ବ୍ରହ୍ମପୁର ଅଫିସ,୧୦ା୧୦: ଅଧିକ ଯୌତୁକ ଦାବି କରି ଜଣେ ନବବଧୂଙ୍କୁ ନିର୍ଯାତନା ଦିଆଯାଇଥିବା ନେଇ ବ୍ରହ୍ମପୁର ମହିଳା ଥାନାରେ ଅଭିଯୋଗ ହୋଇଛି। ଏନେଇ ପୋଲିସ ଏକ ମାମଲା(ନଂ.୧୮୩/୨୨) ରୁଜୁ କରି ଘଟଣାର ତଦନ୍ତ ଆରମ୍ଭ କରିଛି।
ସୂଚନାଯୋଗ୍ୟ, ଜୁଲାଇ ୩ରେ ବ୍ରହ୍ମପୁରର ସୌମ୍ୟାଶ୍ରୀ ପୃଷ୍ଟି(୨୫)ଙ୍କ ଆସ୍କା ଖମ୍ବେଶ୍ୱରୀ ପାଟଣାର ସିଏଚ୍.କୃଷ୍ଣେନ୍ଦୁ ସୁନ୍ଦର ପାତ୍ରଙ୍କ ସହ ବିବାହ ହୋଇଥିଲା। କିନ୍ତୁ ଶାଶୁଘରକୁ ଯିବାର ୨ଦିନ ପରେ ସୌମ୍ୟାଶ୍ରୀଙ୍କ ସମସ୍ତ ସୁନାଗହଣା ନେଇଥିବା ନଗଦ ଟଙ୍କା ଶାଶୁଘର ଲୋକେ ଛଡ଼େଇ ନେଇଥିଲେ। ଏପରି କି ସ୍ବାମୀଙ୍କ ସହ ୨ବର୍ଷ ପର୍ଯ୍ୟନ୍ତ ସମ୍ପର୍କ ନ ରଖିବାକୁ ଶାଶୁ ଓ ନଣନ୍ଦ ତାଗିଦ କରି ମାଡ଼ ମାରିଥିଲେ।
କୋଠମଡ଼ାଣରେ ବାପଘରକୁ ସ୍ବାମୀ ସହ ଆସିବା ବେଳେ ଏକ କାର୍ ଏବଂ ଅଢ଼େଇଲକ୍ଷ ଟଙ୍କା ଯୌତୁକ ନେଇ ଆସିବାକୁ ଶାଶୁ କହିଥିଲେ। ସ୍ବାମୀ ଫେରିଯିବା ପରେ ଏନେଇ ସେ ବାପା ମା’ଙ୍କୁ ଜଣାଇଥିଲେ। ବାପା, ମା’ ଓ ମାମୁ ଶାଶୁଘରକୁ ଯାଇ ବୁଝାଶୁଝା କରି ସୌମ୍ୟାଶ୍ରୀଙ୍କୁ ଛାଡ଼ି ଆସିଥିଲେ। କିନ୍ତୁ ପୁଣି ଥରେ ଶାଶୁଘର ଲୋକେ ତାଙ୍କୁ ନିର୍ଯାତନା ଦେଇଥିଲେ। ରାଖୀ ପୂର୍ଣ୍ଣିମା ବାହାନାରେ କୌଶଳ କ୍ରମେ ବାପଘରକୁ ଚାଲି ଆସି ଏହି ସମ୍ପର୍କରେ କହିଥିଲେ। ପରିବାର ଲୋକେ ସମାଧାନ ପାଇଁ ବାରମ୍ବାର ଚେଷ୍ଟା କରିଥିଲେ ମଧ୍ୟ କୌଣସି ସୁଫଳ ମିଳି ନ ଥିଲା। ଓଲଟା ଆସ୍କା ଡକାଇ ସ୍ବାମୀ, ତାଙ୍କ ବଡ଼ବାପା, ଶ୍ୱଶୁର ମିଶି ସୌମ୍ୟାଶ୍ରୀ, ତାଙ୍କ ବାପା ଏବଂ ମାମୁଙ୍କୁ ନିଛାଟିଆ ସ୍ଥାନକୁ ନେଇ ମାନସିକ ଓ ଶାରୀରିକ ନିର୍ଯାତନା ଦେଇଥିଲେ।
