ଜବଲପୁର,୧୩।୪: ଏବେ ସୋସିଆଲ୍ ମିଡ଼ିଆରେ ଏକ ଭିଡ଼ିଓ ଭାଇରାଲ ହେବାରେ ଲାଗିଛି। କରୋନା ପଜିଟିିଭ୍ ଏବଂ କରୋନା ନେଗେଟିଭ୍ ଦୁଇ ଅଭିଯୁକ୍ତଙ୍କୁ ଜଣେ ପୋଲିସ ବାବୁ ପିପିଇ କିଟ୍ ପିନ୍ଧି ବାନ୍ଧି ନେଉଥିବାର ଦୃଶ୍ୟ ଭିଡ଼ିଓରେ ରହିଛି। ସେମାନଙ୍କ ବିରୋଧରେ ଚୋରି ଅଭିଯୋଗ ହୋଇଥିଲା। ହ୍ୟାଣ୍ଡକଫ୍ରେ ଦୁଇ ଚୋର ରାସ୍ତାରେ ଚାଲି ଚାଲି ଆଗରେ ଯାଉଥିବାବେଳେ ପୋଲିସ ବାବୁ ପିପିଇ କିଟ୍ ପିନ୍ଧି ପଛରେ ଆସୁଥିବା ଦେଖିବାକୁ ମିଳୁଛି। ଘଟଣାଟି ମଧ୍ୟପ୍ରଦେଶର ଜବଲପୁରରେ ଘଟିଛି। ସ୍ଥାନୀୟ ଜିଆର୍ପି ଥାନା ପକ୍ଷରୁ ଏଭଳି କରାଯାଇଛି। ଭିଡ଼ିଓ ଭାଇରାଲ ହେବା ପରେ ଜିଆରପିର ଉଚ୍ଚ ଅଧିକାରୀଙ୍କ ଅକଲ ଗୁଡୁମ୍ ହୋଇଯାଇଛି। ଅଭିଯୁକ୍ତମାନଙ୍କୁ କାହିଁକି ରାସ୍ତାରେ ଚଳାଇ ଚଳାଇ ନିଆଯାଉଥିଲା ସେ ନେଇ ଜବାବ ତଲବ କରାଯାଇଛି। ଜିଆରପି ପୋଲିସ ପକ୍ଷରୁ କୁହାଯାଇଛି ଯେ, ରାସ୍ତାରେ ଗାଡ଼ି ଖରାପ ହୋଇଯାଇଥିବାରୁ ଏଭଳି ଘଟିଛି। କୋର୍ଟଙ୍କ ନିର୍ଦ୍ଦେଶ ପରେ ଦୁଇ ଅଭିଯୁକ୍ତଙ୍କ ନମୁନା ପରୀକ୍ଷା ହୋଇଥିଲା। ସେଥିମଧ୍ୟରୁ ଜଣଙ୍କ ରିପୋର୍ଟ କରୋନା ପଜିଟିଭ୍ ଆସିଥିବାବେଳେ ଅନ୍ୟ ଜଣଙ୍କ ରିପୋର୍ଟ ନେଭେଟିଭ୍ ଆସିଥିଲା। ଦୁହିଁଙ୍କୁ ଗୋଟିଏ ହ୍ୟାଣ୍ଡକଫ୍ରେ ବାନ୍ଧି ଦିଆଯାଇ ରାସ୍ତାରେ ଚଳାଇ ଚଲାଇ ଜେଲକୁ ନିଆଯାଇଥିଲା। ଏହାର ୫୪ ସେକେଣ୍ଡର ଏକ ଭିଡ଼ିଓ ସୋସିଆଲ ମିଡ଼ିଆରେ ଅପଲୋଡ୍ କରାଯାଇଛି।