ବଡ଼ବିଲ,୪ା୬(ସ୍ବ.ପ୍ର.): କେନ୍ଦୁଝର ଜିଲା ବଡ଼ବିଲ ଥାନା ଅନ୍ତର୍ଗତ ଷ୍ଟେଟ୍ବ୍ୟାଙ୍କ ନିକଟସ୍ଥ ଏକ ଜେରକ୍ସ ଦୋକାନରେ କାର୍ଯ୍ୟ କରୁଥିବା ଜଣେ ଯୁବତୀଙ୍କୁ ଟଣାଓଟରା ଏବଂ ଯୁବତୀଙ୍କୁ ଉଦ୍ଧାର କରିଥିବା ଦୋକାନ ମାଲିକଙ୍କୁ ମରଣାନ୍ତକ ଆକ୍ରମଣ ଅଭିଯୋଗରେ ପୋଲିସ ମୁଖ୍ୟ ଅଭିଯୁକ୍ତ ଏବଂ ଜଣେ ବାଳ ଅପରାଧୀଙ୍କୁ ଶନିବାର ଗିରଫ ପୂର୍ବକ କୋର୍ଟଚାଲାଣ କରିଛି। ଗିରଫ ଅଭିଯୁକ୍ତ ଜଣକ ହେଲେ ପିଏଚ୍ଡି ମାଗାଜିନ ହଟିଂ ଅଞ୍ଚଳରେ ରହୁଥିବା ନବୀନ କର୍ମକାର।
ସୂଚନା ଅନୁଯାୟୀ, ଶୁକ୍ରବାର ଅପରାହ୍ନରେ ଯୁବତୀ ଜଣକ ଜେରକ୍ସ ଦୋକାନରେ କାର୍ଯ୍ୟରତ ଥିଲାବେଳେ ଅଭିଯୁକ୍ତ ନବୀନ ସେଠାରେ ପହଞ୍ଚି ଯୁବତୀଙ୍କୁ ମୋବାଇଲ ନମ୍ବର ମାଗିଥିଲେ। ମୋବାଇଲ ନମ୍ବର ନ ଦେବାରୁ ଯୁବତୀଙ୍କୁ ଦୋକାନ ବାହାରକୁ ଟାଣି ନେଇଥିଲେ ନବୀନ। ଏହାର ବିରୋଧ କରିବାରୁ ନବୀନ, ଯୁବତୀଙ୍କୁ ଟଣାଓଟରା କରିବା ସହ ହତ୍ୟା ଓ ଅପହରଣ ଧମକ ଦେଇଥିଲେ। ଯୁବତୀଙ୍କ ପାଟି ଶୁଣି ଦୋକାନ ମାଲିକ ଆସି ନବୀନଙ୍କ କବଳରୁ ଯୁବତୀଙ୍କୁ ଉଦ୍ଧାର କରିଥିଲେ। କିଛି ସମୟ ପରେ ନବୀନ ଉକ୍ତ ଦୋକାନ ମାଲିକଙ୍କୁ ପିଏଚ୍ଡି ଛକକୁ ଡାକିଥିଲେ। ଦୋକାନ ମାଲିକ ପିଏଚ୍ଡିରେ ପହଞ୍ଚିବା ମାତ୍ରେ ନବୀନ ଓ ତାଙ୍କ ସହଯୋଗୀ ବାଳ ଅପରାଧୀ ଏକ ଧାରୁଆ ଅସ୍ତ୍ର ସାହାଯ୍ୟରେ ମରଣାନ୍ତକ ଆକ୍ରମଣ କରି ଆହତ କରିଥିଲେ। ତେବେ ଦୋକାନ ମାଲିକ କୌଣସି ମତେ ସେଠାରୁ ଖସିଯିବାକୁ ସକ୍ଷମ ହୋଇଥିଲେ। ଏ ନେଇ ପୀଡ଼ିତା ଯୁବତୀ ବଡ଼ବିଲ ଥାନାରେ ଅଭିଯୋଗ କରିବା ପରେ ପୋଲିସ କେସ୍ ନଂ. ୧୦୩/୨୨ରେ ଏକ ମାମଲା ରୁଜୁ କରିଥିଲା। ତେବେ ପୋଲିସ ଘଟଣାର ତଦନ୍ତ କରି ସଂପୃକ୍ତ ମୁଖ୍ୟ ଅଭିଯୁକ୍ତ ନବୀନ ଓ ସହଯୋଗୀ ବାଳ ଅପରାଧୀଙ୍କୁ ଗିରଫ କରି ଶନିବାର କୋର୍ଟ ଚାଲାଣ କରିଥିବା ବଡ଼ବିଲ ଥାନା ଆଇଆଇସି ସୁଶାନ୍ତ ଦାଶ ସୂଚନା ଦେଇଛନ୍ତି।