ବ୍ରହ୍ମପୁର ଅଫିସ,୭।୧୨:ବ୍ରହ୍ମପୁର ମହାନଗର ନିଗମ (ବିଇଏମ୍ସି)ର ବିନା ପ୍ଲାନ ଆପ୍ରୁଭାଲରେ ସହର ମଧ୍ୟରେ ଶତାଧିକ କୋଠା ଗଢିଉଠିଛି। ଏଥିମଧ୍ୟରେ ସପିଂ ମଲ, ଆପାର୍ଟମେଣ୍ଟ୍, ହୋଟେଲ ଭଳି ବଡ଼ ବଡ଼ କୋଠା ରହିଛି। ଅନେକସ୍ଥାନରେ ପାର୍କିଂ ସ୍ଥଳ ନ ଥିବା ଦେଖିବାକୁ ମିଳିଛି। ବିଇଏମ୍ସି ଆପ୍ରୁଭାଲ ନିୟମକୁ ଉଲ୍ଲଂଘନ କରି କୋଠା ନିର୍ମାଣ କରାଯାଇଛି। ଏପରିକି ସହରର ଆବାସିକ ସ୍ଥାନରେ ବହୁ ତାଲା ବିଶିଷ୍ଟ ବାଣିଜି୍ୟକ କୋଠା ଗଢି ଉଠିଛି। ବର୍ତ୍ତମାନ ଏଭଳି ବେଆଇନ କୋଠା ନିର୍ମାଣ ନେଇ ବିଇଏମ୍ସିର ଦୃଷ୍ଟି ଗୋଚର ହେବା ପରେ ବିଏମଇସି ଆକ୍ସନ ମୁଡ଼ରେ ପଦକ୍ଷେପ ଗ୍ରହଣ କରିଛି। ଏ ନେଇ ବହୁ ବଡ଼ ବଡ଼ ଆପାର୍ଟମେଣ୍ଟ୍, ଶପିଂ ମଲ ଓ ହୋଟେଲ ମାଲିକଙ୍କ ମଧ୍ୟରେ ଛନକା ପଶିଛି। ନିଗମ ପକ୍ଷରୁ ଏଭଳି ବହୁ ବେଆଇନ କୋଠା ତାଲିକା ପ୍ରସ୍ତୁତ କରାଯାଇଛି। ମଙ୍ଗଳବାର ପ୍ରାୟ ୧୫୦ରୁ ଅଧିକ କୋଠା ମାଲିକଙ୍କୁ ନୋଟିସ କରାଯାଇଛି। ୧୫ ଦିନ ମଧ୍ୟରେ ଉତ୍ତର ଦେବା ପାଇଁ ନିର୍ଦ୍ଦେଶ ଦିଆଯିବ ବୋଲି କମିଶନର ଜେ.ସୋନାଲ ଖବରଦାତା ସମ୍ମିଳନୀରେ ସୂଚନା ଦେଇଛନ୍ତି। ସେ କହିଛନ୍ତି ଯେ, ଗତ କିଛି ଦିନ ତଳେ ବିଇଏମ୍ସି ରାଜସ୍ବ କ୍ଷତି ସମ୍ପର୍କରେ ସମୀକ୍ଷା କରାଯାଇଥିଲା। କୋଠା ନିର୍ମାଣ ଆପ୍ରୁଭାଲ ସଂଖ୍ୟା କମ ରହିଥିବା ସମୀକ୍ଷାରେ ଜଣାପଡିଥିଲା। ନିଗମ କମିଶନର ଓ ବରିଷ୍ଠ ଅଧିକାରୀମାନେ ସହରର ବିଭିନ୍ନ ସ୍ଥାନ ପରିଦର୍ଶନ କରି ବିନା ଅନୁମତିରେ ନିର୍ମିତ ହୋଇଥିବା କୋଠାକୁ ଚିହ୍ନଟ କରିଥିଲେ। ଏମାନଙ୍କ ମଧ୍ୟରୁ ଅନେକ କୋଠା ମାଲିକ ବିନା ଅକ୍ୟୁପେସନ ସାର୍ଟିଫିକେଟ ନେଇ ନ ଥିବା ଜଣାପଡିଥିଲା, ଯାହାକି ଓଡିଶା ଡେଭଲପମେଣ୍ଟ୍ ଅଥୋରିଟି ଆକ୍ଟର ବିଭିନ୍ନ ଧାରାକୁ ଉଲ୍ଲଘନ କରାଯାଉଥିବା କମିଶନର କହିଛନ୍ତି। କୋଠା ମାଲିକ କିଭଳି ଓ କେଉଁ ଆଧାରରେ ଏଭଳି କୋଠା ନିର୍ମାଣ କଲେ ଉତ୍ତର ରଖିବେ। ୧୫ ଦିନ ମଧ୍ୟରେ କୌଣସି ଉତ୍ତର ନ ଦେଲେ ବେଆଇନ କୋଠା ମାଲିକଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କମିଶନର ସୂଚନା ଦେଇଛନ୍ତି। ଏ ନେଇ ନିଗମ ପକ୍ଷରୁ ବ୍ରହ୍ମପୁର ଉପଜିଲାପାଳ, ତହସିଲଦାର, ବ୍ରହ୍ମପୁର ଏସପିଙ୍କୁ ମଧ୍ୟ ଅବଗତ କରାଯାଇଥିବା କମିଶନର କହିଛନ୍ତି।