ହିଞ୍ଜିଳିକାଟୁ, ୯।୧(ଦ୍ବିତୀକୃଷ୍ଣ ପଣ୍ଡା): ଗଞ୍ଜାମ ଜିଲା ହିଞ୍ଜିଳି ଥାନା ନନ୍ଦିକ ଗ୍ରାମ ପଞ୍ଚାୟତର ସରପଞ୍ଚ କୃଷ୍ଣଚନ୍ଦ୍ର ଭଉଳଙ୍କୁ ବୁଧବାର ରାତିରେ ଦୁର୍ବ୍ୟବହାର ସହ ଧମକ ହୋଇଥିବା ନେଇ ହିଞ୍ଜିଳି ଥାନାରେ ଅଭିଯୋଗ ହୋଇଛି। ବିଜେଡି ନେତା ତଥା ହିଞ୍ଜିଳିକାଟୁ ବ୍ଳକ ସରପଞ୍ଚ ସଂଘ ସଭାପତି ଭଉଳ ଘରେ ଥିବା ସମୟରେ ରାତି ପ୍ରାୟ ୧୦ରେ ଉକ୍ତ ଗ୍ରାମର ପପୁନ ପ୍ରଧାନ ନାମକ ଜଣେ ଯୁବକ ପୂର୍ବ ଶତୃତାକୁ କେନ୍ଦ୍ର କରି ଗାଳିଗୁଲଜ କରିଥିବା ଥାନାରେ ଅଭିଯୋଗ କରିଛନ୍ତି। ଏଥିନେଇ ହିଞ୍ଜିଳି ଥାନାରେ କେସ ନଂ – ୨୭/୨୫ରେ ଏକ ମାମଲା ରୁଜୁ ହୋଇଛି। ଅନ୍ୟପକ୍ଷରେ ଏକ ପାଲଟା ଅଭିଯୋଗ କ୍ରମେ ନନ୍ଦିକ ଗ୍ରାମର ପପୁ ପ୍ରଧାନ ସିକିରି ଗ୍ରାମରେ ଥିବା ସମୟରେ ସରପଞ୍ଚଙ୍କ ଜଣେ ସମ୍ପର୍କୀୟ ନନ୍ଦିକ ଗ୍ରାମକୁ ଡାକି ନେଇଥିଲେ। ସେଠାରେ ନନ୍ଦିକ ସରପଞ୍ଚ ଭଉଳ ପୂର୍ବ ରାଜନୈତିକ ଶତ୍ରୁତା ରଖି ଅଶ୍ଳୀଳ ଭାଷାରେ ଗାଳିଗୁଲଜ କରିବା ସହ ମାରଣାସ୍ତ୍ରରେ ଆକ୍ରମଣ କରିଥିବା ନେଇ ଥାନାରେ ପପୁ ଅଭିଯୋଗ କରିଛନ୍ତି। ପପୁଙ୍କ ଅଭିଯୋଗ କ୍ରମେ ହିଞ୍ଜିଳି ଥାନାରେ କେସ ନଂ- ୨୬/୨୫ ରେ ଏକ ମାମଲା ରୁଜୁ ହୋଇଛି । ଏ ସଂକ୍ରାନ୍ତରେ ସରପଞ୍ଚ ଭଉଳଙ୍କ ଜଣେ ସମ୍ପର୍କୀୟଙ୍କୁ ଥାନାରେ ଅଟକ ରଖି ପୋଲିସ ଘଟଣାର ତଦନ୍ତ ଚଳାଇଛି। ଏହି ଘଟଣାକୁ ନେଇ ଭାଜପା ଓ ବିଜେଡି ନେତୃମଣ୍ଡଳୀ ମଧ୍ୟରେ ଆରୋପ ପ୍ରତ୍ୟାରୋପ ଚାଲିଛି ।
