ବଡ଼ବିଲ,୯।୨(ସ୍ବ.ପ୍ର.): କେନ୍ଦୁଝର ଜିଲା ବଡ଼ବିଲ କୋର୍ଟର କର୍ମଚାରୀ ଗୀତାଞ୍ଜଳୀ କିଷାନଙ୍କ ଘର ତାଲା ଭାଙ୍ଗି ଲାପଟପ୍ ଓ ଟାବ୍ଲେଟ୍ ଚୋରି ଅଭିଯୋଗରେ ପୋଲିସ ଜଣେ ଅଭିଯୁକ୍ତଙ୍କୁ ଗିରଫ କରି ଗୁରୁବାର କୋର୍ଟ ଚାଲାଣ କରିଛି। ଅଭିଯୁକ୍ତ ଜଣଙ୍କ ହେଲେ ସୁନ୍ଦରାବସ୍ତି ଅଞ୍ଚଳର ରାମ ଚାମ୍ପିଆ ଓରଫ କେଲା।
ସୂଚନା ଅନୁଯାୟୀ, ବଡ଼ବିଲ କୋର୍ଟରେ କନିଷ୍ଠ କିରାଣୀ ଭାବେ କାର୍ଯ୍ୟରତ ଗୀତାଞ୍ଜଳୀ ବଡ଼ବିଲ ସୁନ୍ଦରାବସ୍ତିରେ ଏକ ଭଡା ଘରେ ରୁହନ୍ତି। ମଙ୍ଗଳବାର ଗୀତାଞ୍ଜଳୀ କୋର୍ଟ କାର୍ଯ୍ୟ ସାରି ରାତିରେ ସେ ରହୁଥିବା ଭଡା ଘରେ ପହଞ୍ଚିଥିଲେ। ଘର ତାଲା ଭଙ୍ଗାଯାଇଥିବା ଦେଖିବାକୁ ପାଇବା ସହ ଘର ଭିତରେ ଥିବା ଲାପଟପ ଓ ଟାବ୍ଲେଟ୍ ଚୋରି ହୋଇଥିବା ଜାଣିବାକୁ ପାଇଥିଲେ ଗୀତାଞ୍ଜଳୀ। ଏ ନେଇ ଗୀତାଞ୍ଜଳୀ ତୁରନ୍ତ ବଡ଼ବିଲ ଥାନାରେ ଲିଖିତ ଅଭିଯୋଗ କରିଥିଲେ। ପୋଲିସ ବଡ଼ବିଲ ଥାନା କେଶ ନଂ ୩୪/୨୦୨୩ରେ ଏକ ମାମଲା ରୁଜୁ କରି ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଥିଲା। ନିକଟରେ ଥିବା ସିସି କ୍ୟାମେରାରେ କଏଦ ହୋଇଥିବା ଚିତ୍ରରୁ ପୋଲିସ ଅଭିଯୁକ୍ତଙ୍କୁ ଚିହ୍ନଟ କରିବାକୁ ସକ୍ଷମ ହୋଇଥିଲା। ଏହାପରେ ଅଭିଯୁକ୍ତଙ୍କୁ ବୁଧବାର ହୋଟେଲ ଲକି ଇଣ୍ଡିଆ ନିକଟରୁ ଗିରଫ କରିଥିଲା। ପଚରାଉଚରାରୁ ଅଭିଯୁକ୍ତ ଚୋରି କରିଥିବା ସ୍ବୀକାର କରିଥିବା ଜଣାପଡ଼ଥିଲା। ଏହାପରେ ପୋଲିସ ଅଭିଯୁକ୍ତ ରାମଙ୍କୁ ଗୁରୁବାର କୋର୍ଟ ଚାଲାଣ କରିଥିବା ଜଣାପଡ଼ିଛି।