ଭୁବନେଶ୍ୱର, ୨୧।୫(ବ୍ୟୁରୋ): ଇନ୍ଫୋସିଟି ଥାନା ଅନ୍ତର୍ଗତ ଶିଖରଚଣ୍ଡୀ ପାହାଡ଼ ଉପରେ ଇଞ୍ଜିନିୟର ଅବିନାଶ ପ୍ରଧାନ ଜଳିଯିବା ଘଟଣାକୁ ନେଇ ରହସ୍ୟ ଲାଗିରହିଛି। ପୋଲିସ ଏକ ହତ୍ୟା ମାମଲା ରୁଜୁ କରି ତଦନ୍ତ କରୁଥିବାବେଳେ ସେ ଆତ୍ମହତ୍ୟା କରିଛନ୍ତି ନା ତାଙ୍କୁ କେହି ହତ୍ୟା କରିଛନ୍ତି ସେନେଇ ଚର୍ଚ୍ଚା ଜାରି ରହିଛି। ମୃତ୍ୟୁର ପ୍ରକୃତ କାରଣ ଜାଣିବାକୁ ପୋଲିସ ବ୍ୟବଚ୍ଛେଦ ରିପୋର୍ଟକୁ ଅପେକ୍ଷା କରିଛି। ଅପରପକ୍ଷରେ ପୋଲିସ ଘଟଣାର ବିଭିନ୍ନ ଦିଗକୁ ନେଇ ଅନୁସନ୍ଧାନ ଜାରି ରଖିଛି। ଘଟଣା ପୂର୍ବରୁ ଜଣେ ଯୁବତୀଙ୍କୁ ଅବିନାଶ ବାରମ୍ବାର କଲ୍ କରିଥିଲେ ବୋଲି ମୋବାଇଲ କଲ୍ ଡିଟେଲ୍ସରୁ ଜଣାପଡ଼ିଥିଲା। ତା’ଛଡ଼ା ଅପରାହ୍ନରୁ ବୁଧବାର ରାତି ୯ଟା ପର୍ଯ୍ୟନ୍ତ ଅବିନାଶ ଆଉ କାହା ସହ କେଉଁ ବିଷୟରେ କଥା ହୋଇଥିଲେ, ତାହା ଜାଣିବାକୁ କଲ୍ ଡିଟେଲ୍ସ ରିପୋର୍ଟ(ସିଡିଆର୍) ଯାଞ୍ଚ କରୁଛି ପୋଲିସ। ଅନ୍ୟପଟେ ଶିଖରଚଣ୍ଡୀ ପାହାଡ଼ ଉପରକୁ ଯାଇଥିବା ରାସ୍ତା ଆରମ୍ଭରେ ଲାଗିଥିବା ସିସିଟିଭିର ଫୁଟେଜକୁ ପୋଲିସ ଜବତ କରି ଯାଞ୍ଚ କରୁଛି। ତେବେ ତଦନ୍ତ ଚାଲିଥିବା କହି ପୋଲିସ ତଥ୍ୟ ଦେବାକୁ ଇଚ୍ଛା ପ୍ରକାଶ କରୁ ନ ଥିଲେ ମଧ୍ୟ ବିଶ୍ୱସ୍ତ ସୂତ୍ରରୁ ମିଳିଥିବା ସୂଚନାନୁସାରେ, ବୁଧବାର ସାରେ ଅବିନାଶ ବାଇକ୍ରେ ଶିଖରଚଣ୍ଡୀ ମନ୍ଦିରକୁ ଲମ୍ବିଥିବା ରାସ୍ତାରେ ଉପରକୁ ଯାଉଥିବା ଦୃଶ୍ୟ ସିସିଟିଭି ଫୁଟେଜରେ ରହିଛି। ଏଥିସହ ରାତି ପ୍ରାୟ ୮ଟା ୪୫ରେ ପିସିଆର୍ ପୋଲିସ ଅବିନାଶଙ୍କୁ ଉଦ୍ଧାର କରି ଆଣୁଥିବା ଦେଖିବାକୁ ମିଳିଛି। ତେବେ ସନ୍ଧ୍ୟାରୁ ଏହି ସମୟ ଭିତରେ ମୋଟ ୩ଟି ବାଇକ ଯାଇଥିଲା। ୨ଟି ଫେରି ଆସିଥିବାବେଳେ ଅନ୍ୟ ବାଇକଟି ଫେରି ନ ଥିଲା। ପାହାଡ଼ ଉପରେ ରହିଯାଇଥିବା ଉକ୍ତ ବାଇକ ଅବିନାଶଙ୍କର ବୋଲି ପୋଲିସ ସନ୍ଦେହ କରୁଛି। ତେବେ ଏନେଇ ପୋଲିସ ସ୍ପଷ୍ଟ କରି ନାହିଁ କି ଆମର ଉକ୍ତ ସିସିଟିଭି ଫୁଟେଜ ହସ୍ତଗତ ହୋଇପାରି ନାହିଁ। ଅବିନାଶଙ୍କ ବାପା ହତ୍ୟା ଅଭିଯୋଗ ଆଣିଛନ୍ତି। ତେଣୁ ପ୍ରେମଜନିତ କାରଣ ପାଇଁ ଉକ୍ତ ଦୁଇ ବାଇକରେ ଥିବା କେହି ଦୁର୍ବୃତ୍ତ ଅବିନାଶଙ୍କୁ ପେଟ୍ରୋଲ ଢାଳି ଆତ୍ମହତ୍ୟାର ରୂପ ଦେଇପାରିଥାନ୍ତି ବୋଲି ଚର୍ଚ୍ଚା ହେଉଛି।
ନନ୍ଦନକାନନ ଥାନା ବାଲିପଡ଼ା ଗ୍ରାମର ସଫ୍ଟଓ୍ବେର ଇଞ୍ଜିନିୟର ଅବିନାଶ ବୁଧବାର ପଟିଆସ୍ଥିତ ତାଙ୍କ ଅଫିସକୁ ଆସି ଆଉ ଘରକୁ ଫେରି ନ ଥିଲେ। ବୁଧବାର ରାତି ପ୍ରାୟ ୯ଟାରେ ଶିଖରଚଣ୍ଡୀ ପାହାଡ଼ ଉପରେ ଅବିନାଶ ଜଳିଯାଉଥିବାବେଳେ ପିସିଆର୍ ପୋଲିସ ତାଙ୍କୁ ଉଦ୍ଧାର କରି ନିକଟସ୍ଥ ଏକ ଘରୋଇ ହସ୍ପିଟାଲରେ ଭର୍ତ୍ତି କରିଥିଲା। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ।