ଭୁବନେଶ୍ବର, ୭।୧୧(ତପନ ସ୍ବାଇଁ): ଏକାଧିକ କ୍ରୀଡ଼ାରେ ପାରଙ୍ଗମ ଓଡ଼ିଶାର ଅନୁପମା ସ୍ବାଇଁ କ୍ୟାରିୟରରେ ଆଉ ଏକ ସଫଳତା ଫର୍ଦ୍ଦ ଯୋଡ଼ିଛନ୍ତି। ଆବୁଧାବୀଠାରେ ଅନୁଷ୍ଠିତ ବିଶ୍ୱ ଜୁ-ଜିତସୁ ପ୍ରତିଯୋଗିତାରେ ସେ ମହିଳା ହ୍ବାଇଟ ବେଲ୍ଟ ୪୯ କିଲୋ ବର୍ଗରେ ବ୍ରୋଞ୍ଜ ପଦକ ଲାଭ କରିଛନ୍ତି। ବିଶ୍ୱର ଏହି ସମ୍ମାନଜନକ ପ୍ରତିଯୋଗିତା ପାଇଁ ଅନୁପମା ଦୁବାଇର ଆଟ୍ରିକ୍ସନ ଏକାଡେମୀରେ ନିଜକୁ ପ୍ରସ୍ତୁତ କରିଥିଲେ। ୧୬ ଜଣିଆ ବ୍ରାକେଟ୍ ଥିବା ଏହି ପ୍ରତିଯୋଗିତାର ପ୍ରଥମ ରାଉଣ୍ଡରେ ଦୁବାଇ ପ୍ରତିଯୋଗୀଙ୍କୁ ହରାଇ ଦ୍ୱିତୀୟ ରାଉଣ୍ଡରେ ପ୍ରବେଶ କରିଥିଲେ ଅନୁପମା। ମାତ୍ର ଏହି ରାଉଣ୍ଡରେ ସେ ସ୍ବର୍ଣ୍ଣ ପଦକ ବିଜୟିନୀ କାଜାକସ୍ତାନ ପ୍ରତିଯୋଗୀଠାରୁ ପଏଣ୍ଟ ବ୍ୟବଧାନରେ ପରାସ୍ତ ହେବାପରେ ରିପ୍ଚେଜ୍ ବ୍ରାକେଟକୁ ଯାଇଥିଲେ। ଏହି ପର୍ଯ୍ୟାୟର ଫାଇନାଲରେ ବ୍ରାଜିଲ ପ୍ରତିଯୋଗୀଙ୍କୁ ପରାସ୍ତ କରି ବ୍ରୋଞ୍ଜ ପଦକ ଜିତିଥିଲେ ଓଡ଼ିଶାର ଏହି ସାହସୀ ଯୁବତୀ। ଭାରତର ଜଣେ ଶ୍ରେଷ୍ଠ ସାମରିକ କ୍ରୀଡାବିତ୍ଭାବେ ପରିଚିତ ଅନୁପମା ଓଡ଼ିଶା ପୋଲିସରେ କନ୍ଷ୍ଟେବଲ ଚାକିରି ପାଇ କ୍ରୀଡ଼ା ବିଭାଗ ଅଧୀନରେ କାର୍ଯ୍ୟରତ ଅଛନ୍ତି। ୩ଟି ଏସିଆ ଜୁ-ଜିତ୍ସୁ ପ୍ରତିଯୋଗିତାରେ ପଦକ, ଏସିଆନ ଶକ୍ତିଉତ୍ତୋଳନରେ ସ୍ବର୍ଣ୍ଣ ପଦକ ଜିତିଥିବା ଅନୁପମା କରାଟେରେ ଜଣେ ଅନ୍ତର୍ଜାତୀୟ କ୍ରୀଡ଼ାବିତ୍। ଏହି ପ୍ରତିଯୋଗିତା ନିମନ୍ତେ ଓଡ଼ିଶା ସରକାରଙ୍କ କ୍ରୀଡ଼ା ବିଭାଗ ଏବଂ ବିଏନ୍ପି ଗ୍ରୁପ୍ ଅଧ୍ୟକ୍ଷ ଡ. ବିଶ୍ୱନାଥ ପଟ୍ଟନାୟକ ସମସ୍ତ ଖର୍ଚ୍ଚ ବହନ କରିଥିଲେ। ୮ ତାରିଖରେ ଫେରିବା ପରେ ତାଙ୍କୁ ସମ୍ବର୍ଦ୍ଧିତ କରାଯିବ ବୋଲି ରାଜ୍ୟ ଜୁ ଜିତ୍ସୁ ସଂଘ ପକ୍ଷରୁ ପ୍ରକାଶ କରାଯାଇଛି।
