ଅନୁଗୋଳ ଅଫିସ,୫।୬: ୨ ଲକ୍ଷ ଟଙ୍କା ଅଧିକ ଯୌତୁକ ପାଇଁ ଜଣେ ୮ ମାସର ଗର୍ଭବତୀଙ୍କୁ ଶାଶୁଘର ଲୋକେ ହତ୍ୟା କରିଥିବା ଶନିବାର ଅନୁଗୋଳ ସଦର ଥାନାରେ ଅଭିଯୋଗ ହୋଇଛି। ମୃତ ମହିଳା ହେଲେ ଅନୁଗୋଳ ବ୍ଲକ ବେନ୍ତପୁର ଗ୍ରାମର ଚିତ୍ତରଞ୍ଜନ ପରିଡାଙ୍କ ସ୍ତ୍ରୀ ସସ୍ମିତା ବେହେରା। ପୋଲିସ ସସ୍ମିତାଙ୍କ ଝୁଲନ୍ତା ମୃତଦେହ ଜବତ କରିଛି। ସସ୍ମିତାଙ୍କ ବାପା ରବିନାରାୟଣ ବେହେରାଙ୍କ ଅଭିଯୋଗ ଆଧାରରେ ନଂ. ୪୦୧/୨୨ରେ ମାମଲା ରୁଜୁ କରାଯାଇଛି। ତେବେ ଅଭିଯୋଗକୁ ସସ୍ମିତାଙ୍କ ଶାଶୁଘର ଲୋକେ ଖଣ୍ଡନ କରିଥିବାବେଳେ ଘଟଣାସ୍ଥଳରୁ ଏକ ଚିଠି ମିଳିଥିବା ଥାନା ଅଧିକାରୀ ସତ୍ୟବ୍ରତ ରାଉତ ସୂଚନା ଦେଇଛନ୍ତି।
ତାଳଚେର ବ୍ଲକ ସରେଇଲୋ ଗ୍ରାମର ରବି ନାରାୟଣ ଅଭିଯୋଗରେ ଦର୍ଶାଇଛନ୍ତି, ୨୦୨୦ ଜାନୁୟାରୀ ୨୪ରେ ଝିଅ ସସ୍ମିତାଙ୍କ ବାହାଘର ଅନୁଗୋଳ ବୁଢୀ ଠାକୁରାଣୀ ମନ୍ଦିରଠାରେ ହୋଇଥିଲା। ବାହାଘର ବେଳେ ଦାବି ମୁତାବକ ଯୌତୁକ ବାବଦକୁ ଟିଭି, ଫ୍ରିଜ, ସୁନା ଚେନ, ମୋଟରସାଇକେଲ ସମେତ ନଗଦ ୩୦ ହଜାର ଟଙ୍କା ଦିଆଯାଇଥିଲା। ହେଲେ ବାହାଘରର କିଛି ଦିନ ପରେ ଚିତ୍ତରଞ୍ଜନଙ୍କ ସମେତ ତାଙ୍କ ବାପା, ମା, ବଡଭାଇ, ଭାଉଜ ପ୍ରମୁଖ ମିଶି ଅଧିକ ୨ ଲକ୍ଷ ଟଙ୍କା ଯୌତୁକ ଦାବି କରୁଥିଲେ। ବିଭିନ୍ନ ସମୟରେ ଝିଅଙ୍କୁ ଶାରୀରିକ ଓ ମାନସିକ ନିର୍ଯାତନା ଦେଇ ଆସୁଥିଲେ। ଟଙ୍କା ଦେବାକୁ ଅକ୍ଷମତା ପ୍ରକାଶ କରିବା ସହ ଝିଅଙ୍କୁ ମାର୍ପିଟ ନ କରିବାକୁ ସେ ନେହୁରା ହୋଇଥିଲେ ମଧ୍ୟ ନିର୍ଯାତନା କମି ନ ଥିଲା। ଶନିବାର ସକାଳେ ଝିଅଙ୍କ ମୃତ୍ୟୁ ହୋଇଥିବା ଖବରପାଇ ସେ ବେନ୍ତପୁର ଆସିଥିଲେ। ମୃତଦେହରେ ଅନେକ କ୍ଷତ ଚିହ୍ନ ଥିବା ସହ ଏକ ଶାଢିରେ ଝୁଲୁଥିବା ଦେଖି ଝିଅଙ୍କୁ ହତ୍ୟା କରାଯାଇଛି ବୋଲି ସେ ଅଭିଯୋଗ କରିଛନ୍ତି। ଅଭିଯୋଗ ପାଇ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ କରିଥିଲା। ଘଟଣାସ୍ଥଳରୁ ଏକ ଚିଠି ଜବତ କରାଯାଇଛି। ମାଜିଷ୍ଟ୍ରେଟଙ୍କ ଉପସ୍ଥିତିରେ ମୃତଦେହ ଜବତ କରି ପୋଲିସ ଜିଲା ମୁଖ୍ୟ ଚିକିତ୍ସାଳୟକୁ ବ୍ୟବଚ୍ଛେଦ ପାଇଁ ପଠାଇଦେଇଛି। ଅନ୍ୟପକ୍ଷରେ ହତ୍ୟା ଅଭିଯୋଗକୁ ଚିତ୍ତରଞ୍ଜନଙ୍କ ପରିବାର ଲୋକେ ଖଣ୍ଡନ କରିଛନ୍ତି। ସେମାନେ କହିଛନ୍ତି, ସସ୍ମିତା ସ୍ବାମୀଙ୍କ ସହ ପ୍ରାୟ ଝଗଡା କରନ୍ତି। ସକାଳୁ ଛାତ ଶିଡି ରେଲିଂରେ ସସ୍ମିତା ରଶି ଦେଉଥିବା ବାହାର ଲୋକେ ଦେଖି ଚିତ୍କାର କରିବାରୁ ଜାଣିଲୁ। ତୁରନ୍ତ ଉଦ୍ଧାର କରିବାକୁ ଯାଇଥିଲେ ମଧ୍ୟ ତାଙ୍କୁ ବଞ୍ଚାଇ ପାରି ନ ଥିଲୁ ବୋଲି ଶାଶୁଘର ଲୋକେ ପ୍ରକାଶ କରିଛନ୍ତି।