ବରପାଲି,୨।୪(ଡି.ଏନ୍.ଏ.): ବରଗଡ଼ ଜିଲା ବରପାଲି ଥାନା ଅଧୀନ ଚିନାଜୁରି ନିକଟସ୍ଥ କଦଳୀମୁଣ୍ଡା ଗ୍ରାମରେ ରବିବାର ଏକ ଅଭାବନୀୟ ଘଟଣା ଘଟିଛି। ଗ୍ରାମର ଗଙ୍ଗାଜଳ ମେହେରଙ୍କୁ ପୁଅ ବିକ୍ରମ ଗୁଳିମାଡ଼ କରିବାରୁ ସେ ଆହତ ହୋଇଛନ୍ତି।
ଆହତ ଗଙ୍ଗାଜଳଙ୍କୁ ପ୍ରଥମେ ଡୁଙ୍ଗୁରିପାଲି ସ୍ବାସ୍ଥ୍ୟକେନ୍ଦ୍ରରେ ପ୍ରାଥମିକ ଚିକିତ୍ସା ପରେ ବୁର୍ଲା ଡାକ୍ତରଖାନାରେ ଭର୍ତ୍ତି କରାଯାଇଛି। ଗଙ୍ଗାଜଳଙ୍କ ସ୍ତ୍ରୀ ରଜନୀଙ୍କ ଏତଲାକ୍ରମେ ବରପାଲି ପୋଲିସ ଏକ ମାମଲା(ନଂ.୧୧୮/୨୩)ରୁଜୁକରି ଅଭିଯୁକ୍ତ ପୁଅ ବିକ୍ରମଙ୍କୁ ଗିରଫ କରିଛି। ଏପରି କି ପୋଲିସ ଘଟଣାରେ ବ୍ୟବହୃତ ବନ୍ଧୁକକୁ ମଧ୍ୟ ଜବତ କରିଛି।
ମିଳିଥିବା ସୂଚନା ମୁତାବକ, ବିକ୍ରମ ଏବଂ ତାଙ୍କ ସ୍ତ୍ରୀ ଲକ୍ଷ୍ମୀଙ୍କ ମଧ୍ୟରେ କୌଣସି କାରଣକୁ ନେଇ ପାଟିତୁଣ୍ଡ ହୋଇଥିଲା। ହେଲେ ବାପା ଗଙ୍ଗାଜଳ ପୁଅ ବିକ୍ରମଙ୍କୁ ସେଥିରୁ ନିବୃତ୍ତ ରହିବାକୁ କହିଥିଲେ। ଏଥିରେ ସେ ରାଗିଯାଇ ଏକ ବନ୍ଧୁକ ବାହାରକରି ବାପାଙ୍କ ଉପରକୁ ଗୁଳି ଚଳାଇଥିଲେ। ଗୁଳିଟି ଗଙ୍ଗାଜଳଙ୍କ ପଛପଟେ ଅଣ୍ଟାତଳେ ବାଜିଥିଲା। ପ୍ରବଳ ରକ୍ତସ୍ରାବ ହେବାରୁ ତାଙ୍କୁ ତୁରନ୍ତ ଡୁଙ୍ଗୁରିପାଲି ସରକାରୀ ଡାକ୍ତରଖାନାକୁ ନିଆଯାଇଥିଲା। ସେଠାରେ ପ୍ରାଥମିକ ଚିକିତ୍ସା ପରେ ତାଙ୍କୁ ବୁର୍ଲା ଡାକ୍ତରଖାନା ସ୍ଥାନାନ୍ତର କରାଯାଇଛି। ବରପାଲି ଥାନା ଆଇଆଇସି ସବିତାଲତା ସେଠୀ ଘଟଣାର ତଦନ୍ତ କରୁଛନ୍ତି।