ପୁରୀ, ୬।୬(ଅଜିତ୍ କୁମାର ମହାନ୍ତି): ଚଳିତ ସାଧାରଣ ନିର୍ବାଚନର ଫଳାଫଳ ପ୍ରକାଶ ପାଇବା ପରେ ବିଜୟୀ ହୋଇଥିବା ଅନେକ ନେତା ବୁଧବାର ପୁରୀ ଆସି ମହାପ୍ରଭୁଙ୍କ ଦର୍ଶନ କରିଛନ୍ତି। ପୁରୀ ଲୋକ ସଭା ଆସନର ଭାଜପା ପ୍ରାର୍ଥୀ ଡ. ସମ୍ବିତ ପାତ୍ର ବିଜୟୀ ହେବା ପରେ ଶ୍ରୀମନ୍ଦିର ଯାଇ ଶ୍ରୀବିଗ୍ରହମାନଙ୍କ ଦର୍ଶନ କରିଛନ୍ତି। ଏହାପରେ ସେ ଗଣମାଧ୍ୟମକୁ ସୂଚନା ଦେଇ କହିଛନ୍ତି, ମହାପ୍ରଭୁଙ୍କ ଆଶୀର୍ବାଦରୁ ଭାଜପା ପ୍ରାର୍ଥୀମାନେ ବିଜୟୀ ହୋଇଛନ୍ତି। ଓଡ଼ିଶାରେ ଯେଉଁ ପରିବର୍ତ୍ତନ ହୋଇଛି, ସେଥିପାଇଁ ମହାପ୍ରଭୁଙ୍କୁ ପ୍ରଣିପାତ ଜଣାଉଛି। ଆଗାମୀ ଦିନରେ ଦେଶ ଓ ରାଜ୍ୟର ବିକାଶ ହେବ। ସେହିପରି ଶ୍ରୀମନ୍ଦିର ଚାରିଦ୍ୱାର ଖୋଲାଯିବା ସହ ରତ୍ନଭଣ୍ଡାର ଚାବି କିପରି ମିଳିବ ସେଥିଲାଗି ପଦକ୍ଷେପ ନିଆଯିବ। ସେହିପରି ସତ୍ୟବାଦୀ ବିଧାନସଭା ଆସନରେ ବିଜୟ ହାସଲ କରିଥିବା ଭାଜପା ପ୍ରାର୍ଥୀ ଓମ୍ପ୍ରକାଶ ମିଶ୍ର ଶ୍ରୀମନ୍ଦିର ଯାଇ ମହାପ୍ରଭୁଙ୍କୁ ଦର୍ଶନ କରିଛନ୍ତି। ପରେ ସେ କହିଛନ୍ତି, ସ୍ବାଭିମାନୀ ସତ୍ୟବାଦୀବାସୀଙ୍କ ବିଜୟ ହୋଇଛି। ସତ୍ୟବାଦୀ ନିର୍ବାଚନମଣ୍ଡଳୀରେ ଅନେକ ସମସ୍ୟା ରହିଛି। କେନ୍ଦ୍ର ସରକାରଙ୍କ କେତେକ ଯୋଜନା ଓଡ଼ିଶାରେ କାର୍ଯ୍ୟକାରୀ କରାଯାଉ ନ ଥିଲା। ମାତ୍ର ଏବେ ଦେଶ ଓ ରାଜ୍ୟରେ ଡବଲ ଇଞ୍ଜିନ୍ ସରକାର ହେବାକୁ ଯାଉଛି। ଫଳରେ ରାଜ୍ୟର ବିକାଶ ହେବା ସହ ସତ୍ୟବାଦୀ ମାଟିର ସମସ୍ୟା ଦୂର ହୋଇପାରିବ। ସତ୍ୟବାଦୀର ଲୋକେ ମୋତେ ଦୃଦୟ ଖୋଲି ଭୋଟ ଦେଇ ବିଜୟୀ କରିଛନ୍ତି। ତେଣୁ ଆସନ୍ତା ୫ ବର୍ଷ ଏହି ମାଟି ପାଇଁ କାର୍ଯ୍ୟ କରିବି ବୋଲି ଓମ୍ ପ୍ରକାଶ କହିଛନ୍ତି। ସେହିପରି ଧାମନଗର ବିଧାନସଭା ଆସନରୁ ଜିତିଥିବା ଭାଜପାର ସୂରଜ ସୂର୍ଯ୍ୟବଂଶୀ ତାଙ୍କର କେତେଜଣ ସମର୍ଥକଙ୍କ ସହ ପୁରୀ ଆସି ଶ୍ରୀମନ୍ଦିର ଯାଇ ଚତୁର୍ଦ୍ଧାବିଗ୍ରହଙ୍କୁ ଦର୍ଶନ କରିଛନ୍ତି। ପରେ ସେ କହିଛନ୍ତି, ନିର୍ବାଚନରେ ବିଜୟୀ ହେବା ନେଇ ମହାପ୍ରଭୁଙ୍କ ଉପରେ ଦୃଢ଼ ବିଶ୍ୱାସ ଓ ଆସ୍ଥା ରହିଥିଲା। ଓଡ଼ିଶାରେ ଯେପରି ଅଣଓଡ଼ିଆ ଶକ୍ତି ତା’ର ଶକ୍ତି ବିସ୍ତାର କରିଥିଲା, ତା’ କବଳରୁ ଓଡ଼ିଶାବାସୀଙ୍କୁ ମହାପ୍ରଭୁ ମୁକ୍ତ କରିପାରିଛନ୍ତି। ମହାପ୍ରଭୁଙ୍କ ନିକଟରେ ସମର୍ପିତ ହେଲୁ। ଆଗାମୀ ଦିନ ପାଇଁ ଆଶୀର୍ବାଦ ନେଲୁ। ଲୋକଙ୍କୁ ଦେଇଥିବା କଥା ଯେପରି ରଖିପାରିବୁ ସେ ନେଇ ମହାପ୍ରଭୁ ଶକ୍ତି ସାମର୍ଥ୍ୟ ଦିଅନ୍ତୁ ବୋଲି ପ୍ରାର୍ଥନା କରିଲୁ। ଏହି ଜନାଦେଶର ମୁଖ୍ୟ ନାୟକ ହେଉଛନ୍ତି ମହାପ୍ରଭୁ ଶ୍ରୀଜଗନ୍ନାଥ। କେନ୍ଦ୍ରୀୟ ସଂସଦୀୟ ଦଳ ଯାହା ନିଷ୍ପତ୍ତି ନେବ, ତାହାକୁ ଗ୍ରହଣ କରାଯିବ।
