ଭୋପାଳ,୨୯।୩: ବିବାହ ପରେ ସ୍ତ୍ରୀ ପରପୁରୁଷଙ୍କ ସହ ଅନୈତିକ ସମ୍ପର୍କ ରଖିଥିଲେ ମଧ୍ୟ ସ୍ବାମୀଙ୍କ ଠାରୁ ଭରଣପୋଷଣ ପାଇପାରିବେ। ଏନେଇ ବଡ଼ ରାୟ ଦେଇଛନ୍ତି ମଧ୍ୟପ୍ରଦେଶ ହାଇକୋର୍ଟ। ତେବେ ଭରଣପୋଷଣ ପାଇଁ କେସ୍ ଫାଇଲ କରିବାବେଳେ ଯଦି ସେ ସେଭଳି କୌଣସି ଅନୈତିକ ସମ୍ପର୍କରେ ସାମିଲ ନ ଥିବେ, ତା’ପରେ ବି ତାଙ୍କୁ ସବୁ ପ୍ରକାରର ସୁବିଧା ମିଳିବ।
ଏହି ମାମଲାରେ କୋର୍ଟ ସ୍ତ୍ରୀଙ୍କ ଆବେଦନକୁ ବିଚାରକୁ ନେଇ ସ୍ବାମୀଙ୍କୁ ଭରଣପୋଷଣ ଖର୍ଚ୍ଚ ବହନ କରିବାକୁ ନିର୍ଦ୍ଦେଶ ଦେଇଛନ୍ତି। ଏନେଇ ବ୍ୟକ୍ତିଜଣକ ହାଇକୋର୍ଟଙ୍କ ଦ୍ୱାରସ୍ଥ ହୋଇଛନ୍ତି। ଆବେଦନରେ ବ୍ୟକ୍ତି କହିଛନ୍ତି ଯେ, ତାଙ୍କ ସ୍ତ୍ରୀ ପରପୁରୁଷଙ୍କ ସହ ଅନୈତିକ ସମ୍ପର୍କ ରଖିଛନ୍ତି। ତେଣୁ ତାଙ୍କୁ ଭରଣପୋଷଣ କରି ପାରିବେ ନାହିଁ।
କୋର୍ଟ ଶୁଣାଣିରେ କହିଛନ୍ତି, ବାହାଘର ପରେ ଦମ୍ପତିଙ୍କ ମଧ୍ୟରେ ତିକ୍ତତା ଆରମ୍ଭ ହୋଇଥିଲା। ପରେ ୨୦୧୬ରେ ଛାଡ଼ପତ୍ର ହୋଇଯାଇଥିଲା। ଏହା ସତ୍ତ୍ୱେ ସ୍ତ୍ରୀ ଜଣଙ୍କ ଭରଣପୋଷଣ ପାଇବାକୁ ହକଦାର। ସ୍ତ୍ରୀଙ୍କ ସଜ୍ଞା ହେଉଛି ଜଣେ ମହିଳା ସ୍ବାମୀଙ୍କ ଠାରୁ ଛାଡ଼ପତ୍ର ପାଇଥିବେ ଓ ପୁନଃ ବିବାହ କରି ନ ଥିବେ।
ହାଇକୋର୍ଟ ରାୟ ଦେବା ବେଳେ କହିଛନ୍ତି ଯେ, ଦାବି ଅନୁସାରେ ବ୍ୟକ୍ତିଜଣକ ଉପଯୁକ୍ତ ପ୍ରମାଣ ଦାଖଲ କରିପାରି ନାହାନ୍ତି। ତେଣୁ ଭରଣପୋଷଣ ପାଇଁ ଦେଇଥିବା ନିର୍ଦ୍ଦେଶ କାଏମ ରହିବ ବୋଲି ୋର୍ଟ ନିର୍ଦ୍ଦେଶ ଦେଇଛନ୍ତି। ବିବାଦୀୟ ପରିସ୍ଥିତିରେ ମଧ୍ୟ ଆଇନ ଅନୁସାରେ ସ୍ତ୍ରୀଙ୍କୁ ଭରଣପୋଷଣ ପାଇବାର ଅଧିକାର ରହିବ।