ସମ୍ବଲପୁର,୭ା୨(ବ୍ୟୁରୋ): ସମ୍ବଲପୁର ଦେଇ ଯାଇଥିବା ୫୫ନଂ. ଜାତୀୟ ରାଜପଥ ନିର୍ମାଣକାରୀ ସଂସ୍ଥା ଏଆଇପିଏଲ୍ ପୂର୍ବରୁ ବାଉନ୍ସର ଲଗାଇ ଡ୍ରାଇଭରମାନଙ୍କୁ ମାଡ ମାରିଥିବା ଅଭିଯୋଗକ୍ରମେ ଯୁଯୁମୁରା ଥାନାରେ ମାମଲା ରୁଜୁ ହୋଇଥିଲା। ଏବେ ଘରୋଇ ସୁରକ୍ଷାକର୍ମୀଙ୍କୁ ପୁଣି ବାଉନ୍ସର ଲଗାଇ ମାଡ଼ ମରାଯାଇଥିବା ଅଭିଯୋଗ ହୋଇଛି। ସୁରକ୍ଷାକର୍ମୀ ହିମାଂଶୁ ଶେଖର ସାହୁ, ସୁନିଲ କୁମାର ସାହୁଙ୍କୁ ମାଡ଼ ମରାଯାଇଥିବା ବେଳେ ତାଙ୍କ ସହକର୍ମିମାନେ ଥାନାରେ ଅଭିଯୋଗ କରିଛନ୍ତି। ସେମାନଙ୍କ ଅଭିଯୋଗ କ୍ରମେ ଗତ ୪ ତାରିଖରେ ନସ୍କାପାଲି ନିକଟରେ ରାତିରେ ଡ୍ୟୁଟିରେ ଥିଲେ। ସେ ସମୟରେ ଦୁଇଜଣଙ୍କ ଭିତରୁ ଜଣେ ଶୋଇ ପଡିଥିଲେ। ସେ ସମୟରେ କମ୍ପାନୀର ବାଉନ୍ସର ଓ କର୍ମଚାରୀ ଯାଇ ଶୋଇଥିବା ସମୟର ଫଟୋ ଉତ୍ତୋଳନ କରିଥିଲେ। ପରଦିନ ସକାଳେ ଗଡଗଡବାହାଲସ୍ଥିତ କ୍ୟାମ୍ପରେ ଚୋରି କରୁଥିବା ଅଭିଯୋଗ ଆଣି ମାଡ଼ ମାରିଥିଲେ। ଘଟଣାସ୍ଥଳକୁ ନେଇ ମଧ୍ୟ ସେମାନେ ମାଡ଼ ମାରିଥିଲେ। ଜୀବନ ବିପଦରେ ରହିଛି ବୋଲି ସେମାନେ ଅଭିଯୋଗ କରିଥିଲେ। ପୋଲିସ ଅଭିଯୋଗ ଶୁଣିବା ପରେ ତାଙ୍କ ସୁପରଭାଇଜରଙ୍କୁ ଡାକିବାକୁ କହିଥିଲେ। ହେଲେ ଖବର ଲେଖାହେବା ପର୍ଯ୍ୟନ୍ତ କମ୍ପାନୀ ପକ୍ଷରୁ ଅଭିଯୋଗ ହୋଇ ନାହିଁ ଓ ସୁରକ୍ଷାକର୍ମୀଙ୍କୁ ନିୟୋଜିତ କରିଥିବା ସୁପରଭାଇଜର ନ ଆସିବାରୁ ମାମଲା ରୁଜୁ ହୋଇ ନାହିଁ ବୋଲି ଥାନା ଅଧିକାରୀ ରାଜକୁମାର ବିଶ୍ୱାଳ କହିଛନ୍ତି। ଅନ୍ୟପଟେ ଚୋରି ଅଭିଯୋଗ କରି ପ୍ରମାଣିତ କରିବା ପାଇଁ କମ୍ପାନୀର କର୍ମଚାରୀମାନେ କରିଥିବା ଷଡଯନ୍ତ୍ର ଉପରେ ବୟାନ ଦେଇଛନ୍ତି କମ୍ପାନୀର ଜଣେ ଡ୍ରାଇଭର। ସେ କହିଛନ୍ତି, କୌଣସି ସାମଗ୍ରୀ ଚୋରି ହୋଇନାହିଁ। ଚୋରି ମାମଲାରେ ଫସାଇବାକୁ ଘଟଣାସ୍ଥଳ ନକ୍ସାପାଲିକୁ ନିଆଯାଇଥିଲା। ଉଭୟଙ୍କୁ ଗୁଡିରୁ ଓହ୍ଲାଇଦେଇ ରାସ୍ତାକଡରେ ଥିବା ବସ୍ତା ଉଠାଇବାକୁ ବାଉନ୍ସର ଓ କର୍ମଚାରୀମାନେ କହିଥିଲେ। ସେମାନେ ବସ୍ତା ଉଠାଇବା ସମୟରେ ମୋବାଇଲରେ ଫଟୋ ଉଠାଇଥିଲେ। ଏହି ଘଟଣା ମଧ୍ୟାହ୍ନ ପ୍ରାୟ ୧୨ଟାରେ ହୋଇଥିଲା । ସୁରକ୍ଷା କର୍ମୀମନେ ଚୋରି କରି ନାହାନ୍ତି ବୋଲି ସେ କହିଥିଲେ। ଘଟଣା ସମ୍ପର୍କରେ କମ୍ପାନୀ ଅଧିକାରୀ ଗୌରବ ଦାସ କହିଛନ୍ତି, ଚୋରି ଅଭିଯୋଗକୁ ନେଇ ସେମାନଙ୍କୁ ଅଟକ ରଖାଯାଇଥିଲା। ହେଲେ କୌଣସି ମାରପିଟ କରାଯାଇ ନ ଥିବା ସେ କହିଥିଲେ।