ଭୁବନେଶ୍ୱର,୧୮।୪ (ବ୍ୟୁରୋ): ଭୁବନେଶ୍ୱର ଉପକଣ୍ଠ ବାଲିପାଟଣା ଥାନା ଅନ୍ତର୍ଗତ ଦେଉଳିଧରପୁର ପଞ୍ଚାୟତ ଅଭୟମୁଖୀ କଣ୍ଟାସାହିରେ ସ୍ତ୍ରୀଙ୍କୁ କଟୁରିରେ ହାଣି ହତ୍ୟା ଓ ଝିଅଙ୍କୁ ଗୁରୁତର କରିବା ମାମଲାରେ ଭୁବନେଶ୍ୱର ଦ୍ୱିତୀୟ ଅତିରିକ୍ତ ଜଲା ଓ ଦୌରାଜଜ ସୋମବାର ରାୟ ପ୍ରକାଶ କରିଛନ୍ତି। ମାମଲାର ୨ଟି ଦଫା (୩୦୨ ଓ ୩୦୭)ରେ ଅଭିଯୁକ୍ତ ସ୍ବାମୀ ବାମଦେବ ସାହୁ (୫୪)ଙ୍କୁ ପୃଥକ ଭାବେ ଆଜୀବନ ଜେଲଦଣ୍ଡ ହୋଇଛି। ଏଥିସହ ପ୍ରତ୍ୟେକ ଦଫାରେ ୫୦ ହଜାର ଲେଖାଏ ମୋଟ ୧ ଲକ୍ଷ ଅର୍ଥଦଣ୍ଡରେ ମଧ୍ୟ ଦଣ୍ଡିତ କରାଯାଇଛି। ଜରିମାନା ଅନାଦାୟ ଅଧିକ ୬ ମାସ ଜେଲ ଭୋଗିବାକୁ ବିଚାରପତି ସତ୍ୟନାରାୟଣ ପାତ୍ର ତାଙ୍କ ରାୟରେ ଉଲ୍ଲେଖ କରିଛନ୍ତି।
ମାମଲାର ବିବରଣୀ ଅନୁଯାୟୀ, ଘରୋଇ କଳହକୁ କେନ୍ଦ୍ରକରି ୨୦୧୮ ମେ ୧୨ ପୂର୍ବାହ୍ନ ୧୦ଟାରେ ବାମଦେବ ଏକ କଟୁରିରେ ସ୍ତ୍ରୀ ରୀନାରାଣୀଙ୍କୁ ଆକ୍ରମଣ କରିଥିଲେ। ଫଳରେ ତାଙ୍କ ବେକ ଓ ମୁଣ୍ଡରେ କ୍ଷତ ସୃଷ୍ଟି ହୋଇ ପ୍ରଚୁର ରକ୍ତସ୍ରାବ ହୋଇଥିଲା। ଏହି ସମୟରେ ନିକଟରେ ଥିବା ୧୫ ବର୍ଷୀୟା ଝିଅ ପୂଜାଶ୍ରୀ ତାଙ୍କ ମା’ଙ୍କୁ ଉଦ୍ଧାର କରିବାକୁ ଚେଷ୍ଟା କରୁଥିବାବେଳେ ସେ ମଧ୍ୟ ବାପାଙ୍କ କଟୁରି ଚୋଟରେ ଗୁରୁତର ହୋଇଥିଲେ। ସ୍ଥାନୀୟ ଲୋକେ ଉଭୟଙ୍କୁ ଉଦ୍ଧାର କରି ହସ୍ପିଟାଲ ନେଇଥିଲେ ମଧ୍ୟ ଡାକ୍ତର ସେଠାରେ ସ୍ତ୍ରୀ ରୀନାଙ୍କୁ ମୃତ ଘୋଷଣା କରିଥିଲେ। ରୀନାରାଣୀଙ୍କ ଭଉଣୀ ଝୁନୁଲତା ସାହୁଙ୍କ ଏତଲାକୁ ଭିତ୍ତି କରି ପୋଲିସ ଆଇପିସି ଦଫା ହତ୍ୟା ଓ ହତ୍ୟା ଉଦ୍ୟମରେ ଏକ ମାମଲା (ନଂ.୭୨/୨୦୧୮) ରୁଜୁ କରି ଅଭିଯୁକ୍ତ ବାମଦେବଙ୍କୁ ଗିରଫ କରିଥିଲା। ଜାମିନ ନାମଞ୍ଜୁର ହେବାରୁ ତାଙ୍କୁ ଜେଲକୁ ପଠାଇ ଦିଆଯାଇଥିଲା। ଏନେଇ ପୋଲିସ ପକ୍ଷରୁ ଚାର୍ଜଶିଟ ଦାଖଲ କରାଯିବା ପରେ କୋର୍ଟରେ ମାମଲାର ଶୁଣାଣି ଆରମ୍ଭ ହୋଇଥିଲା। ୨୧ଟି ଦସ୍ତାବିଜ ଓ ୧୮ଜଣ ସାକ୍ଷୀଙ୍କ ବୟାନକୁ ଆଧାର କରି ପ୍ରମାଣ ପାଇବା ପରେ କୋର୍ଟ ରାୟ ଶୁଣାଇଛନ୍ତି। ସରକାରଙ୍କ ପକ୍ଷରୁ ଅତିରିକ୍ତ ସରକାରୀ ଓକିଲ ସିଲିଳ କୁମାର ପ୍ରଧାନ ମାମଲା ପରିଚାଳନା କରୁଥିଲେ।