ବାସୁଦେବପୁର,୨୪।୧୨(ଡି.ଏନ.ଏ.): ଭଦ୍ରକ ଜିଲା ବାସୁଦେବପୁର ଥାନା ଅଧୀନ ମୁଖ୍ୟ ସହରସ୍ଥିତ କଲେଜ ରୋଡ୍ରୁ ଗତ ୧୬ ତାରିଖ ରାତିରେ ଚନ୍ଦନ ଜୁଏଲେରୀ ଓ ୱାର୍କସପ୍ରୁ ଚୋରି ହୋଇଥିଲା। ସପ୍ତାହ ପରେ ବାସୁଦେବପୁର ପୋଲିସ ଚୋରି ଘଟଣାର ପର୍ଦ୍ଦାଫାଶ କରିଛି। ଏହି ଘଟଣାରେ ପୋଲିସ ୨ ଯୁବକଙ୍କୁ ଗିରଫ କରିଛି। ସେମାନେ ହେଲେ ଚୋରି କରିଥିବା ବିଦେଇପୁର ଗ୍ରାମର ସତ୍ୟଜିତ ମଲିକ ଓ ଚୋରି ସାମଗ୍ରୀ ରଖିଥିବା ସାନକୃଷ୍ଣପୁର ପଞ୍ଚାୟତର କୋଡ଼ିଏଚେନ ଗ୍ରାମର ନନ୍ଦୁ ଜେନା। ସେମାନଙ୍କଠାରୁ ଦେଢ଼ କିଲୋରୁ ଊର୍ଦ୍ଧ୍ୱ ରୁପା ଅଳଙ୍କାର ଓ ଦୁଇଟି ସୁନାଚେନ, ୧୨ ସୁନା ଲକେଟ ଓ ସୁନା ଚିତା ଜବତ କରାଯାଇଥିବା ଶୁକ୍ରବାର ଅପରାହ୍ନରେ ବାସୁଦେବପୁର ଥାନାରେ ଏକ ଖବରଦାତା ସମ୍ମିଳନୀରେ ସିଟି ଡିଏସ୍ପି ଅଂଶୁମାନ ଦ୍ୱିବେଦୀ କହିଛନ୍ତି। ଆଇଆଇସି ସାବିତ୍ରୀ ପଣ୍ଡା ଚୋରି ଓ ଚୋରି ସାମଗ୍ରୀ ଉଦ୍ଧାର ସମ୍ପର୍କରେ ସୂଚନା ଦେଇଥିଲେ। ଅନ୍ୟ ଜଣେ ଅଭିଯୁକ୍ତ ଫେରାର ଅଛନ୍ତି। ସୁନା ଦୋକାନ ମାଲିକ ବାପୁନୁ ଖଟୁଆଙ୍କ ଅଭିଯୋଗକ୍ରମେ ବାସୁଦେବପୁର ଥାନାରେ ମାମଲା (ନଂ. ୫୮୮/୨୨) ରୁଜୁ ହୋଇଛି।
ସୂଚନା ଅନୁଯାୟୀ, କିଛିମାସ ତଳେ ଏକ ଚୋରି ଘଟଣାରେ ସତ୍ୟଜିତ ଗିରଫ ହୋଇ ଜେଲରେ ଥିବାବେଳେ ସେଠାରେ ନନ୍ଦୁଙ୍କ ସହ ସାକ୍ଷାତ ହୋଇଥିଲା। ନନ୍ଦୁ ନିଜ ପତ୍ନୀ ମୃତ୍ୟୁ ମାମଲାରେ ଜେଲରେ ଥିଲେ। କିଛିଦିନ ପୂର୍ବେ ଉଭୟ ଜେଲରୁ ମୁକୁଳିଥିଲେ। ଗତ ୧୬ ତାରିଖ ରାତିରେ ସତ୍ୟଜିତ ଓ ତାଙ୍କର ଜଣେ ସହଯୋଗୀ ଉକ୍ତ ଗହଣା ଦୋକାନରୁ ଚୋରି କରି ନନ୍ଦୁଙ୍କ ପାଖରେ ଲୁଚାଇ ରଖିଥିଲେ। ଚୋରିର ଦିନକ ପୂର୍ବରୁ ସତ୍ୟଜିତ ଏକ ଜ୍ୟାକେଟ ପିନ୍ଧି ସୁନା ଦୋକାନକୁ ଯାଇଥିଲେ। ପରଦିନ ଚୋରି ହୋଇଥିଲା। ସିସିଟିଭି ଫୁଟେଜ ଆଧାରରେ ସତ୍ୟଜିତ ପିନ୍ଧିଥିବା ଜ୍ୟାକେଟର ୩ଟି ନାଲିଗାରକୁ ପୋଲିସ ଚିହ୍ନଟ କରି ତାଙ୍କ ଘରେ ଚଢ଼ାଉ ପୂର୍ବକ ଧରିଥିଲା।