ଓ୍ବାଶିଂଟନ,୩ା୧୧: ଆମେରିକା ରାଷ୍ଟ୍ରପତି ନିର୍ବାଚନ ମଙ୍ଗଳବାର ଅନୁଷ୍ଠିତ ହେବାକୁ ଯାଉଥିବାବେଳେ ପ୍ରଚାର ଜୋର୍ଦାର ହୋଇଛି। ରିପବ୍ଲିକାନ ପ୍ରାର୍ଥୀ ତଥା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ ପ୍ରଚାର ଶେଷ ଦିନରେ ମିଚିଗାନ, ନର୍ଥ କାରୋଲିନ୍ରେ ରାଲି କରିଥିଲେ। ସେହିପରି ଡେମୋକ୍ରାଟିକ୍ ପାର୍ଟି ପ୍ରାର୍ଥୀ ଜୋ ବାଇଡେନ୍ ପେନ୍ସିଲଭାନିଆରେ ରାଲିରେ ଯୋଗଦେବା ପରେ ପିଟସ୍ବର୍ଗରେ ତାଙ୍କର ପ୍ରଚାର ଶେଷ କରିଛନ୍ତି। ପ୍ରଚାରରେ ବାଇଡେନଙ୍କ ପଲା ଭାରି ଥିବା କୁହାଯାଉଛି।
ବେଳେ ମେଲ୍-ଇନ୍ ବାଲଟ ବ୍ୟବସ୍ଥାକୁ ବିରୋଧ କରିଆସୁଥିବା ଟ୍ରମ୍ପ୍ ପୋଷ୍ଟାଲ ଭୋଟ ଏବଂ ଅନୁପସ୍ଥିତମାନଙ୍କ ଭୋଟକୁ ଗଣନାବେଳେ ଚ୍ୟାଲେଞ୍ଜ କରିବେ ବୋଲି କହିଛନ୍ତି। ନିର୍ବାଚନ ଶେଷ ହେବାରୁ ଦୀର୍ଘ ସମୟ ପରେ ବାଲଟ ସଂଗ୍ରହ ହେବା ଏକ ଭୟଙ୍କର ଘଟଣା। ନିର୍ବାଚନ ଶେଷ ହେବା କ୍ଷଣି ଟ୍ରମ୍ପ୍ ତାଙ୍କ ଓକିଲଙ୍କ ଜରିଆରେ ଏହା ବିରୋଧରେ ଅଦାଲତଙ୍କ ଦ୍ୱାରସ୍ଥ ହେବେ।
ରଏଟର ପକ୍ଷରୁ ପ୍ରକାଶିତ ଜନମତ ସର୍ଭେ ଅନୁଯାୟୀ ଟ୍ରମ୍ପ୍ଙ୍କ ସପକ୍ଷରେ ୪୨ ପ୍ରତିଶତ ଭୋଟ ରହିଥିବାବେଳେ ଜୋ ବାଇଡେନଙ୍କ ପ୍ରତି ୫୧ ପ୍ରତିଶତଙ୍କ ସମର୍ଥନ ରହିଛି। ସେହିପରି ନ୍ୟୁୟର୍କ ଟାଇମ୍ସର ସର୍ଭେ ଅନୁଯାୟୀ ୪ ଗୁରୁତ୍ୱପୂର୍ଣ୍ଣ ରାଜ୍ୟ ଓ୍ବିସକନ୍ସିନ, ପେନ୍ସିଲଭାନିଆ, ଫ୍ଲୋରିଡା ଏବଂ ଆରିଜୋନାରେ ବାଇଡେନଙ୍କ ସପକ୍ଷରେ ଜନମତ ରହିଛି। ୨୦୦୮ ନିର୍ବାଚନଠାରୁ ଦେଖିଲେ ବାଇଡେନଙ୍କ ନିର୍ବାଚନୀ ସ୍ଥିତି ଅନ୍ୟ ଯେକୌଣସି ରାଷ୍ଟ୍ରପତି ପ୍ରାର୍ଥୀଙ୍କଠାରୁ ଦୃଢ଼ ରହିଛି।
ଟ୍ରମ୍ପ ଓ ବାଇଡେନ୍ଙ୍କ ଭାରତୀୟ-ଆମେରିକୀୟ ସମର୍ଥକମାନେ ରବିବାର ସେମାନଙ୍କ ପ୍ରଚାର ଜୋର୍ଦାର କରିଥିଲେ। ବହୁସଂଖ୍ୟାରେ ଆସି ନିଜ ନିଜ ନେତାଙ୍କୁ ଭୋଟ ଦେବା ପାଇଁ ସେମାନେ ପ୍ରବାସୀ ଭାରତୀୟମାନଙ୍କୁ ପ୍ରବର୍ତ୍ତାଇଥିଲେ। କରୋନା ସଂକ୍ରମଣରେ ଆମେରିକାରେ ୨.୩୧ ଲକ୍ଷରୁ ଊର୍ଦ୍ଧ୍ୱ ଲୋକଙ୍କ ଜୀବନ ଗଲାଣି। ଏହାକୁ ନେଇ ମୁଖ୍ୟ ସଂକ୍ରାମକ ରୋଗ ବିଶେଷଜ୍ଞ ଡ. ଆନ୍ଥୋନି ଫୌସିଙ୍କ ସହ ଟ୍ରମ୍ପ୍ଙ୍କର ମତଭେଦ ହୋଇଛି। ନିର୍ବାଚନ ପରେ ସେ ଫୌସିଙ୍କୁ ବହିଷ୍କାର କରିବେ ବୋଲି ଫ୍ଲୋରିଡ଼ାଠାରେ ଏକ ରାଲିରେ କହିଛନ୍ତି।