ନୂଆଦିଲ୍ଲୀ, ୨୨।୨ : ଲାଞ୍ଚ ମାମଲାରେ ଅଭିଯୁକ୍ତଙ୍କୁ ଦୋଷୀ ସାବ୍ୟସ୍ତ କରିବା ଲାଗି ଦୁର୍ନୀତି ନିବାରଣ ଅଧିନିୟମ (ପିସି ଆକ୍ଟ)ର ଧାରା ୧୩ ଏବଂ ପଠିତ ଧାରା ୭ ଅନ୍ତର୍ଗତ ମାଗିବା ପ୍ରମାଣ ସହିତ ସ୍ବୀକୃତି ଅନିବାର୍ଯ୍ୟ। କେବଳ ଅର୍ଥ ରାଶିର ସ୍ବୀକୃତି ଅଭିଯୁକ୍ତଙ୍କୁ ଦୋଷୀ ସାବ୍ୟସ୍ତ କରାଯାଇ ପାରିବ ନାହିଁ ବୋଲି ସୁପ୍ରିମ୍କୋର୍ଟ ରାୟ ଦେଇଛନ୍ତି।
ଏକ୍ଷେତ୍ରରେ ଲୋକ ସେବକ ଲାଞ୍ଚ ମାଗିବାର ପ୍ରମାଣ ସହିତ ସ୍ବୀକୃତିକୁ ବିଚାର ପରିସରଭୁକ୍ତ କରାଯାଇଥାଏ।
ଏହି ମାମଲାରେ ବାଣିଜି୍ୟକ କର ଅଧିକାରୀ ପଦବୀରେ କାର୍ଯ୍ୟରତ ଅଧିକାରୀଙ୍କୁ ପିସି ଆକ୍ଟର ଧାରା ୧୩-୨ ସହିତ ପଠିତ ଧାରା ୭ ଏବଂ ୧୩-୧-ଡି ଅନ୍ତର୍ଗତ ଦୋଷୀ ସାବ୍ୟସ୍ତ କରାଯାଇଥିଲା।
୨୦୦୦ ଫେବୃୟାରୀ ୨୪ରେ ସେ ମୂଲ୍ୟାଙ୍କନ ଅଦେଶ ଜାରି କରିବା ଲାଗି ୩,୦୦୦ଟଙ୍କା ଲାଞ୍ଚ ମାଗିଥିବା ଅଭିଯୋଗ ହୋଇଥିଲା।
ସମ୍ପୃକ୍ତ ଅଧିକାରୀ ଏନେଇ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ। ହାଇକୋର୍ଟ ଦଣ୍ଡାଦେଶ କାଏମ୍ ରଖିଥିଲେ। ପରେ ସେ ସୁପ୍ରିମ୍କୋର୍ଟରେ ରିଟ୍ ପିଟିଶନ୍ ଦାଖଲ କରିଥିଲେ।
ଶୀର୍ଷକୋର୍ଟରେ ବିଚାରପତି ଅଜୟ ରସ୍ତୋଗି ଏବଂ ଅଭୟ ଏସ୍. ଇକ୍ଙ୍କ ନେତୃତ୍ୱରେ ଗଠିତ ଖଣ୍ଡପୀଠ ଏହାର ବିଚାର କରି କହିଥିଲେ ଯେ, ଲାଞ୍ଚ ମାଗିବା ଏବଂ ଏହାର ସ୍ବୀକୃତିର କେବଳ ସାକ୍ଷୀ ଅଛନ୍ତି। ମାତ୍ର ଏସମ୍ପର୍କିତ କୌଣସି ଉପଯୁକ୍ତ ପ୍ରମାଣ ନାହିଁ। ତେଣୁ ଏହା ଜଣେ ଅଭିଯୁକ୍ତଙ୍କୁ ଦୋଷୀ ସାବ୍ୟସ୍ତ କରିବା ଲାଗି ପ୍ରର୍ଯ୍ୟାପ୍ତ ନୁହେଁ।