ରାଉରକେଲା ଅଫିସ,୯।୬: ସ୍ମାର୍ଟସିଟି ରାଉରକେଲାର ପ୍ରମୁଖ ସ୍ଥାନମାନଙ୍କରେ ଆର୍ଏମ୍ସିର ଅନୁମୋଦନ କ୍ରମେ ବିଭିନ୍ନ ନାମୀଦାମୀ କମ୍ପାନୀର ବିଜ୍ଞାପନ ହୋର୍ଡିଂ ଲାଗିଛି। ଏହି ହୋର୍ଡିଂଗୁଡିକ ବିଭିନ୍ନ ସମୟରେ ବର୍ଷା ପବନରେ ଫାଟିଯାଇ ପତାକା ଭଳି ଉଡୁଛି। ପବନ ହେଲେ ଏହି ଚିରାଫଟା ହୋର୍ଡିଂ ଯାନବାହନ ସମ୍ମୁଖରେ ପଡିବା ଦ୍ୱାରା ଦୁର୍ଘଟଣା ଘଟୁଛି। ସେହିପରି ଏହା ସ୍ମାର୍ଟସିଟିର ସୌନ୍ଦର୍ଯ୍ୟ ବୃଦ୍ଧିରେ ମଧ୍ୟ ପ୍ରତିବନ୍ଧକ ସାଜୁଛି ।
ଆର୍ଏମ୍ସିର ଅନୁମୋଦନ କ୍ରମେ ବିଭିନ୍ନ ସଂସ୍ଥା ତରଫରୁ ସହରର ସିଭିଲ ଟାଉନଶିପ୍, ଉଦିତନଗର, ପାନପୋଷ ଆଦି ଅଞ୍ଚଳ ରାସ୍ତାକଡ଼ରେ ନାମୀଦାମୀ କମ୍ପାନୀର ବିଜ୍ଞାପନ ଭିତ୍ତିକ ହୋର୍ଡିଂ ଲଗାଯାଇଛି। ଏଥିପାଇଁ ସଂସ୍ଥାଗୁଡିକ କମ୍ପାନୀମାନଙ୍କ ପାଖରୁ ନିର୍ଦ୍ଧାରିତ ରାଶି ନେବା ସହ କମିଶନ ଅର୍ଥ ଆର୍ଏମ୍ସିକୁ ପ୍ରଦାନ କରାଯାଉଛି। ତେବେ ଏହି ହୋର୍ଡିଂଗୁଡିକ ବିଭିନ୍ନ ସମୟରେ ଫାଡି ହୋଇ ପତାକା ସଦୃଶ ଝୁଲୁଛି। ଏହାକୁ ବଦଳାଯାଉ ନ ଥିବାରୁ ଉକ୍ତ ଚିରା ହୋର୍ଡିଂ ସ୍ମାର୍ଟସିଟି ସୌନ୍ଦର୍ଯ୍ୟ ବୃଦ୍ଧିରେ ପ୍ରତିବନ୍ଧକ ସାଜୁଛି। ସେହିପରି ବର୍ଷା ପବନ ହେଲେ ଉଡ଼ିଆସି ରାସ୍ତାରେ ଯାଉଥିବା ଯାନବାହନର ସମ୍ମୁଖ ଭାଗ ଗ୍ଲାସକୁ ଢାଙ୍କିଦେଉଛି। ଫଳରେ ଝଡପବନ ସମୟରେ ଯାନବାହନ ଦୁର୍ଘଟଣାର ସମ୍ମୁଖୀନ ହେଉଛନ୍ତି। ଏ ସମ୍ପର୍କରେ ଆର୍ଏମ୍ସିର ଉପ ପୌରଆୟୁକ୍ତ ଗୌରବ ପଧାନଙ୍କୁ ପଚାରିବାରୁ ତୁରନ୍ତ ଏ ନେଇ ସମ୍ପୃକ୍ତ ଠିକା ସଂସ୍ଥାଙ୍କୁ ଅବଗତ କରାଯିବା ସହ ଚିରାଫଟା ହୋର୍ଡିଂ ହଟାଯିବ ବୋଲି ସେ କହିଥିଲେ।