ପୁରୀ ଅଫିସ,୨୧ା୫: ଶ୍ରୀମନ୍ଦିରରେ ନିୟୋଜିତ ଥିବା କେତେଜଣ କର୍ମଚାରୀ ଟଙ୍କା ନେଇ ଭକ୍ତକୁ ମହାପ୍ରଭୁଙ୍କ ଦର୍ଶନ କରାଉଥିବା ନେଇ ଅଭିଯୋଗ ହୋଇଛି। ଶନିବାର ଶ୍ରୀମନ୍ଦିରରେ ମହାପ୍ରଭୁଙ୍କ ଦର୍ଶନଙ୍କ ପାଇଁ ଶ୍ରଦ୍ଧାଳୁଙ୍କ ପ୍ରବଳ ଭିଡ଼ ହୋଇଥିଲା। ଶ୍ରଦ୍ଧାଳୁମାନେ ଧାଡ଼ିରେ ଯାଇ ଠାକୁରଙ୍କୁ ଦର୍ଶନ କରୁଥିତ୍ବା ବେଳେ ଅନ୍ୟ କେତେଜଣ ଶ୍ରଦ୍ଧାଳୁ ଖରା ପାଇଁ ବାହାରେ ଅପେକ୍ଷା କରିଥିଲେ। ଏହାର ସୁଯୋଗ ନେଇ ଶ୍ରୀମନ୍ଦିରର କେତେଜଣ କର୍ମଚାରୀ କେତେଜଣ ଶ୍ରଦ୍ଧାଳୁଙ୍କୁ ମହାପ୍ରଭୁଙ୍କ ଦର୍ଶନ କରାଇ ଦେବାକୁ କହି ଟଙ୍କା ନେଉଥିଲେ। ଏ ସମ୍ପର୍କରେ କେତେଜଣ ଭକ୍ତ ସିଂହଦ୍ୱାର ଥାନାରେ ଅଭିଯୋଗ କରିଥିଲେ। ପୋଲିସ ଏଥିପ୍ରତି କଡ଼ା ନଜର ରଖିଛି। ଏ ନେଇ ସୁଆର ମହାସୁଆର ନିଯୋଗର ବରିଷ୍ଠ ସେବାୟତ ଦାମଦୋର ମହାସୁଆର କହିଛନ୍ତି, ପ୍ରତିଦିନ ଶ୍ରୀମନ୍ଦିର ପରିସରରେ ଶ୍ରୀମନ୍ଦିର ପୋଲିସର କିଛି କର୍ମଚାରୀ ଉଚ୍ଚପଦସ୍ଥ ଅଧିକାରୀଙ୍କ ଜାଣତରେ ଶ୍ରୀମନ୍ଦିରକୁ ଆସୁଥିବା ଭକ୍ତଙ୍କଠାରୁ ହଜାର ହଜାର ଟଙ୍କା ନେଇ ବେଆଇନ ଭାବେ ମହାପ୍ରଭୁଙ୍କ ଦର୍ଶନ ପାଇଁ ଛାଡୁଛନ୍ତି। କାର୍ଯ୍ୟରେ ନିଯୁକ୍ତି ଥିବା କର୍ମଚାରୀମାନେ ଟଙ୍କା ନେଇ ଘଣ୍ଟି ଦ୍ୱାର, ମୁଦୁଲି ଦ୍ୱାର ସହ ଅନ୍ୟାନ୍ୟ ଦ୍ୱାରରେ ଭକ୍ତମାନଙ୍କୁ ଛାଡୁଛନ୍ତି। ଅପରପକ୍ଷେ ଭକ୍ତଙ୍କୁ କାହିଁକି ଶ୍ରୀମନ୍ଦିର ଚାରିଦ୍ୱାର ଦେଇ ଛଡାଯାଉ ନାହିଁ ବୋଲି ସେ ମୁଖ୍ୟ ପ୍ରଶାସକଙ୍କୁ ଜଶାଇଥିଲେ। ତେଣୁ ପୁରୀ ସହରବାସୀଙ୍କ ପାଇଁ ଆଧାର କାର୍ଡ ଦେଖାଇ ଚାରିଦ୍ୱାର ଦେଇ ଦର୍ଶନ ପାଇଁ ଅନୁମତି ମିଳୁ ବୋଲି ସେ କହିଛନ୍ତି। ଅପରପକ୍ଷେ ନୀତି ବିଳମ୍ବକୁ ନେଇ ସୁଆର ମହାସୁଆର ପକ୍ଷରୁ କ୍ଷତିପୂରଣ ପାଇଁ ଶ୍ରୀମନ୍ଦିର ପ୍ରଶାସନ ନିକଟରେ ଦାବି କରାଯାଇଛି। ତେବେ ଏ ସମ୍ପର୍କରେ ଶ୍ରୀମନ୍ଦିର ମୁଖ୍ୟ ପ୍ରଶାସକ ରଞ୍ଜନ କୁମାର ଦାସ କହିଛନ୍ତି, ଯାହାସବୁ ବ୍ୟକ୍ତିଗତ ଅଭିଯୋଗ ଆସିଛି ବା ସମସ୍ୟା ରହିଛି ତାହା ଉପରେ ଆଲୋଚନା କରାଯିବ। ସେହିପରି ଟଙ୍କା ନେଇ ଭକ୍ତଙ୍କୁ ମହାପ୍ରଭୁ୍ଙ୍କ ଦର୍ଶନ କରୁଥିବା ଘଟଣାର ତଦନ୍ତ କରାଯିବ। ସିସିଟଭି ଯାଞ୍ଚ କରାଯିବ। ଯେଉଁମାନେ ଏଭଳି କାର୍ଯ୍ୟ କରୁଥିବେ ସେମାନଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ଶ୍ରୀମନ୍ଦିରରେ କେବେ ମଧ୍ୟ ବିଶୃଙ୍ଖଳାକୁ ବରଦାସ୍ତ କରାଯିବନି। ଭକ୍ତଙ୍କ ପାଇଁ ଚାରିଦ୍ୱାର ଖୋଲିବା ଉପରେ ଆଲୋଚନା କରାଯାଇ ନିଷ୍ପତ୍ତି ନିଆଯିବ ବୋଲି ମୁଖ୍ୟ ପ୍ରଶାସକ ଦାସ ସୂଚନା ଦେଇଛନ୍ତି।
