ଖପ୍ରାଖୋଲ,୯।୭(ଅଭୟ ତ୍ରିପାଠୀ): ବଲାଙ୍ଗୀର ଜିଲା ଖପ୍ରାଖୋଲ ଥାନା ଅଞ୍ଚଳର ଜଣେ ଯୁବତୀଙ୍କୁ ଅସଦାଚରଣ କରି ୩ ବର୍ଷ ହେଲା ଫେରାର ଥିବା ଜଣେ ଯୁବକଙ୍କୁ ଖପ୍ରାଖୋଲ ପୋଲିସ ଗିରଫ କରି ରବିବାର କୋର୍ଟ ଚାଲାଣ କରିଛି। ଅଭିଯୁକ୍ତ ଜଣକ ହେଲେ ସାନଉଡ଼େନ ଗାଁର କପିଳ ଦୀପ (୩୦)।
ମିଳିଥିବା ସୂଚନା ମୁତାବକ, କପିଳ ଜନୈକା ଯୁବତୀଙ୍କୁ ପ୍ରେମ କରୁଥିଲେ। ହେଲେ ବିବାହ କରିବାକୁ ମନା କରିବାରୁ ଯୁବତୀଙ୍କୁ ଅସଦାଚରଣ କରିଥିଲେ। ଏ ନେଇ ପୀଡ଼ିତା ଖପ୍ରାଖୋଲ ଥାନାରେ ୨୦୨୦ ଅକ୍ଟୋବର ମାସରେ ଅଭିଯୋଗ କରିଥିଲେ। ହେଲେ ଥାନାରେ ମାମଲା ରୁଜୁ ପରେ କପିଳ ଫେରାର ହୋଇଯାଇଥିଲେ। କପିଳ ପୁଇନ୍ତଲା ଥାନା ଅଧୀନ ରକସୀମୁଣ୍ଡା ଗାଁରେ ରହୁଥିବା ବିଶ୍ୱସ୍ତ ସୂତ୍ରରୁ ଖବରପାଇ ଖପ୍ରାଖୋଲ ପୋଲିସ ଚଢାଉକରି ତାଙ୍କୁ ଗିରଫ କରିଥିଲା। ରବିବାର ପଚରାଉଚରା ପରେ ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯାଇଥିବା ଖପ୍ରାଖୋଲ ଥାନା ଅଧିକାରୀ ରମାକାନ୍ତ ସାହୁ ସୂଚନା ଦେଇଛନ୍ତି।