ନୟାଗଡ ଅଫିସ,୨୫ା୯: ଧାର ଟଙ୍କା ମାଗିବାରୁ ନୟାଗଡ଼ ଜିଲା ଶରଣକୁଳ ଥାନା ଅଧୀନ ଧୁଷୁମାରେ ବୁଧବାର ରାତିରେ ଜଣେ ମହିଳାଙ୍କୁ ହତ୍ୟା କରାଯାଇଥିବା ଅଭିଯୋଗ ହୋଇଛି। ମୃତକହେଲେ ମାୟା ଭୂୟାଁ(୬୦)। ଗୁରୁବାର ପୋଲିସ ମୃତଦେହ ଜବତ କରି ବ୍ୟବଚ୍ଛେଦ କରାଇ ପରିବାର ଲୋକଙ୍କୁ ହସ୍ତାନ୍ତର କରିବା ସହ ଏକ ମାମଲା ରୁଜୁ କରି ତଦନ୍ତ ଆରମ୍ଭ କକରିଛି।
ଅଭିଯୋଗ ଅନୁସାରେ, ଧୁଷୁମାର ପ୍ରଫୁଲ୍ଲ ଭୂୟାଁଙ୍କ ସ୍ତ୍ରୀ ମାୟାଙ୍କଠାରୁ ସେହି ଗାଁର ବୀରେନ୍ଦ୍ର ଓ ମମତା ଜେନା ୩ ଲକ୍ଷ୮୭ ହଜାର ଟଙ୍କା ଧାର ନେଇଥିଲେ। ହେଲେ ଟଙ୍କା ପରିଶୋଧ କଲେ ନାହିଁ। ଏନେଇ ଉଭୟ ପରିବାର ମଧ୍ୟରେ ବିଭିନ୍ନ ସମୟରେ ପାଟିତୁଣ୍ଡ ହେଉଥିଲା। ବୁଧବାର ମାୟା ଟଙ୍କା ମାଗିବାକୁ ଯାଇ ଫେରି ନ ଥିଲେ। ଗୁରୁବାର ବୀରେନ୍ଦ୍ରଙ୍କ ଛାତ ଉପରୁ ମାୟାଙ୍କ ଝୁଲନ୍ତା ମୃତଦେହ ଉଦ୍ଧାର ହୋଇଥିଲା। ଏନେଇ ଶରଣକୁଳ ଥାନା ଆଇଆଇସି ବିମଳ ମଲ୍ଲିକ କୁହନ୍ତି, ଟଙ୍କା ଧାରକୁନେଇ ହତ୍ୟାକାଣ୍ଡ ଘଟିଥିବା ଅଭିଯୋଗ ହୋଇଛି। ହେଲେ ଟଙ୍କା ନେବାର କିଛି ପ୍ରମାଣ ମିଳିନି। ତେବେ ଏହା ହତ୍ୟା କି ଆମତ୍ହତ୍ୟା ଜଣାପଡିନି। (ନଂ.୧୦୦/୨୦)ରେ ମାମଲା ରୁଜୁ କରାଯାଇ ତଦନ୍ତ ଆରମ୍ଭ ହୋଇଛି। ବ୍ୟବଚ୍ଛେଦ ରିପୋର୍ଟ ଆସିବା ପରେ ପରବର୍ତ୍ତୀ ପଦକ୍ଷେପ ନିଆଯିବ। ମୃତକଙ୍କ ପୁଅ ପ୍ରକାଶ କୁହନ୍ତି ମା’ଙ୍କୁ ହତ୍ୟା କରି ଆତ୍ମହତ୍ୟାର ରୂପ ଦେବାକୁ ଉଦ୍ୟମ ଚାଲିଛି।