ଭୁବନେଶ୍ୱର,୨୩।୩(ବ୍ୟୁରୋ): ରାଜଧାନୀରେ ଶାନ୍ତିଶୃଙ୍ଖଳାର ସହ ପୌର ନିର୍ବାଚନ ସମ୍ପନ୍ନ ନିମନ୍ତେ ମଡେଲ କୋଡ୍ ଅଫ କଣ୍ଡକ୍ଟ ଲାଗୁ ହେବା ପରେ ଭୁବନେଶ୍ୱର ସହରାଞ୍ଚଳ ପୋଲିସ ଜିଲା ତରଫରୁ ସ୍ପେଶାଲ ଏନଫୋର୍ସମେଣ୍ଟ ଡ୍ରାଇଭ ଆରମ୍ଭ ହୋଇଛି। ଫେବୃୟାରୀ ୫ରୁ ଏହି ଡ୍ରାଇଭ ଆରମ୍ଭ ହୋଇଥିବାବେଳେ ପୌର ନିର୍ବାଚନ ଶେଷ ପର୍ଯ୍ୟନ୍ତ ଚାଲିବ। ଫେବୃୟାରୀ ୨୫ରୁ ମାର୍ଚ୍ଚ ୧୦ ତାରିଖ ମଧ୍ୟରେ ନିର୍ବାଚନୀ ହିଂସାକୁ ନେଇ ୭ଟି ମାମଲା ରୁଜୁ କରାଯାଇଛି। ସେଥିମଧ୍ୟରୁ ଲକ୍ଷ୍ମୀସାଗର ଥାନାରେ ୪ଟି ମାମଲା ରହିଛି। ମାର୍ଚ୍ଚ ୧୫ରେ ଗୋଟିଏ ମାମଲା ରୁଜୁ ହୋଇଛି। ମାର୍ଚ୍ଚ ୧୪ ଓ ୧୮ରେ ବଡ଼ଗଡ଼ ଥାନା ଓ ନୟାପଲ୍ଲୀ ଥାନାରେ ୨ଟି ମାମଲା ରୁଜୁ କରାଯାଇଛି। ମାର୍ଚ୍ଚ ୧୧ରୁ ୨୧ତାରିଖ ମଧ୍ୟରେ ୨୫ଟି ୱାରେଣ୍ଟ କାର୍ଯ୍ୟକାରୀ କରାଯିବା ସହ ୩୬ଟି ୱାରେଣ୍ଟକୁ କୋର୍ଟଙ୍କୁ ହସ୍ତାନ୍ତର କରାଯାଇଛି। ୩୬ଟି ମାମଲାରେ ଶାନ୍ତି ଭଙ୍ଗକାରୀ ବ୍ୟକ୍ତିଙ୍କ ବିରୋଧରେ ୧୦୭ ସିଆର୍ପିସି ଏବଂ ୧୨ ଅଭ୍ୟାସଗତ ଅପରାଧୀଙ୍କ ବିରୋଧରେ ୧୧୦ ସିଆର୍ପିସି ଅନୁଯାୟୀ ଆଇନଗତ କାର୍ଯ୍ୟାନୁଷ୍ଠାନ ନିଆଯାଇଛି। ୧୧୧ଟି ବେଆଇନ ମଦ କାରବାର ବିରୋଧରେ ମାମଲା ରୁଜୁ ସହ ୭୨ଜଣଙ୍କୁ ଗିରଫ କରାଯାଇଛି। ମାର୍ଚ୍ଚ ୧୧ରୁ ଏଯାବତ ୨୯୯. ୬୭ ଲିଟର ନକଲି ଦେଶୀ ମଦ ଏବଂ ୧ କ୍ୱିଇଣ୍ଟାଲରୁ ଊର୍ଦ୍ଧ୍ୱ ଗଞ୍ଜେଇ ଜବତ କରାଯାଇଛି।
ସୂଚନାନୁଯାୟୀ, ଫେବୃୟାରୀ ୨୫ରୁ ମାର୍ଚ୍ଚ ୯ ତାରିଖ ମଧ୍ୟରେ ୩ଟି ନିର୍ବାଚନୀ ହିଂସାଜନିତ ମାମଲା ରୁଜୁ କରାଯାଇଛି। ୧୫ଟି ୱାରେଣ୍ଟ କାର୍ଯ୍ୟକାରୀ କରାଯିବା ସହ ୨୫ଟି ୱାରେଣ୍ଟକୁ କୋର୍ଟଙ୍କୁ ହସ୍ତାନ୍ତର କରାଯାଇଛି। ସେହିଭଳି ୫ଟି ମାମଲାରେ ଶାନ୍ତି ଭଙ୍ଗକାରୀ ବ୍ୟକ୍ତିଙ୍କ ବିରୋଧରେ ୧୦୭ ସିଆର୍ପିସି ଏବଂ ୫ ଅଭ୍ୟାସଗତ ଅପରାଧୀଙ୍କ ବିରୋଧରେ ୧୧୦ ସିଆର୍ପିସି ଅନୁଯାୟୀ କାର୍ଯ୍ୟାନୁଷ୍ଠାନ ହୋଇଛି। ଏଥିସହ ୯୨ଟି ବେଆଇନ ମଦ କାରବାର ବିରୋଧରେ ମାମଲା ରୁଜୁ କରାଯାଇ ୭୪ ଜଣଙ୍କୁ ଗିରଫ କରାଯାଇଥିବା ବେଳେ ୧୧ ଜଣଙ୍କୁ ୪୧ ସିଆରପିସି ଅନୁଯାୟୀ ନୋଟିସ କରାଯାଇଛି। ଫେବୃୟାରୀ ୨୫ରୁ ମାର୍ଚ୍ଚ ୧୦ ମଧ୍ୟରେ ୧୪୪୬.୨୨ ଲିଟର ଦେଶୀମଦ, ୪୦୮.୨୦୫ ଲିଟର ବିଦେଶୀ ମଦ ଏବଂ ୬୦୯. ୩୫ ଲିଟର ନକଲି ଦେଶୀ ମଦ ଜବତ ହୋଇଛି। ଲକ୍ଷ୍ମୀସାଗର ଥାନା ଓ ତମାଣ୍ଡୋ ଥାନା ଦ୍ୱାରା ୧୬ ଗ୍ରାମ ବ୍ରାଉନସୁଗାର ଓ ୯୪ କେଜି ଗଞ୍ଜେଇ ଜବତ କରାଯାଇଛି।