ଢେଙ୍କାନାଳ,୧୭ା୧୦(ରତନ ନାୟାର): ଢେଙ୍କାନାଳର ପ୍ରସିଦ୍ଧ ଲକ୍ଷ୍ମୀପୂଜା ଆସନ୍ତା ୨୮ ତାରିଖରୁ ଆରମ୍ଭ ହେବ। ତେଣୁ ସହରରେ ହେବାକୁ ଥିବା ଶ୍ରଦ୍ଧାଳୁଙ୍କ ପ୍ରବଳ ଭିଡ଼କୁ ନଜରରେ ରଖି ଜିଲା ପୋଲିସ ପ୍ରଶାସନ ପକ୍ଷରୁ ଟ୍ରାଫିକ ଓ ଆଇନ ଶୃଙ୍ଖଳାର ସମୀକ୍ଷା କରାଯାଇଛି। ସହରସ୍ଥିତ ପୁରୁଣା ଜିଲା ପରିଷଦ ହଲ୍ଠାରେ ସୋମବାର ସନ୍ଧ୍ୟା ୬ଟାରେ
ଏ ନେଇ ଏକ ବୈଠକ ଅନୁଷ୍ଠିତ ହୋଇଥିଲା। ବୈଠକରେ ସଭାପତିତ୍ୱ କରି ଏସ୍ପି ଜ୍ଞାନରଞ୍ଜନ ମହାପାତ୍ର କହିଲେ, ପୂଜା ସମୟରେ ଟ୍ରାଫିକ ନିୟମକୁ ସମସ୍ତେ କଡ଼ାକଡ଼ି ଭାବେ ପାଳନ କଲେ କୌଣସି ସମସ୍ୟା ରହିବ ନାହିଁ । ଟ୍ରାଫିକ ପୋଷ୍ଟ ଗୁଡ଼ିକରେ କୌଣସି ସମସ୍ୟା ନ ଉପୁଜିବା ପାଇଁ ସ୍ଥାନୀୟ ଲୋକମାନେ ମଧ୍ୟ ସେଠାରେ ରହିବାକୁ ଏସ୍ପି ଅନୁରୋଧ କରିଥିଲେ। ଏଥିସହ ନିୟମ ଉଲ୍ଲଂଘନ କ୍ଷେତ୍ରରେ ଦୃଢ଼ କାର୍ଯ୍ୟାନୁଷ୍ଠା ନିଆଯିବ ବୋଲି ଏସ୍ପି କହିଥିଲେ।
ପୂଜା ସମୟରେ ଅଟୋ ଚାଳକମାନେ ଓଭରଲୋଡ୍ ନେବେ ନାହିଁ। ଲାଇଟ୍ ଗେଟ୍ଗୁଡିକ ନିକଟରେ ଭିଡକୁ ଆଡେଇବା ପାଇଁ ସ୍ବେଚ୍ଛାସେବୀଙ୍କୁ ରଖାଯିବ। ଅଡିଓ ସିଷ୍ଟମରେ ସଚେତନତା ବାର୍ତ୍ତା ଦିଆଯିବ। ପାର୍କିଂ ସ୍ଥାନଗୁଡିକ ପରିଦର୍ଶନ କରାଯିବା ପରେ ପୌରସଂସ୍ଥାଠାରୁ ଅନୁମତି ନିଆଯିିବ। ସ୍ଥାନୀୟ ଲୋକମାନେ ନିଜର ବନ୍ଧୁ ବାନ୍ଧବଙ୍କୁ ସନ୍ଧ୍ୟା ପୂର୍ବରୁ ପୂଜା ବୁଲି ଫେରି ଆସିବାକୁ ଅନୁରୋଧ କରିବାକୁ ଏସ୍ପି କହିଥିଲେ। ଅତ୍ୟଧିକ ମଦ୍ୟପପାନ କରିଥିବା ବ୍ୟକ୍ତିମାନଙ୍କୁ ଗିରଫ କରାଯିିବ। ପୂଜା ସମୟରେ ରାସ୍ତାଗୁଡିକୁ ୫ ଭାଗରେ ବିଭକ୍ତ କରାଯାଇଛି । କଲେଜ ବାଇପାସ୍, ବସଷ୍ଟାଣ୍ଡ, ପୂର୍ତ୍ତବିଭାଗ ଛକ, ମହାବୀର ବଜାର, ଦକ୍ଷିଣକାଳୀ ରୋଡ୍, ଶଙ୍କୁନ୍ତଳ ଛକ, ଜଗନ୍ନାଥ ରୋଡ୍, ଶାସନ ଛକ, କାଲଟାକ୍ସ ରୋଡ୍, କୋରିଆଁ ଛକ ରାସ୍ତା ନଂ.୧ରେ ଯାଉଛି। ରାସ୍ତା ନଂ.୨ରେ କୋରିଆଁ ଛକରୁ ଶାସନ ଛକ, ଜଗନ୍ନାଥ ହସ୍ପିଟାଲ, ସୂର୍ଯ୍ୟ ହୋଟେଲ, ଗାନ୍ଧୀ ମନ୍ଦିର, ବସ୍ଷ୍ଟାଣ୍ଡରୁ କଲେଜ ଛକ। ରାସ୍ତା ନଂ. ୩ରେ ଓଭରବ୍ରିଜ୍, ରେଳଷ୍ଟେଶନ ରୋଡ୍, କାଲଟାକ୍ସ ଛକରୁ କୋରିଆଁ ବାଇବାସ। ରାସ୍ତା ନଂ. ୪ରେ ଶଙ୍କରପୁର, ମହିଷାପାଟ ଛକ, କଣ୍ଟାନାଳୀ ଛକ, ବଉଳଛକ, ରାମଦାସ ଛକ, ବଳରାମ ମନ୍ଦିର, ରାଜବାଟୀ ଓ ବସ୍ଷ୍ଟାଣ୍ଡ ଟ୍ରାଫିକ ଛକ। ୫ନଂ.ରେ ତାରିଣୀ ଛକ, ମେଡିକାଲ ଛକ, ଦକ୍ଷିଣକାଳୀ, ଶକୁନ୍ତଳ ହୋଟେଲ ଓ ଜଗନ୍ନାଥ ରୋଡ୍ ଦେଇ ଯାନବାହାନ ଚଳାଚଳ କରିବ। ପୂଜା ସମୟରେ ଟ୍ରାଫିକ୍ ନିୟମ ମାନିବା ସହିତ ପୋଲିସ ଓ ପ୍ରଶାସନକୁ ସହଯୋଗ କରିବା ପାଇଁ ମିଳିତବଜାର ପୂଜା କମିଟି ସଭାପତି ଜ୍ଞାନେନ୍ଦ୍ର ବେହେରା ଆହ୍ବାନ ଦେଇଥିଲେ। ଢେଙ୍କାନାଳ ଲକ୍ଷ୍ମୀପୂଜା ସମ୍ପର୍କରେ ଅଭିଜ୍ଞତା ଥିବା ପୋଲିସ ଅଧିକାରୀ ଓ କର୍ମଚାରୀଙ୍କୁ ଦାୟିତ୍ୱ ପ୍ରଦାନ କରାଯିବା ଉପରେ ଜିଲା ଓକିଲ ସଂଘ ସଭାପତି ଗୋପାଳଚନ୍ଦ୍ର ପାତ୍ର ଗୁରୁତ୍ୱ ପ୍ରଦାନ କରିଥିଲେ। ପୌର ନିର୍ବାହୀ ଅଧିକାରୀ ଦେବୀ ପ୍ରସାଦ ରାଉତ ପୂଜା ପୂର୍ବରୁ ପୌରାଞ୍ଚଳର ସମସ୍ୟା ଉପରେ ଗୁରୁତ୍ୱ ଦିଆଯିିବ ବୋଲି କହିଥିଲେ। ଅତିରିକ୍ତ ଏସ୍ପି ଭବାନୀ ଶଙ୍କର ଉଦ୍ଗାତା ସ୍ବାଗତ ଭାଷଣ ପ୍ରଦାନ କରିଥିଲେ। ଏସ୍ଡିପିଓ ବିଭୂତି ଭୂଷଣ ମହାପାତ୍ର ଧନ୍ୟବାଦ ପ୍ରଦାନ କରିଥିଲେ। ଅତିରିକ୍ତ ଏସ୍ପି ସୂଯ୍ୟମଣି ପ୍ରଧାନ ଉପସ୍ଥିତ ଥିଲେ। ଡିଏସ୍ପି ହରପ୍ରିୟା ନାୟକ କାର୍ଯ୍ୟକ୍ରମ ସଂଯୋଜନା କରିଥିଲେ। ଟାଉନ ଥାନା ଅଧିକାରୀ ରାଜେନ୍ଦ୍ର ମହାପାତ୍ର ପରିଚାଳନାରେ ସହଯୋଗ କରିଥିଲେ।