ନୂଆଦିଲ୍ଲୀ,୩।୩:ଆକ୍ସିସ୍ ବ୍ୟାଙ୍କ ପକ୍ଷରୁ ସିଟି ବ୍ୟାଙ୍କ ଇଣ୍ଡିଆର କଞ୍ଜ୍ୟୁମର ବ୍ୟବସାୟର ଅଧିଗ୍ରହଣ ପ୍ରକ୍ରିୟା ସମାପନ କରାଯାଇଛି। ବିଶେଷକରି ସିସିଆଇ ଅନୁମୋଦନ ମିଳିବାର ୭ ମାସ ମଧ୍ୟରେ ଉକ୍ତ ବୁଝାମଣାକୁ କାର୍ଯ୍ୟକାରୀ କରି ଆକ୍ସିସ୍ ବ୍ୟାଙ୍କ ତା’ର କାର୍ଯ୍ୟକାରିତା ଦୃଢ଼ତାକୁ ପ୍ରଦର୍ଶନ କରିଛି। ଏପରିକି ସିଟିବ୍ୟାଙ୍କ ଇଣ୍ଡିଆର କଞ୍ଜ୍ୟୁମର ବ୍ୟବସାୟକୁ ଆକ୍ସିସ୍ ବ୍ୟାଙ୍କ ପ୍ରାୟ ୧୧,୬୦୩ କୋଟି ଟଙ୍କାରେ କିଣିଥିଲା। ଫଳରେ ସିଟିବ୍ୟାଙ୍କ ଇଣ୍ଡିଆର ଋଣ, କ୍ରେଡିଟ୍ କାର୍ଡ, ସମ୍ପତ୍ତି ପରିଚାଳନା ଓ ରିଟେଲ୍ ବ୍ୟାଙ୍କିଙ୍ଗ୍ ବ୍ୟବସାୟକୁ ଆକ୍ସିସ୍ ବ୍ୟାଙ୍କ ଅଧିଗ୍ରହଣ କରିଛି। ଏଥିରେ ସିଟି ବ୍ୟାଙ୍କର ଅଣବ୍ୟାଙ୍କିଙ୍ଗ୍ ଆର୍ଥିକ କମ୍ପାନୀ ସିଟିକର୍ପ ଫାଇନାନ୍ସ ଇଣ୍ଡିଆ ଲିମିଟେଡ୍ର ବ୍ୟବସାୟ ମଧ୍ୟ ସାମିଲ ରହିଛି। ଉକ୍ତ ସଂସ୍ଥା କମର୍ସିଆଲ ଯାନ, ନିର୍ମାଣ ଉପକରଣ ଋଣ ଏବଂ ବ୍ୟକ୍ତିଗତ ଋଣ ଆଦି ପ୍ରଦାନ କରୁଛି।
ଏ ସମ୍ପର୍କରେ ଆକ୍ସିସ୍ ବ୍ୟାଙ୍କର ଏମ୍ଡି ଓ ସିଇଓ ଅମିତାଭ ଚୌଧୁରୀ କହିଛନ୍ତି, ଏହି ଅଧିଗ୍ରହଣ ଆମ ବ୍ୟବସାୟର ଅଭିବୃଦ୍ଧି ଘଟାଇବ। ଏପରିକି ପ୍ରଥମ ପର୍ଯ୍ୟାୟ ସମନ୍ବୟ ଶେଷ ହେବା ସହ ଆମେ ସିଟିବ୍ୟାଙ୍କର ୨.୪ ନିୟୁତରୁ ଅଧିକ ଗ୍ରାହକ ଏବଂ ୩୨୦୦ କର୍ମଚାରୀଙ୍କୁ ଆମ ଆକ୍ସିସ୍ ପରିବାର ଦିଲ୍ସେକୁ ସ୍ବାଗତ କରୁଛୁ। ବିଶେଷକରି ବ୍ୟାଙ୍କିଙ୍ଗ୍ ଶିଳ୍ପରେ ଅଭିବୃଦ୍ଧି ଓ ଅଗ୍ରଣୀ ସ୍ଥାନକୁ ଆକ୍ସିସ୍ର ଯାତ୍ରାରେ ଏହା ଏକ ଗୁରୁତ୍ୱପୂର୍ଣ୍ଣ ମାଇଲଖୁଣ୍ଟ ହେବ। ଏପରିକି ଏହା ସହ ଜଡ଼ିତ ଥିବା ସମସ୍ତ ଅଂଶୀଦାରଙ୍କୁ ମଧ୍ୟ ଶ୍ରେଷ୍ଠ ମୂଲ୍ୟ ପ୍ରଦାନ କରିବ।
