ନୟାଗଡ଼ ଅଫିସ,୨୪।୪: ନୟାଗଡ଼ ଜିଲା ମୁଖ୍ୟ ଚିକିତ୍ସାଳୟ ପରିସରରେ ପିପିପି ମୋଡ଼ରେ ଚାଲିଥିବା ସହାୟ ନିଃଶୁଳ୍କ ଡାୟାଲିସିସ୍ ସେବା ୟୁନିଟରେ ଏସି ଓ ଫ୍ୟାନ ଅଚଳ ଯୋଗୁ କିଡ୍ନୀ ରୋଗୀ ହଟହଟା ହେଉଛନ୍ତି । ପ୍ରାୟ ୧ମାସ ହେଲା ଫ୍ୟାନ ଓ ଏସି ଅଚଳ ରହିଥିଲେ ମଧ୍ୟ ମରାମତି କରାଯାଉନି ।
ଭଡ଼ାରେ ଫ୍ୟାନ ଆଣି ରୋଗୀ ସେବା ଚାଲିଛି । ତେବେ ଜିଲା ମୁଖ୍ୟ ଚିକିତ୍ସାଳୟ ପକ୍ଷରୁ ଏହାର ନିରାକରଣ କରାଯାଉନାହିଁ ।
ଡାୟାଲିସିସ୍ ସେବା ୟୁନିଟରେ ୩ଟି ଏସି ରହିଛି । ସଂକ୍ରମଣ ୟୁନିଟରେ ଗୋଟିଏ ଥିବାବେଳେ ଅନ୍ୟ ୨ଟି ଡାଏଲିସିସ୍ ସେବା ୟୁନିଟରେ ଅଛି । ଶୁକ୍ରବାର ରାତିରେ ଡାୟାଲିସିସ୍ ସେବା ୟୁନିଟର ଗୋଟିଏ ଏସି ଚୋରି ହୋଇଯାଇଥିବାବେଳେ କେବଳ ଗୋଟିଏ ଏସି କାମ କରୁଛି । ସେହିପରି ସଂକ୍ରମଣ ୟୁନିଟ୍ରେ ଗୋଟିଏ ଏସି ଅଚଳ ହୋଇ ପଡିଛି । ସେଥିପାଇଁ ଭଡ଼ାରେ ଆଣି ରୋଗୀ ପାଖରେ ଏକ ଷ୍ଟାଣ୍ଡ ଫ୍ୟାନ୍ ଲାଗିଛି । ଅନ୍ୟପକ୍ଷେ ରୋଗୀଙ୍କ ସମ୍ପର୍କୀୟ ପାଇଁ ଥିବା ଡାଏଲିସିସ୍ ସେବା ୟୁନିଟ୍ର ବାରଣ୍ଡାରେ ୨ଟି ଫ୍ୟାନ୍ ଅଚଳ ହୋଇ ରହିଛି ।
ଉଦ୍ଘାଟନ ପରେ ଆଇସିୟୁରେ ତାଲା
ଜିଲା ମୁଖ୍ୟ ଚିକିତ୍ସାଳୟରେ ସହାୟ ନିଃଶୁଳ୍କ ଡାଏଲିସିସ୍ ସେବା ୟୁନିଟ ସମ୍ମୁଖରେ ରହିଛି ଇଣ୍ଟେନସିଭ୍ କେୟାର ୟୁନିଟ୍ (ଆଇସିୟୁ)। ଗୁରୁତର ରୋଗୀଙ୍କ ଜୀବନ ବଞ୍ଚାଇବା ପାଇଁ ଆଇସିୟୁ ନିହାତି ଦରକାର । ପ୍ରାୟ ୧ବର୍ଷ ତଳେ ଏହାକୁ ଉଦ୍ଘାଟନ କରାଯାଇଥିଲା । ମାତ୍ର ୧୦ ଦିନ ଚାଲିବା ପରେ ଏଥିରେ ତାଲା ଝୁଲୁଛି । ଏହାକୁ କାର୍ଯ୍ୟକ୍ଷମ କରିବା ପାଇଁ ମେଡିସିନ୍ ସ୍ପେଶାଲିଷ୍ଟ ଶତ୍ରୁଘ୍ନ ନାୟକ,ଦୀପ୍ତିମୟୀ ବେହେରା ଏବଂ ଦୁଇ ଜଣ ନର୍ସ ତାଲିମ ପାଇଛନ୍ତି । ତେବେ ଆଇସିୟୁ ନ ଖୋଲିବାର କାରଣ ଜଣାପଡୁନି ।
ଅକ୍ସିଜେନ ପ୍ଲାଣ୍ଟ କାମରେ ଲାଗୁନି
ଜିଲା ମୁଖ୍ୟ ଚିକିତ୍ସାଳୟରେ ଅକ୍ସିଜେନ ପ୍ଲାଣ୍ଟ ରହିଛି । ହେଲେ ଅକ୍ସିଜେନ ପ୍ଲାଣ୍ଟ କାମ କରୁ ନ ଥିବା ଅଭିଯୋଗ ହୋଇଆସୁଛି । ନିଃଶୁଳ୍କ ଡାଏଲିସିସ୍ ସେବା ୟୁନିଟରେ ରୋଗୀଙ୍କୁ ଅକି୍ସଜେନ ଯୋଗାଣ ପାଇଁ ପାଇପ୍ ପଡି ସାରିଛି । ହେଲେ ଅକ୍ସିଜେନ ଆସୁନି । ଏନେଇ ଜିଲା ମୁଖ୍ୟ ଚିକିସତ୍ାଧିକାରୀ ମକରନ୍ଦ ବେଉରା କୁହନ୍ତି, ଅକ୍ସିଜେନ୍ ପ୍ଲାଣ୍ଟ କାମ କରୁଛି । ମେଡିସିନ, ଶିଶୁ ପରି ୱାର୍ଡରେ କାମରେ ଲାଗୁଛି । ନିଃଶୁକ୍ଲ ଡାୟାଲିସିସ୍ ସେବା ୟୁନିଟରେ ଏହାର ଆବଶ୍ୟକତା ନ ଥିବାରୁ କନେକଶନ୍ ଦିଆଯାଇନି । ଅନ୍ୟପକ୍ଷେ ଆଇସିୟୁ ଉଦ୍ଘାଟନ ହୋଇଛି । ଏଥିପାଇଁ ୪ଜଣ ଡାକ୍ତର, ୮ଜଣ ଷ୍ଟାଫ ନର୍ସ ଓ ଅନ୍ୟାନ୍ୟ କର୍ମଚାରୀଙ୍କ ଆବଶ୍ୟକତା ଅଛି । ଏଣୁ ଏହା କାର୍ଯ୍ୟକ୍ଷମ ହୋଇପାରୁ ନାହିଁ ।
ନୂଆ ଡାକ୍ତର ନିୟୋଜିତ ହେବା ପରେ ପଦକ୍ଷେପ ନିଆଯିବ । ସହାୟ ନିଃଶୁଳ୍କ ଡାଏଲିସିସ୍ ସେବା ୟୁନିଟରେ ଏସି ଓ ଫ୍ୟାନ୍ ଅଚଳ ହେବା ନେଇ ଜାଣିବା ପରେ ତୁରନ୍ତ ଏହାର ମରାମତି ଅଥବା ନୂଆ ଦରକାର ହେଲେ ଲଗାଇବାକୁ କୁହାଯାଇଛି । ଜିଲା ମୁଖ୍ୟ ଚିକିସତ୍ାଳୟର ବିଭିନ୍ନ ୱାର୍ଡରେ ମଧ୍ୟ ଏସି ଓ ଫ୍ୟାନ୍ ଅଚଳ ହୋଇଛି । ଏହାର ମରାମତି କାମ ଆରମ୍ଭ ହୋଇଛି । ତେବେ ଏସିକୁ ୨୪ ଘଣ୍ଟା ମଧ୍ୟରେ କିଛି ସମୟ ବନ୍ଦ କରିବାର ନିୟମ ରହିଛି । ହେଲେ ତାହା କରାଯାଉ ନ ଥିବାରୁ ଏପରି ପରିସ୍ଥିତି ସୃଷ୍ଟି ହୋଇଛି ବୋଲି ସେ କହିଛନ୍ତି । ରୋଗୀ ସବିତା ପ୍ରଧାନ, ବିମଳ ନାୟକ, ରାମଚନ୍ଦ୍ର ସାହୁ କୁହନ୍ତି, ସହାୟ ନିଃଶୁଳ୍କ ଡାଏଲିସିସ୍ ସେବା ୟୁନିଟ ସମେତ ଶିଶୁ ୱାର୍ଡ ଓ ଗାଇନିକ୍ ୱାର୍ଡରେ ଏସି କାମ କରୁନି । ରୋଗୀ ହଟହଟା ହେଉଛନ୍ତି । ଏଥିପ୍ରତି ସ୍ବାସ୍ଥ୍ୟ ବିଭାଗ ଦୃଷ୍ଟି ଦେବା ଦରକାର । ଅନ୍ୟପକ୍ଷେ ଆଇସିୟୁ ଓ ଅକ୍ସିଜେନ ପ୍ଲାଣ୍ଟ କିପରି ଶୀଘ୍ର କାର୍ଯ୍ୟକ୍ଷମ ହେବ ସେନେଇ ସିଡିଏମ୍ଓ ଓ ଜିଲାପାଳ ପଦକ୍ଷେପ ନେବା ଜରୁରୀ ବୋଲିି କହିଛନ୍ତି ।