କଟକ ଅଫିସ,୨୧।୧୨(ବ୍ୟୁରୋ): ଗର୍ଭଧାରଣର ୨୦ ସପ୍ତାହ ପରେ ଗର୍ଭପାତ କରିବାର ନିୟମ ନାହିଁ। ହେଲେ ପୀଡ଼ିତା ନାବାଳିକାଙ୍କ ଭବିଷ୍ୟତ, ଶିକ୍ଷା, ସାମାଜିକ ସୁରକ୍ଷାକୁ ଦୃଷ୍ଟିରେ ରଖି ଓଡ଼ିଶା ହାଇକୋର୍ଟ ଏକ ଗୁରୁତ୍ୱପୂର୍ଣ୍ଣ ରାୟ ପ୍ରକାଶ କରିଛନ୍ତି। ସମ୍ବିଧାନର ଧାରା ୨୧ ଅନୁସାରେ ସନ୍ତାନସନ୍ତତି ଜନ୍ମଦେବା ଏବଂ ଗର୍ଭପାତ କରାଇବା ଜଣଙ୍କ ମୌଳିକ ଅଧିକାର ବୋଲି ବିଚାରପତି ଏସ୍. କେ. ମିଶ୍ର ଓ ସାବିତ୍ରୀ ରଥଙ୍କୁ ନେଇ ଗଠିତ ଖଣ୍ଡପୀଠ କହିଛନ୍ତି।
ପୀଡ଼ିତା ନାବାଳିକା ଜଣକ ୨୧ସପ୍ତାହ ଗର୍ଭବତୀ ଥିବା ଡାଇରେକ୍ଟର ଅଫ୍ ମେଡିକାଲ ଏଜୁକେଶନ ଆଣ୍ଡ ଟେନିଂ(ଡିଏମ୍ଇଟି) ରିପୋର୍ଟରୁ ଜଣାପଡ଼ିଥିଲା। ଅନ୍ୟପକ୍ଷେ ମେଡିକାଲ ଟର୍ମିନେଶନ ପ୍ରେଗ୍ନାନ୍ସି(ଏମ୍ଟିପି) ଆଇନ ଅନୁଯାୟୀ ୨୦ରୁ ୨୪ସପ୍ତାହ ଧରି ଗର୍ଭଧାରଣ କରିଥିଲେ, ଗର୍ଭପାତ କରିବାର ନିୟମ ନାହିଁ। ମେଡିକାଲ ଟର୍ମିନେଶନ ପ୍ରେଗ୍ନାନ୍ସି(ସଂଶୋଧନ) ବିଲ୍-୨୦୨୦ ବର୍ତ୍ତମାନ ରାଜ୍ୟ ସଭାରେ ବିଚାରାଧୀନ ରହିଛି। ଯେଉଁଥିରେ କି ସର୍ବାଧିକ ୨୪ସପ୍ତାହ ପର୍ଯ୍ୟନ୍ତ ଗର୍ଭପାତ କରିବା ପାଇଁ ବ୍ୟବସ୍ଥା ରହିଛି। ଏହା ଏଯାବତ୍ ଆଇନରେ ପରିଣତ ହୋଇ ନାହିଁ। ହେଲେ ଏହି ମାମଲାରେ ଗର୍ଭଧାରଣ କରିଥିବା ସମ୍ପୃକ୍ତ ପୀଡ଼ିତା ଜଣେ ନାବାଳିକା। ତାଙ୍କର ଭବିଷ୍ୟତ ଏବଂ ଶାରୀରିକ ଗଠନକୁ ଦୃଷ୍ଟିରେ ରଖି ଗର୍ଭପାତ ଜରୁରୀ ବୋଲି ଖଣ୍ଡପୀଠ ଅନୁଭବ କରି ଏହି ରାୟ ଦେଇଛନ୍ତି। ଶୁଣାଣିବେଳେ ପୀଡ଼ିତାଙ୍କ ଓକିଲ ଗର୍ଭପାତ ନେଇ ଅଦାଲତଙ୍କ ପୂର୍ବ କେତୋଟି ରାୟର ଅବତାରଣା କରିଥିଲେ।
