ବୌଦ୍ଧ,୧୬ା୫(ସ୍ବ.ପ୍ର.): ବୌଦ୍ଧ ଜିଲା ଦୌରାଜଜ୍ ବିକ୍ରମ କୁମାର ପ୍ରଧାନ ସୋମବାର ଏକ ହତ୍ୟା ମାମଲାର ବିଚାର କରି ଅଭିଯୁକ୍ତ ଦୁଇ ପୁତୁରାଙ୍କୁ ଆଜୀବନ କାରାଦଣ୍ଡ ସହ ୧୦ ହଜାର ଟଙ୍କା ଜରିମାନା ଆଦେଶ ପ୍ରଦାନ କରିଥିବା ବେଳେ ଭାଇ ଓ ଭଣଜାଙ୍କୁ ନିର୍ଦ୍ଦୋଷରେ ଖଲାସ କରିଛନ୍ତି।
ମାମଲାରୁ ପ୍ରଳକାଶ ଯେ, ପୁରୁଣା କଟକ ଥାନା ଅନ୍ତର୍ଗତ ଜିରାଡ ଗ୍ରାମର ଆନନ୍ଦ ସ୍ବାଇଁ ଓ ବିଭୀଷଣ ସ୍ବାଇଁ ଦୁଇ ଭାଇ। ଜମିବାଡିକୁ କେନ୍ଦ୍ର କରି ଦୁଇ ପରିବାର ମଧ୍ୟରେ ଗଣ୍ଡଗୋଳ ଲାଗି ରହିଥିଲା। ଆନନ୍ଦଙ୍କ ଦୁଇ ପୁଅ ଅଚ୍ୟୁତ ଓ ବାବୁଲା ପ୍ରତିଶୋଧ ନେବାକୁ ସୁଯୋଗ ଖୋଜୁଥିଲେ। ଗତ ୭ା୭ା୧୮ରେ ବାବୁଲାର ମାମୁଁ ପୁଅ ଭାଇ ବୌଦ୍ଧ ଥାନା ସରସରା ଗ୍ରାମର ପ୍ରଫୁଲ ସ୍ବାଇଁ ଜିରାଡ ଗ୍ରାମକୁ ଆସି ବିଭୀଷଣଙ୍କୁ ଏକ ମୋଟର ସାଇକେଲରେ ବସାଇ ବାବୁଲା ଘରକୁ ନେଇଥିଲେ । ସମସ୍ତେ ବାବୁଲା ଘରେ ମିଶି ଖାଇବା ପରେ ଝଗଡା ହୋଇଥିଲା। ଝଗଡା ସମୟରେ ବିଭୀଷଣ ପ୍ରଥମେ ଏକ ଲୁହାରେ ବାବୁଲାଙ୍କ ମୁଣ୍ଡକୁ ଆକ୍ରମଣ କରିଥିଲେ। ଏହାପରେ ସମସ୍ତ ଅଭିଯୁକ୍ତ ଆନନ୍ଦ ସ୍ବାଇଁ, ପ୍ରଫୁଲ ସ୍ବାଇଁ , ବାବୁଲା ସ୍ବାଇଁ ଓ ଅଚ୍ୟୁତ ସ୍ବାଇଁ ବିଭୀଷଣକୁ ଧରି ପକାଇଥିଲେ। ଏହାର ସୁଯୋଗ ନେଇ ଅଭିଯୁକ୍ତ ଅଚ୍ୟୁତ ଏକ ଟାଙ୍ଗିଆରେ କାକା ବିଭୀଷଣଙ୍କ ମୁଣ୍ଡକୁ ଆକ୍ରମଣ କରିଥିଲା। ଅନ୍ୟ ଅଭିଯୁକ୍ତମାନେ ମଧ୍ୟ ଲଙ୍ଗଳ ଲୁହାରେ ମାଡ ମାରିବା ଫଳରେ ବିଭୀଷଣ ଗୁରୁତର ହୋଇ ପଡିଥିଲେ। ଏହି ସମୟରେ ବିଭୀଷଣଙ୍କ ସ୍ତ୍ରୀ ରୁନୁ ସ୍ବାଇଁ ଓ ଝିଅ ଲକ୍ଷ୍ମୀ ଉଦ୍ଧାର କରିବାକୁ ଆସିଥିବା ବେଳେ ଅଭିଯୁକ୍ତମାନେ ସେମାନଙ୍କୁ ମାଡ ମାରିଥିବା ଅଭିଯୋଗ ହୋଇଛି। ପରେ ପରିବାର ଲୋକ ୧୦୮ ଆମ୍ବୁଲାନ୍ସ ଯୋଗେ ଆହତ ବିଭୀଷଣକୁ ବୌଦ୍ଧ ମେଡିକାଲ ଚିକତ୍ସା ପାଇଁ ନେଇଥିବା ବେଳେ ସେଠାରେ ତାଙ୍କର ମୃତ୍ୟୁ ଘଟିଥିଲା। ଏନେଇ ଉକ୍ତ ଦିନ ବିଭୀଷଣଙ୍କ ସ୍ତ୍ରୀ ରୁନୁ ପୁରୁଣାକଟକ ଥାନାରେ ଲିଖିତ ଅଭିଯୋଗ କରିଥିେଇ। ଅଭିଯୋଗ ପରେ ପୁରୁଣାକଟକ ଥାନା ପୋଲିସ ନଂ ୭୧/୧୮ରେ ଏକ ହତ୍ୟା ମାମଲା ରୁଜୁ କରି ତଦନ୍ତ ଆରମ୍ଭ କରିଥିଲା। ଏହି ଘଟଣାରେ ପୋଲିସ ଅଭିଯୁକ୍ତ ପ୍ରଫୁଲ ସ୍ବାଇଁ (୫୫), ଆନନ୍ଦ ସ୍ବାଇଁ (୭୮) ଅଚ୍ୟୁତ ସ୍ବାଇଁ (୩୫) ଓ ବାବୁଲା ସ୍ବାଇଁ (୩୭)ଙ୍କୁ ଗତ ୯ା୭ା୨୦୧୮ରେ ଗିରଫ କରି କୋର୍ଟ ଚାଲାଣ କରିଥିଲା। ପରବର୍ତ୍ତୀ ସମୟରେ ଏହି ମାମଲା ଜିଲା ଦୌରାଜଜ୍ଙ୍କ ଅଦାଲତରେ (ଏସଟି ୮୫/୧୮) ରେ ବିଚାର ହୋଇଥିଲା। ସରକାରଙ୍କ ପକ୍ଷରୁ ୨୩ ଜଣ ସାକ୍ଷୀଙ୍କ ବୟାନକୁ ଭିତ୍ତି କରି ପ୍ରମାଣ ଥିବା ନେଇ ଅଦାଲତ ଅଭିଯୁକ୍ତ ଦୁଇ ପୁତୁରା ଅଚ୍ୟୁତ ସ୍ବାଇଁ ଓ ବାବୁଲା ସ୍ବାଇଁକୁ ଆଜୀବନ କାରାଦଣ୍ଡରେ ଦଣ୍ଡିତ କରିବା ସହ ୧୦ ହଜାର ଟଙ୍କା ଜରିମାନା ଆଦେଶ ପ୍ରଦାନ କରିଛନ୍ତି। ତେବେ ଭାଇ ଆନନ୍ଦ ସ୍ବାଇଁ ଓ ଭଣଜା ପ୍ରଫୁଲ ସ୍ବାଇଁଙ୍କୁ ପ୍ରମାଣ ଅଭାବରୁ ନିଦ୍ଦୋର୍ଷରେ ଖଲାସକରିଛନ୍ତି। ସରକାରଙ୍କ ପକ୍ଷରୁ ଏହି ମାମଲାକୁ ସରକାରୀ ଓକିଲ ସବିତା କୁମାରୀ ପଣ୍ଡା ପରିଚାଳନା କରିଥିଲେ।