ମୁମ୍ବାଇ,୧୦।୨ : ବଲିଉଡ ଅଭିନେତା ବିଦ୍ୟୁତ ଜାମୱାଲଙ୍କ ବିଷୟରେ ଏକ ବଡ଼ ଖବର ଆସିଛି। ଏକ ନ୍ୟୁଜ ୱେବସାଇଟ ଅନୁଯାୟୀ ଏହି ଅଭିନେତାଙ୍କୁ ଶନିବାର ମୁମ୍ବାଇ ରେଲଓ୍ବେ ପୋଲିସ ଗିରଫ କରିଛି। ବାସ୍ତବରେ ବିଦ୍ୟୁତ ତାଙ୍କ ଚଳଚ୍ଚିତ୍ରରେ ବିପଜ୍ଜନକ ଷ୍ଟଣ୍ଟ ପ୍ରଦର୍ଶନ ପାଇଁ ରେଳ ପୋଲିସ ଅଭିନେତାଙ୍କୁ ଅଟକ ରଖିଛି।
ରେଲଓ୍ବେ ସୁରକ୍ଷା ବଳ (ଆରପିଏଫ) ର ବାନ୍ଦ୍ରା କାର୍ଯ୍ୟାଳୟରୁ ଏକ ଫଟୋ ସାମ୍ନାକୁ ଆସିଛି ଯେଉଁଥିରେ ବିଦ୍ୟୁତଙ୍କୁ ପୋଲିସ ଷ୍ଟେଶନରେ ଦେଖିବାକୁ ମିଳୁଛି। ସୂଚନାନୁସାରେ, ବିପଦପୂର୍ଣ୍ଣ ଷ୍ଟଣ୍ଟ ପ୍ରଦର୍ଶନ ଅଭିଯୋଗରେ ଅଭିନେତାଙ୍କୁ ଗିରଫ କରାଯାଇଥିଲା। ତେବେ ଏପର୍ଯ୍ୟନ୍ତ ଅଭିଯୋଗର କୌଣସି ସରକାରୀ ନିଶ୍ଚିତକରଣ ହୋଇନାହିଁ। ୱେବସାଇଟ ଅନୁଯାୟୀ, ଆରପିଏଫ କାର୍ଯ୍ୟାଳୟ ବାନ୍ଦ୍ରା ରେଳ ଷ୍ଟେଶନର ପ୍ଲାଟଫର୍ମ ନମ୍ବର ୧ ରେ ଅବସ୍ଥିତ।
ସୂଚନାଯୋଗ୍ୟ, ଶୁକ୍ରବାର ଦିନ ବିଦ୍ୟୁତ ଜାମୱାଲଙ୍କ ଆଗାମୀ ଚଳଚ୍ଚିତ୍ର ’କ୍ରାକ’ର ଟ୍ରେଲର ମୁକ୍ତିଲାଭ କରିଥିଲା, ଯେଉଁଥିରେ ସେ ବିପଜ୍ଜନକ ଷ୍ଟଣ୍ଟ କରୁଥିବା ଦେଖିବାକୁ ମିଳିଥିଲା। ସମ୍ପ୍ରତି ସେ ବଲିଉଡରେ ବିପଜ୍ଜନକ ଷ୍ଟଣ୍ଟ କରିବା ପାଇଁ ଜଣାଶୁଣା ହୋଇଛନ୍ତି।
