ନିରାକାରପୁର,୧୫ା୨(ଡି.ଏନ୍.ଏ.): ଖୋର୍ଦ୍ଧା ଜିଲା ନିରାକାରପୁର ଥାନା ଅନ୍ତର୍ଗତ ରାମେଶ୍ୱର ଛକଠାରେ ଗତ ୨ ତାରିଖରେ ରାମେଶ୍ୱର ଗ୍ରାମର ମହେଶ୍ୱର ସାହୁ ନାମକ ଯୁବକଙ୍କୁ ଖଜୁରୀପଡ଼ା ଗ୍ରାମର ଦିବାକର ପାହାଡ଼ସିଂହ ନାମଙ୍କ ଜଣେ ଯୁବକ ଛୁରିରେ ଆକ୍ରମଣ କରିଥିଲେ। ଏନେଇ ଆହତଙ୍କ ମା’ ବିଷ୍ଣୁପ୍ରିୟା ସାହୁ ଉକ୍ତ ଥାନାରେ ତା’ ପରଦିନ ଅର୍ଥାତ୍ ୩ ତାରିଖରେ ଏକ ଲିଖିତ ଅଭିଯୋଗ କରିଥିଲେ। ଏହି ଅଭିଯୋଗକୁ ଭିତ୍ତି କରି ପୋଲିସ ୩୧/୨୩ରେ ଏକ ମାମଲା ରୁଜ କରିଥିଲେ ମଧ୍ୟ ଅଭିଯୁକ୍ତଙ୍କୁ ଗିରଫ କରୁ ନ ଥିଲା। ପରିବାର ଲୋକେ ପୁଣି ଅଭିଯୋଗ କରିବା ପରେ ଏହି ଖବର ପାଇ ଭାଜପା ମୁଖପାତ୍ର ସୋନାଲି ସାହୁ ଖୋର୍ଦ୍ଧା ଏସ୍ପିଙ୍କୁ ଭେଟି ଦିବାକରଙ୍କୁ ଗିରଫ ଏବଂ ଥାନା ଅଧିକାରିଣୀଙ୍କୁ ଅନ୍ୟତ୍ର ବଦଳି, ଗତ ତିନି ମାସର କଲ୍ ଡିଟେଲସ୍ ଯାଞ୍ଚ କରିବା ପାଇଁ ଦାବି କରିବା ପରେ ଦିବାକର ଗିରଫ ହୋଇଛନ୍ତି। ତେବେ ଦୀର୍ଘ ୧୨ ଦିନ ଧରି ଦିବାକରଙ୍କୁ କାହିଁକି ଗିରଫ କରାଯାଉ ନ ଥିଲା, ଥାନା ପାଚେରି, ଥାନାରେ ଲାଗିଥିବା ଲାଇଟ୍ ଏବଂ ଏହା ପରିସରରେ ଲାଗିଥିବା ଗଛକୁ ଏହି ଦିବାକର ଲଗାଇଥିବାରୁ ପୋଲିସ ଗିରଫ କରିବା ପରିବର୍ତ୍ତେ ଘଣ୍ଟ ଘୋଡ଼ାଉଥିଲା ବୋଲି ଅଭିଯୋଗ ହୋଇଥିଲା।