ବାଲିକୁଦା,୧୧।୨(ସ୍ବ.ପ୍ର.): ବନ୍ଦର ସାମୁଦ୍ରିକ ଥାନା ଅଧୀନ ଫୁଲୁପାଟଣା ଗ୍ରାମର ସୁଜିତ ବେହେରାଙ୍କ ସ୍ତ୍ରୀ ଟୁକୁନିଙ୍କ ମୃତଦେହ ତାଙ୍କ ଶୋଇବା ଘରୁ ଶନିବାର ରାତିରେ ଜବତ ହୋଇଛି। ଅପରପକ୍ଷେ ଝିଅକୁ ଯୌତୁକ ପାଇଁ ଶାଶୁ ଘର ଲୋକେ ହତ୍ୟା କରିଛନ୍ତି ବୋଲି ବାପଘର ଲୋକେ ରବିବାର ଥାନାରେ ଅଭିଯୋଗ କରିଛନ୍ତି। ପୋଲିସ ମୃତଦେହ ଜବତ କରି ବ୍ୟବଚ୍ଛେଦ ପାଇଁ ଜଗତ୍ସିଂହପୁର ମୁଖ୍ୟ ଚିକିତ୍ସାଳୟକୁ ପଠାଇଛି। ଏଥିସହ ସାଇଣ୍ଟିଫିକ୍ ଟିମ୍ ଘଟଣାସ୍ଥଳରେ ତଦନ୍ତ କରିଛି। ଅଭିଯୋଗକୁ ଭିତ୍ତି କରି ଥାନାରେ ମାମଲା (ନଂ.୧୩/୨୩) ରୁଜୁ ହୋଇଛି।
ଅଭିଯୋଗ ଅନୁଯାୟୀ, ଅସ୍ତରଙ୍ଗ ଥାନା ଅନ୍ତର୍ଗତ ନଗର ଗ୍ରାମର ବୁଲା ବେହେରାଙ୍କ ଝିଅ ଟୁକୁନିଙ୍କ ସହ ୪ ବର୍ଷ ତଳେ ସୁଜିତଙ୍କ ବିବାହ ହୋଇଥିଲା। ଏହାପରେ ଯୌତୁକ ଆଣିବା ପାଇଁ ଟୁକୁନିଙ୍କୁ ବିଭିନ୍ନ ସମୟରେ ଶାଶୁ ଘର ଲୋକେ ନିର୍ଯାତନା ଦେବା ସହ ମାଡ଼ ମାରୁଥିଲେ। ଏଭଳିଭାବେ ମାଡ଼ ମାରି ତାଙ୍କୁ ହତ୍ୟା କରାଯାଇଛି ବୋଲି ବାପଘର ପକ୍ଷରୁ ଅଭିଯୋଗରେ ଦର୍ଶାଯାଇଛି। ଅପରପକ୍ଷେ ଶ୍ୱଶୁର କାହ୍ନୁ ବେହେରା ଅଭିଯୋଗର ଖଣ୍ଡନ କରିି କହିଛନ୍ତି, ଅଭିଯୋଗ ସମ୍ପୂର୍ଣ୍ଣ ମିଛ ଓ ଭିତ୍ତିହୀନ। ପୁଅ ସୁଜିତ୍ ଚେନ୍ନାଇ ସହରରେ କାମ କରୁଛି ଓ ସେ ଘରେ ମଧ୍ୟ ନାହିଁ। ଶନିବାର ରାତିରେ ଫୋନରେ ଉଭୟେ କଥାବାର୍ତ୍ତା ହେଉଥିବାବେଳେ ପାଟିତୁଣ୍ଡ ହେଉଥିଲା। ସ୍ବାମୀ ସ୍ତ୍ରୀ ମଧ୍ୟରେ ଏପରି ଘଟେ ବୋଲି ଭାବି ଏହାକୁ ଆମେ ହାଲ୍କା ଭାବେ ନେଇଥିଲୁ। ରାତି ପ୍ରାୟ ୨ଟା ବେଳେ ବୋହୂ ପାଖରେ ଶୋଇଥିବା ଦେଢ଼ ବର୍ଷର ଶିଶୁପୁତ୍ର କାନ୍ଦିବାରୁ ପରିବାର ଲୋକଙ୍କ ନିଦ ଭାଙ୍ଗି ଥିଲା। ଶିଶୁଟି କ’ଣ ପାଇଁ କାନ୍ଦୁଛି ବୋଲି ଡାକିବାରୁ ଟୁକୁନି କବାଟ ଖୋଲି ନ ଥିଲେ। ସନ୍ଦେହ ବଢ଼ିବାରୁ ଝରକା ବାଟେ ଦେଖିବା ବେଳକୁ ବୋହୂ ପଙ୍ଖାରେ ରଶିଦେଇ ଝୁଲୁଥିବା ଜଣାପଡ଼ିଥିଲା। କବାଟ ଭାଙ୍ଗି ଟୁକୁନିଙ୍କୁ ତଳକୁ ଓହ୍ଲାଇବା ସହ ପଡୋଶୀ ଓ ଥାନାରେ ଖବର ଦେଇଥିଲୁ। ଏସମ୍ପର୍କରେ ତଦନ୍ତକାରୀ ଅଧିକାରୀ ଅନିରୁଦ୍ଧ ରାଉତ କହିଛନ୍ତି, ଏନେଇ ତଦନ୍ତ ଜାରି ରହିଛି। ବ୍ୟବଚ୍ଛେଦ ରିପୋର୍ଟ ମିଳିବାପରେ ଅଧିକ ତଥ୍ୟ ମିଳିପାରିବ।