ଅନୁଗୋଳ ଅଫିସ, ୫।୧୦: ଆଇପିଏଲ୍ ସହ ଆରମ୍ଭ ହୋଇଛି ଫଟାଫଟ୍ କ୍ରିକେଟ୍ ଋତୁ। ଦୁବାଇରେ ହେଉଛି ଛକା, ଚୌକା ବର୍ଷା। କେତେବେଳେ ଲୋ ସ୍କୋରିଂ ତ ଆଉ କେତେବେଳେ ହାଇ ସ୍କୋରିଂ ମ୍ୟାଚ ଦର୍ଶକଙ୍କ ମଧ୍ୟରେ ରୋମାଞ୍ଚ ଭରୁଛି। ଦିନକୁ ଦିନ ମ୍ୟାଚ ଅଧିକ ଉତ୍କଣ୍ଠାପୂର୍ଣ୍ଣ ହେଉଥିବାରୁ ଏଥିରୁ ଫାଇଦା ଉଠାଇବାକୁ ସକ୍ରିୟ ହୋଇପଡ଼ିଛନ୍ତି ବେଟିଂ ର଼୍ୟାକେଟ୍। ଅନୁଗୋଳ ଜିଲାର ବିଭିନ୍ନ ସ୍ଥାନରେ ଏହି ଟୋଣ୍ଟି-୨୦ କ୍ରିକେଟ୍କୁ ନେଇ ଚାଲିଛି ଜୋରଦାର ବେଟିଂ ବା ଜୁଆ ଖେଳ। ମାତ୍ର କେଇ ମିନିଟ୍ ମଧ୍ୟରେ ପୁଳା ପୁଳା ଟଙ୍କା ରୋଜଗାର କରିବାର ନିଶା ଯୁବପିଢ଼ିଙ୍କୁ ଏହି ବେଟିଂ ର଼୍ୟାକେଟ୍ ଆଡକୁ ଆକର୍ଷିତ କରୁଛି। ହେଲେ ଏ ନେଇ ପୋଲିସକୁ କିଛି ବି ସଫଳତା ଏଯାଏ ମିଳିପାରି ନାହିଁ।
ସୂଚନା ଅନୁଯାୟୀ, ରାଜ୍ୟ ବାହାରୁ ଲମ୍ବିଥିବା ଏହି ବେଟିଂ ର଼୍ୟାକେଟ୍ର ଚେର ଏବେ ଅନୁଗୋଳ ଜିଲାରେ ସୁଦୃଢ଼ ହେବାରେ ଲାଗିଛି। ମୋବାଇଲ ଫୋନ୍ ଓ ଇଣ୍ଟରନେଟ୍ ଜରିଆରେ ଏହି ଜୁଆ ଖେଳାଯାଉଛି। ଆଇପିଏଲ୍ ଆରମ୍ଭର ୧୦/୧୫ ଦିନ ପୂର୍ବରୁ ଏହି ର଼୍ୟାକେଟ୍ ଏଠାରେ ଏଜେଣ୍ଟମାନଙ୍କୁ ନେଇ ସ୍ବତନ୍ତ୍ର ନେଟଓ୍ବର୍କ ସୃଷ୍ଟି କରିଛି। ମ୍ୟାଚ ଆରମ୍ଭ ପୂର୍ବରୁ ଓ ଚାଲିଥିବା ବେଳେ ପ୍ରତି ଓଭରକୁ ନେଇ ବାଜି ଲଗାଯାଉଛି। ବିଶେଷକରି ମ୍ୟାଚର ଶେଷ ଆଡ଼କୁ ଏହି ବେଟିଂରେ ଅଧିକ ଅର୍ଥ ଲଗାଯାଉଛି। କେଉଁ ଦଳ ପାଇଁ କେତେ ଟଙ୍କା ଲାଗିବ ତାହା ପୂର୍ବରୁ ସ୍ଥିର କରାଯାଉଛି। ଏ ନେଇ ଏଜେଣ୍ଟଙ୍କ ଜରିଆରେ ବେଟିଂ ପାଇଁ ଇଚ୍ଛୁକ ଗ୍ରାହକଙ୍କୁ ଜଣାଇ ଦିଆଯାଉଛି। ଜିତିଲେ ଦୁଇଗୁଣା କିମ୍ବା ତିନିଗୁଣା ଅର୍ଥ ଦିଆଯିବାର ପ୍ରଲୋଭନ ଦେଖାଇ ଯୁବ କ୍ରିକେଟ୍ ପ୍ରେମୀଙ୍କୁ ଫସାଯାଉଛି। ଯଦି କେହି ବାଜିରେ ହାରିଯାଉଛି ତା’ହେଲେ ସମ୍ପୃକ୍ତ ବ୍ୟକ୍ତିଙ୍କ ଠାରୁ ଟଙ୍କା ନେବାକୁ ପହଞ୍ଚତ୍ ଯାଉଛନ୍ତି ଏଜେଣ୍ଟ। ପ୍ରତିଶ୍ରୃତି ଅନୁଯାୟୀ ଟଙ୍କା ଦେଇଦେଲେ ଭଲ ନଚେତ ଏହା ବଦଳରେ ଗାଡ଼ି, ମୋବାଇଲ, ସୁନା ଅଳଙ୍କାର ଆଦି ସେମାନଙ୍କୁ ହରାଇବାକୁ ପଡ଼ୁଛି। ଏପରି କି ପ୍ରତିବାଦ କଲେ ଜୀବନରୁ ମାରି ଦେବାକୁ ଧମକ ଦିଆଯାଉଛି। ପୂର୍ବରୁ ଏହି ର଼୍ୟାକେଟ୍ କଟକ, ଭୁବନେଶ୍ୱର, ବ୍ରହ୍ମପୁର ଆଦି ସହରରେ ନିଜର କାୟା ବିସ୍ତାର କରିଥିବା ଦେଖିବାକୁ ମିଳୁଥିଲା। ପ୍ରତିବର୍ଷ ଆଇପିଏଲ୍ ଓ ବିଭିନ୍ନ ଟୋଣ୍ଟି-୨୦ ପ୍ରତିଯୋଗିତା ବେଳେ ସେଠାକାର ପୋଲିସ ଏପରି ବେଟିଂ ର଼୍ୟାକେଟର ପର୍ଦ୍ଦାଫାଶ କରୁଥିବା ଦେଖାଯାଉଥିଲା। କିନ୍ତୁ ଏବେ ଅନୁଗୋଳରେ ବେଟିଂ ର଼୍ୟାକେଟ୍ ଆସ୍ଥାନ ଜମାଇସାରିଛି। ତେବେ ଏହି ର଼୍ୟାକେଟ୍ ନିକଟରେ ପୋଲିସ ପହଞ୍ଚିପାରୁଛି କି ନାହିଁ ତାହା ଆଗାମୀ ଦିନରେ ହିଁ ଜଣାପଡ଼ିବ। ଏ ସମ୍ପର୍କରେ ଏସ୍ପି ଜଗମୋହନ ମୀନା କହିଛନ୍ତି, ଜିଲାର ସମସ୍ତ ଥାନାକୁ ଏ ନେଇ ନିର୍ଦ୍ଦେଶ ଦିଆଯିବ। ସେମାନେ ନିଜସ୍ବ ଗୋଇନ୍ଦା ଜରିଆରେ ଏହି କାରବାର ଉପରେ ନଜର ରଖିବା ସହ ର଼୍ୟାକେଟକୁ ଯେପରି ଧରିପାରିବେ ସେଥିପାଇଁ କୁହାଯିବ।