ଦିଗପହଣ୍ଡି,୨୨।୫(ଡି.ଏନ୍.ଏ.): ଗଞ୍ଜାମ ଜିଲା ଦିପଗହଣ୍ଡି-ଆସିକା ରାସ୍ତାର କବିରାଜ ବନ୍ଧ ନିକଟରେ ଏକ ମର୍ମନ୍ତୁଦ ଦୁର୍ଘଟଣା ଘଟିଛି। ଦୁର୍ଘଟଣାରେ ଜଣେ ମହିଳାଙ୍କ ମୃତ୍ୟୁ ଘଟିଥିବା ବେଳେ ୨ଜଣ ଗୁରୁତର ଆହତ ହୋଇଛନ୍ତି। ଘଟଣାସ୍ଥଳରୁ ଆହତଙ୍କୁ ଉଦ୍ଧାର କରି ଦିଗପହଣ୍ଡି ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ଭର୍ତ୍ତି କରାଯାଇଥିଲା। ସେଠାରେ ମହିଳାଙ୍କୁ ଡାକ୍ତର ମୃତ ଘୋଷଣା କରିଥିବା ବେଳେ ଗୁରୁତର ଦୁହିଁଙ୍କୁ ବ୍ରହ୍ମପୁର ବଡ଼ ମେଡିକାଲ୍କୁ ସ୍ଥାନାନ୍ତର କରାଯାଇଛି। ଖବର ପାଇ ଦିଗପହଣ୍ଡି ପୋଲିସ ସ୍ବାସ୍ଥ୍ୟକେନ୍ଦ୍ରରେ ପହଞ୍ଚି ମହିଳାଙ୍କ ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇଛି। ଏନେଇ ପୋଲିସ୍ ଏକ ଦୁର୍ଘଟଣା ମାମଲା ଋୁଜୁ କରି ଘଟଣାର ତଦନ୍ତ ଆରମ୍ଭ କରିବା ସହ ଦୁର୍ଘଟଣା ଗ୍ରସ୍ତ ଟ୍ରାକ୍ଟର୍ ଓ ଅଟୋକୁ ଜବତ କରାଯାଇଥିବା ଥାନା ଆଇଆଇସି ଦୀପ୍ତି ରଞ୍ଜନ ବେହେରା ସୂଚନା ଦେଇଛନ୍ତି।
ମୃତ ମହିଳା ଜଣକ ହେଲେ ପଦ୍ମନାଭପୁର ଗ୍ରାମର ପଞ୍ଚପାତ୍ରଙ୍କ ସ୍ତ୍ରୀ ଝୁନୁ ପାତ୍ର(୪୦) ଏବଂ ଗୁରୁତରଙ୍କ ମଧ୍ୟରେ ପୁତୁରା ନିଳାଞ୍ଚଳ ପାତ୍ର ଓ ଅଟୋଚାଳକ ଶିବାନନ୍ଦ ପାଣିଗ୍ରାହୀ ବୋଲି ଜଣାପଡିଛି। ମାଉସୀ ଓ ପୁତୁରା ଦୁହେଁ ଏକ ଅଟୋ ଯୋଗେ ପୁରୁଷୋତ୍ତମପୁରକୁ ଯାଇଥିଲେ। କାମ ସାରି ଗାଁକୁ ଫେରୁଥିବା ବେଳେ କବିରାଜ ବନ୍ଧ ନିକଟରେ ବିପରିତ ଦିଗରୁ ଆସୁଥିବା ଏକ ଟ୍ରାକ୍ଟରର ଆଗଚକା ଫାଟିଯିବା ଫଳରେ ଚାଳକ ଭାରସାମ୍ୟ ହରାଇ ଅଟୋ ସହ ମୁହାଁମୁହିଁ ଧକ୍କା ହୋଇଥିଲା।