାମରେ ଏହି ପ୍ରୟାସ କରାଯାଇଛି। ଆଗାମୀଦିନରେ ଅଧିକରୁ ଅଧିକ ଦିବ୍ୟାଙ୍ଗ ପିଲାଙ୍କୁ ଏଥିରେ ଅନ୍ତର୍ଭୁକ୍ତ କରାଯିବାର ଯୋଜନା ରହିଛି। ତେବେ ହାତ ତିଆରି ଏହି ରାଖୀଗୁଡ଼ିକର ଦାମ୍ ଅପେକ୍ଷାକୃତ କମ୍ ରହୁଛି। ୧୫ ଟଙ୍କାରୁ ଆରମ୍ଭ କରି ୬୦ ଟଙ୍କା ମଧ୍ୟରେ ଦାମ୍ ରହୁଛି। ଫଳରେ ସବୁ ବର୍ଗର ଲୋକଙ୍କ ପକେଟ୍କୁ ଏହା ସୁହାଉଛି। ଭୁବନେଶ୍ୱର ମଧ୍ୟରେ ଫ୍ରି ହୋମ୍ ଡେଲିଭରି ବ୍ୟବସ୍ଥା ଥିବାବେଳେ ଭୁବନେଶ୍ୱର ବାହାରକୁ ପଠାଇବାକୁ ହେଲେ କେବଳ ପୋଷ୍ଟାଲ୍ ଚାର୍ଜ ଅଧିକ ଦେବାକୁ ପଡ଼ୁଛି। ତେବେ କେବଳ ଭୁବନେଶ୍ୱର କି ଓଡ଼ିଶା ନୁହେଁ, ବାଙ୍ଗାଲୋର, ଦିଲ୍ଲୀ, ଚେନ୍ନାଇ ଭଳି ସହରରୁ ମଧ୍ୟ ବହୁ ଅର୍ଡର ଆସୁଛି। ‘ଓ୍ବି ଫର୍ ୟୁ’ର ସ୍ବେଚ୍ଛାସେବୀମାନେ କୋଭିଡ୍ ମହାମାରୀ ସମୟରେ ମଧ୍ୟ ଜୀବନକୁ ଖାତିର ନ କରି ଘର ଘର ବୁଲି ରାଖୀର ହୋମ୍ ଡେଲିଭରି କରୁଛନ୍ତି। ତେବେ ପ୍ରଥମରୁ ଏତେଟା ଅର୍ଡର ଆସୁ ନ ଥିବା ବେଳେ ଏବେ କିନ୍ତୁ ଡିମାଣ୍ଡ ବଢିଛି। ଏବେ ଦିନକୁ ପ୍ରାୟ ୫୦ରୁ ଅଧିକ ଅର୍ଡର ଆସୁଛି। ବର୍ତ୍ତମାନ କେବଳ ହ୍ବାଟ୍ସଆପ୍ ମାଧ୍ୟମରେ ଅର୍ଡର ରଖାଯାଉଛି। ଖୁବ୍ଶୀଘ୍ର ଏକ ସ୍ବତନ୍ତ୍ର ଓ୍ବେବ୍ସାଇଟ୍ ଲଞ୍ଚ୍ ହେବ। ଏହି ଓ୍ବେବ୍ସାଇଟର ନାମ ‘ଦ ଆବିଲିଟି ବଜାର’ ରହିବ। ଜୁଲାଇ ପ୍ରଥମ ସପ୍ତାହରୁ ‘ଓ୍ବି ଫର୍ ୟୁ’ ଏହି ପ୍ରୋଜେକ୍ଟ ପାଇଁ କାମ ଆରମ୍ଭ କରିଥିବାବେଳେ ଆଗାମୀ ଦିନରେ ଏହି ପିଲାମାନଙ୍କୁ ସମ୍ମାନର ସହ ବଞ୍ଚତ୍ବାରେ ଏହା ସାହାଯ୍ୟ କରିବ ବୋଲି ସଂସ୍ଥା ପକ୍ଷରୁ କୁହାଯାଇଛି।