କେନ୍ଦୁଝର,୧୨ା୪(ସ୍ବ.ପ୍ର.): କଟକ ବଡ଼ ଡାକ୍ତରଖାନାରେ ଜୀବନ ସହ ସଂଗ୍ରାମ କରୁଥିବା ପୁଅକୁ ବାପା କୁଞ୍ଜ ବାହାଦୂର ଲାମା(୪୦) ଜଗି ରହିଥିଲେ। ରାତି ବସ୍ରେ କଟକରୁ କେନ୍ଦୁଝର ଆସୁଥିବା ସମୟରେ ଘଟଗାଁରେ ଓହ୍ଲାଇ ପଡ଼ିଥିଲେ। କିନ୍ତୁ ଢାଙ୍କୁଣିଡିହି ନିକଟରେ ୧୧ ତାରିଖ ସନ୍ଧ୍ୟାରେ କିଛି ଲୋକ ତାକୁ ଠେଙ୍ଗାରେ ପିଟି ପିଟି ନିକଟସ୍ଥ ପୋଖରୀରେ ଫିଙ୍ଗି ଦେଇଥିଲେ। ସେ ପିଇବାକୁ ପାଣି ମାଗିଥିଲେ ମଧ୍ୟ ରକ୍ତମୁଖା ହତ୍ୟାକାରୀମାନେ କିଛି ଶୁଣି ନ ଥିଲେ। କେହି ଦେଖି ଆମ୍ବୁଲାନ୍ସ ଡାକିବାରୁ ତାଙ୍କୁ ତୁରନ୍ତ ଘଟଗାଁ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କଲା ପରେ ସେ ମୋତେ ମାରିଦେଲେ କହି ମରିଯାଇଥିଲେ। ଘଟଗାଁ ଥାନା ପୋଲିସ ଖବର ପାଇ ୯ ଜଣଙ୍କୁ ଧରି ଆଣି ପଚରାଉଚରା କରୁଛି ଆଉ କିଛି ଜଣଙ୍କୁ ଗିରଫ କରିପାରେ। ମୃତ କୁଞ୍ଜ ବାହାଦୂର ଜଣେ ମିସ୍ତ୍ରୀ ଥିଲେ। ସେ କେନ୍ଦୁଝର ଡିଡି କଲେଜର ପୂର୍ବ ଜଗୁଆଳି ଲାଲ୍ ବାହାଦୂରଙ୍କ ପୁଅ ପାଖ ଗହ୍ମାରିଆ ଗାଁରେ ରୁହନ୍ତି। ଖବର ପାଇ ପରିବାର ଲୋକେ ଘଟଗାଁ ମେଡିକାଲ ଯାଇ ମୃତଦେହ ଚିହ୍ନଟ କରିଛନ୍ତି। ମୃତକଙ୍କ ଭାଉଜ ସଂଯୁକ୍ତା ଲାମା ଘଟଗାଁ ଥାନାରେ ଏତଲା ଦେଇଛନ୍ତି କି ତାଙ୍କ ଦିଅରକୁ ଅମାନୁଷିକ ଭାବେ ହତ୍ୟା କରାଯାଇଛି। ଘଟଗାଁ ପୋଲିସ ମୃତଦେହ କେନ୍ଦୁଝର ଜିଲା ମୁଖ୍ୟ ଡାକ୍ତରଖାନାକୁ ଆଣି ବ୍ୟବଚ୍ଛେଦ କରିଛି। ବିନା କାରଣରେ ନିରୀହଙ୍କୁ ଏପରି ହତ୍ୟା କରିଥିବା ଲୋକମାନଙ୍କୁ ଫାଶୀ ଦିଆଯିବା ପାଇଁ ସାଧାରଣରେ ଦାବି ହୋଇଛି।
