ଗୌଂଡା ,୧୩ ।୧୦: ଉତ୍ତର ପ୍ରଦେଶର ଆଇନ ବ୍ୟବସ୍ଥାକୁ ନେଇ ବାରମ୍ବାର ବିରୋଧି ଓ ଶାସକ ମଧ୍ୟରେ କଥା କଟାକଟି ଚାଲିଥିବା ବେଳେ ଏଠାରେ କିନ୍ତୁ ଅପରାଧ ଯେମିତି କମିବାର ନାଁ ନେଉନି । ସୋମବାର ଶୋଇଥିବା ଅବସ୍ଥାରେ ୩ ଭଉଣୀଙ୍କ ଉପରେ ଏସିଡ ମାଡ ଘଟଣା ଏବେ ପୁଣି ଚର୍ଚ୍ଚାକୁ ଆସିଛି । ମିଳିଥିବା ସୂଚନାରୁ ଜଣାପଡିଛି କି, ଉତ୍ତର ପ୍ରଦେଶ ଗୌଂଡା ଜିଲାରେ ସୋମବାର ରାତିରେ ଗୋଟିଏ ପରିବାରର ୩ ଭଉଣୀ ଛାତ ଉପରେ ଶୋଇଥିଲେ । ଏହି ସମୟରେ ଜଣେ ଯୁବକ ଛାତକୁ ଚଢି ବଡ ଭଉଣୀ ଉପରକୁ ଏସିଡ୍ ମାଡ କରିଥିଲେ । ଫଳରେ ପାଖରେ ଥିବା ଅନ୍ୟ ଦୁଇ ଭଉଣୀ ମଧ୍ୟ ଏଥିରେ ଆହତ ହୋଇଥିଲେ । ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ଯାଞ୍ଚ ଆରମ୍ଭ କରିଛି । ଆହତ ଭଉଣୀମାନଙ୍କର ଏବେ ହସ୍ପିଟାଲରେ ଚିକିତ୍ସା ଚାଲିଥିବା ବେଳେ ଜଣଙ୍କ ଅବସ୍ଥା ସଙ୍କଟାପନ୍ନ ଥିବା କୁହାଯାଉଛି । ପରସପୁର ଥାନା ଅଧିନ ପସକା ଗାଁର ବାସିନ୍ଦା ଗୁରଇ ପ୍ରସାଦଙ୍କ ତିନି ଝିଅଙ୍କ ଉପରେ ଏହି ଆକ୍ରମଣ ହୋଇଥିବା ଜଣାପଡିଛି । ପିଲାମାନଙ୍କର ବୟସ ଯଥାକ୍ରମେ ୧୯, ୭ ଓ ୫ ବୋଲି ଜଣାପଡିଛି ।
