ବାରିପଦା ଅଫିସ/ବାଙ୍ଗିରିପୋଷି,୧୭ା୯(ଡି.ଏନ.ଏ)- ମୟୂରଭଞ୍ଜ ଜିଲା ବାଙ୍ଗରିପୋଷି ଦେଇ ଯାଇଥିବା ୪୯ନଂ. ଜାତୀୟ ରାଜପଥର ଦ୍ୱାରଶୁଣି ଘାଟିରେ ବୁଧବାର ସକାଳେ ଏକ ମର୍ମନ୍ତୁଦ ସଡ଼କ ଦୁର୍ଘଟଣା ଘଟିଛି ା ମଧ୍ୟାହ୍ନଭୋଜନ ଚାଉଳ ଆଣିବାକୁ ଯାଉଥିବା ଅଟୋକୁ ପଛପଟୁ ଏକ ଟ୍ରକ ଧକ୍କା ଦେବାରୁ ୩ ଜଣଙ୍କର ମୃତ୍ୟୁ ଘଟିଥିବା ବେଳେ ୯ଜଣ ଗୁରୁତର ଆହତ ହୋଇଛନ୍ତି। ମୃତକଙ୍କ ମଧ୍ୟରେ ଜଣେ ସ୍କୁଲ ଛାତ୍ର ଓ ଅନ୍ୟ ୨ ଜଣ ଅଭିଭାବକ ଥିବା ସୂଚନା ମିଳିଛି। ଆହତମାନଙ୍କୁ ଚିକିତ୍ସା ପାଇଁ ବାରିପଦାସ୍ଥିତ ପିଆର୍ଏମ୍ ମେଡିକାଲରେ ଭର୍ତ୍ତି କରାଯାଇଛି। ଏ ସଂକ୍ରାନ୍ତରେ ବାଙ୍ଗରିପୋଷି ପୋଲିସ ଏକ ମାମଲା(ନଂ.୧୩୪/୨୦) ରୁଜୁ କରି ତଦନ୍ତ ଜାରି ରଖିଛି। ମୃତକମାନେ ହେଲେ ବିଶୋଇ ଥାନା ଅଧୀନ ଦୁପଟା ଗ୍ରାମର ମାନସ ମାରାଣ୍ଡି (୪୦), ଫାଗୁ ହେମ୍ବ୍ରମ(୧୪) ଓ ମାନ ମାରାଣ୍ଡି(୪୫) ା
ସୂଚନା ଅନୁଯାୟୀ, ମଧ୍ୟାହ୍ନଭୋଜନ ଚାଉଳ ଆଣିବାକୁ ବିଶୋଇ ଥାନା ଅନ୍ତର୍ଗତ ଦୁପଟା ଗ୍ରାମରୁ ଶୁଳିଆପଦା ନିକଟସ୍ଥ ବଣକାଟୀରେ ଥିବା ଆଶ୍ରମ ସ୍କୁଲ ଅଭିମୁଖେ ଏକ ଅଟୋ(ଓଡି୧୧କ୍ୟୁ-୩୧୬୫)ରେ ଚାଳକ ସମେତ ୧୨ ଜଣ ଯାଉଥିଲେ। ସେମାନଙ୍କ ମଧ୍ୟରେ ୪ ମହିଳା, ୩ ପୁରୁଷ ଓ ୫ ଜଣ ପିଲା ଥିଲେ। ଅଟୋଟି ଘାଟିରୁ ତଳକୁ ଓହ୍ଲାଉଥିବା ବେଳେ ଦ୍ରୁତ ଗତିରେ ଆସୁଥିବା ଏକ ମାଲ୍ ବୋଝେଇ ଟ୍ରକ୍ (ଡବ୍ଲୁବି୨୩ଇ-୦୭୩୫) ପଛପଟୁ ଧକ୍କା ଦେବା ସହ ଅଟୋକୁ ଘୋଷାଡ଼ି ନେଇ ରାସ୍ତା ପାର୍ଶ୍ୱରେ ଓଲଟି ପଡ଼ିଥିଲା। ଫଳରେ ଘଟଣାସ୍ଥଳରେ ଅଭିଭାବକ ମାନସ ମାରାଣ୍ଡି ଓ ଛାତ୍ର ଫାଗୁ ହେମ୍ବ୍ରମଙ୍କ ମୃତ୍ୟୁ ଘଟିଥିଲା। ଖବରପାଇ ଦମକଳବାହିନୀ ଘଟଣାସ୍ଥଳରେ ପହଞ୍ଚି ଆହତମାନଙ୍କୁ ପ୍ରଥମେ ବାଙ୍ଗରିପୋଷି ଡାକ୍ତରଖାନା ଓ ପରେ ବାରିପଦା ପିଆର୍ଏମ୍ ମେଡିକାଲରେ ଭର୍ତ୍ତି କରିଥିଲେ। ସେଠାରେ ଚିକିତ୍ସାଧିନ ଅବସ୍ଥାରେ ମାନ ମାରାଣ୍ଡିଙ୍କ ମୃତ୍ୟୁ ଘଟିଥିଲା। ଆହତମାନେ ହେଲେ ଯମୁନା ହେମ୍ବ୍ରମ (୩୫), ଚମ୍ପା ହାଁସଦାଃ (୪୦), ସିଙ୍ଗରାୟ ସୋରେନ (୩୫), ସିଧ ହାଁସଦାଃ (୯), ସୁନ୍ଦର ମାର୍ଣ୍ଡୀ (୮), ଲକ୍ଷ୍ମୀ ମାର୍ଣ୍ଡୀ (୧୮), ବାଘରାୟ ମାର୍ଣ୍ଡୀ (୨୦), ଫାଗୁ ଟୁଡୁ (୧୧) ଓ ସୁନାରାମ ସୋରେନ (୧୦) ା ଦୁର୍ଘଟଣାଗ୍ରସ୍ତ ଅଟୋ ଓ ଟ୍ରକ୍କୁ ଜବତ କରାଯାଇଥିବା ବାଙ୍ଗିରିପୋଷି ଥାନା ଅଧିକାରୀ ଦୟାନିଧି ଦାସ କହିଛନ୍ତି।
