ଭବାନୀପାଟଣା,୪।୪(ସ୍ବ.ପ୍ର.): କଳାହାଣ୍ଡି ଜିଲା ଜୟପାଟଣା ଥାନା ଅଞ୍ଚଳରେ ୨୦୨୦ରେ ନିଜ କକାଙ୍କୁ ପୁତୁରା ଛୁରି ଭୁଶିବା ଘଟଣାର ରାୟ ସୋମବାର ପ୍ରକାଶ ପାଇଛି। ଏହି ମାମଲାରେ ସମସ୍ତ ସାକ୍ଷ୍ୟ ଓ ପ୍ରମାଣ ଭିତ୍ତିକରି ଜୟପାଟଣା ଜେଏମଏଫିସ କୋର୍ଟ ବିଚାରପତି ପ୍ରତାପ ଚନ୍ଦ୍ର ପୃଷ୍ଟି ଅଭିଯୁକ୍ତ ପୁତୁରା ତାଲଗୁଡ ଗ୍ରାମର ଦୈତାରୀ ପ୍ରଧାନୀଙ୍କୁ ୨ବର୍ଷ ଜେଲ ଦଣ୍ଡାଦେଶ ସହ ହଜାରେ ଟଙ୍କା ଜରିମାନା ଶୁଣାଇଛନ୍ତି। ଜରିମାନା ଅନାଦେୟ ଆହୁରି ୩ ମାସ ଜେଲ ଦଣ୍ଡାଦେଶ ଲାଗି ରାୟରେ ଉଲ୍ଲେଖ କରିଛନ୍ତି। ମିଳିଥିବା ସୂଚନା ଅନୁଯାୟୀ, ଗତ ୨୯।୬।୨୦୨୦ ରାତିରେ ଜୟପାଟଣା ଥାନା ମୁଖୀଗୁଡାର ରବିନ୍ଦ୍ର ପ୍ରଧାନୀଙ୍କ ଘରେ ପଶି ଦୈତାରୀ ତାଙ୍କ ଛାତିରେ ଛୁରି ଭୁଶିଦେଇଥିଲେ। ଗୁରୁତର ରବିନ୍ଦ୍ରଙ୍କୁ ପ୍ରଥମେ ସ୍ଥାନୀୟ ଡାକ୍ତରଖାନା ଓ ପରେ ଭବାନୀପାଟଣା ଜିଲା ମୁଖ୍ୟ ଚିକିତ୍ସାଳୟକୁ ନେଇଥିଲେ। ଛାତିରେ ରହିଥିବା ଛୁରିକୁ କାଢି ପାରି ନ ଥିଲେ। ଫଳରେ ରବିନ୍ଦ୍ରଙ୍କୁ ବୁର୍ଲା ସ୍ଥାନାନ୍ତର କରାଯାଇଥିଲା। ସେଠାରେ ତାଙ୍କ ଛୁରିକୁ କଢାଯାଇଥିଲା। ଏପଟେ ଅଭିଯୁକ୍ତ ଦୈତାରୀଙ୍କୁ ପୋଲିସ ଗିରଫ କରି କୋର୍ଟ ଚାଲାଣ କରିଥିଲା। ପରେ ଏହି ମାମଲା ଥାନାରୁ କୋର୍ଟକୁ ଆସିଥିଲା। ଏହି ମାମଲାର ଶୁଣାଣି ଗତ ୩୧ ତାରିଖ ହେବା କଥା। ହେଲେ ଅଭିଯୁକ୍ତ ଉକ୍ତ ଦିନ କୋର୍ଟରେ ଉପସ୍ଥିତ ନ ଥିବାରୁ ବିଚାରପତି ଅଭିଯୁକ୍ତଙ୍କ ବିରୋଧରେ ଏନବିଡବ୍ଲୁ ଜାରି କରିଥିଲେ। ପୋଲିସ ଗିରଫ କରି ଅଭିଯୁକ୍ତ କୋର୍ଟଙ୍କୁ ଆଣିଥିଲା। ଏହି ମାମଲା ସରକାରଙ୍କ ପକ୍ଷରୁ କ୍ୟାଡର ଏପିପି ଯୋଗେନ୍ଦ୍ର ରାଇକା ଓ ଶିଶିର କୁମାର ମୁଣ୍ଡ ପରିଚାଳନା କରିଥିଲେ।