ପୁରୁଷୋତ୍ତମପୁର,୨୦।୧୧(ଡି.ଏନ୍.ଏ.): ଗଞ୍ଜାମ ଜିଲା ପୁରୁଷୋତ୍ତମପୁର ଥାନା ଅନ୍ତର୍ଗତ ବ୍ରହ୍ମପୁର-ପୁରୁଷୋତ୍ତମପୁର ମୂଖ୍ୟ ରାସ୍ତାର ଭାଟକୁମରଡା କଲେଜ ସମ୍ମୁଖରେ ରବିବାର ଏକ କାର ମୋଟର ସାଇକେଲ ଆରୋହୀଙ୍କ ଉପରେ ଚଢିଯିବା ସହ ବିଦ୍ୟୁତ ଟ୍ରାନ୍ସଫର୍ମରକୁ ପିଟି ହୋଇଯାଇଛି। ଏଥିରେ ବାଇକ୍ ଆରୋହୀ ଦମ୍ପତି ଭାଟକୁମରଡା ଗ୍ରାମର ତୋଫାନ ପଲେଇ (୨୭) ଓ ତାଙ୍କ ପତ୍ନୀ ପ୍ରମିଳା ପଲେଇ( ୨୨) ଆହତ ହୋଇଛନ୍ତି। ତୋଫାନଙ୍କ ଅବସ୍ଥା ଗୁରୁତର ରହିଛି। ଉଭୟଙ୍କୁ ଚିକିତ୍ସା ନିମନ୍ତେ ବ୍ରହ୍ମପୁର ବଡ ମେଡିକାଲକୁ ପଠାଇ ଦିଆଯାଇଛି। ପୋଲିସ ଘଟଣାସ୍ଥଳରେ ପହଞ୍ଚି ଉଭୟ ଗାଡିଟିକୁ ଜବତ କରିବା ସହ କାର ଡ୍ରାଇଭରଙ୍କୁ ଅଟକ ରଖି ତଦନ୍ତ ଚଲାଇଛନ୍ତି।
ସୂଚନାନୁଯାୟୀ, ଦମ୍ପତି ମୋଟର ସାଇକେଲ ଯୋଗେ ବ୍ରହ୍ମପୁରରୁ ନିଜ ଗ୍ରାମକୁ ଫେରୁଥିବାବେଳେ ଆନ୍ଧ୍ରପ୍ରଦେଶ ପାଦପାଟଣାମର କିଛି ଆଇଆପା ଭକ୍ତ ତାରାତାରିଣୀଠାରୁ ଦର୍ଶନ ସାରି କାର ଯୋଗେ ଅତି ଦ୍ରୁତ ଗତିରେ ଯିବାବେଳେ ଭାରସାମ୍ୟ ହରାଇ ମୋଟର ସାଇକେଲ ଆରୋହୀଙ୍କ ଉପରେ ଚଢାଇ ଟ୍ରାନ୍ସଫର୍ମରକୁ ପିଟି ହୋଇଥିଲେ।