ଅଭିନେତା ଅନୁ କପୁର ଆଜି ୬୬ ବର୍ଷରେ ପଦାର୍ପଣ କରିଛନ୍ତି। ମଧ୍ୟପ୍ରଦେଶର ଭୋପାଳରେ ଜନ୍ମ ହୋଇଥିବା ଅନ୍ନୁ କପୁରଙ୍କ ପ୍ରକୃତ ନାମ ଅନିଲ କପୁର। ଆଜି ଫିଲ୍ମ ଇଣ୍ଡଷ୍ଟ୍ରିରେ ୪୦ ବର୍ଷ ପୂରଣ କରିଥିବା ଅନ୍ନୁ ୨୩ ବର୍ଷ ବୟସରେ ତାଙ୍କର ପ୍ରଥମ ଭୂମିକା ଗ୍ରହଣ କରିଥିଲେ। ସେ ଏକ ନାଟକରେ ୭୦ ବର୍ଷ ବୟସ୍କ ବ୍ୟକ୍ତିଙ୍କ ଚରିତ୍ରରେ ଅଭିନୟ କରିଥିଲେ। ତେବେ ଅନୁ ତାଙ୍କର ପ୍ରକୃତ ପରିଚୟ ଦୂରଦର୍ଶର ଶୋ’ ଅନ୍ତକ୍ଷରୀରୁ ପାଇଥିଲେ।
ଅନୁ କପୁରଙ୍କ ବାପା ଜଣେ ପଞ୍ଜାବୀ। ସେ ପଥପ୍ରାନ୍ତ ନାଟକରେ ଅଭିନୟ କରୁଥିଲେ। ତାଙ୍କ ମା’ ଜଣେ ଶାସ୍ତ୍ରୀୟ ନୃତ୍ୟଶିଳ୍ପୀ ଥିଲେ ଏବଂ ବିଦ୍ୟାଳୟରେ ଶିକ୍ଷାଦାନ କରୁଥିଲେ। କିନ୍ତୁ ଉଭୟଙ୍କ ରୋଜଗାର ସହିତ ପରିବାର ସଦସ୍ୟଙ୍କୁ ଖାଇବାକୁ ଦେବା କଷ୍ଟକର ହୋଇପଡୁଥିଲା। ସେଥିପାଇଁ ଅନୁ ଚା’ ବିକ୍ରି କରି ପେଟ ପୋଷୁ ଥିଲେ।
ଥରେ ମା’ଙ୍କ ଉପରେ ରାଗି ଘର ଛାଡି ଲକ୍ଷ୍ନୌ ପଳାଇ ଆସିଥିଲେ। ଏଠାରେ ପେଟ ପୋଷିବା ପାଇଁ ଷ୍ଟେଜ ଶୋ’ କରୁଥିଲେ। ପ୍ରତି ଶୋ’ରୁ ମାତ୍ର ପାଞ୍ଚ ଟଙ୍କା ପାଉଥିଲେ। ଆର୍ଥିକ ପ୍ରତିବନ୍ଧକ ହେତୁ ତାଙ୍କୁ ଅଧ୍ୟୟନ ମଝିରେ ଛାଡିବାକୁ ପଡିଲ। ତେବେ ପରେ ଦିଲ୍ଲୀର ନ୍ୟାସନାଲ ସ୍କୁଲ ଅଫ ଡ୍ରାମାରେ ଆଡମିଶନ ନେଇଥିଲେ। ଏଠାରେ ଏକ ନାଟକ ସମୟରେ ସେ ମହାନ ନିର୍ଦ୍ଦେଶକ ଶ୍ୟାମ ବେନେଗାଲଙ୍କୁ ଭେଟିଥିଲେ। ବେନେଗାଲଙ୍କ ଫିଲ୍ମ ମଣ୍ଡିରେ ଅଭିନୟ କରିବା ପରେ ଅନୁ ଅନେକ ଫିଲ୍ମ ପାଇଁ ଅଫର ପାଇଲେ।
ଏହାପରେ ସେ ଛୋଟ ପରଦାରେ ପାଦ ଦେଇଥିଲେ। ସେ ଟିଭି ଶୋ ‘ଅନ୍ତାକ୍ଷରୀ’ରେ ହୋଷ୍ଟ ଭାବରେ ଭାରତୀୟ ଟେଲିଭିଜନ ଇଣ୍ଡଷ୍ଟ୍ରିରେ ଡେବ୍ୟୁ କରିଥିଲେ। ଆଜି ଅନୁ କପୁର ଗୋଟିଏ ଫିଲ୍ମ ପାଇଁ ତିନିରୁ ଚାରି କୋଟି ଟଙ୍କା ଆଦାୟ କରୁଛନ୍ତି। ମୁମ୍ବାଇରେ ତାଙ୍କର ନିଜସ୍ବ ଘର ଅଛି ଏବଂ ତାଙ୍କର ଦୁଇଟି ଗାଡି ମଧ୍ୟ ଅଛି। ସେ ଏବେ ହେଉଛି ୧୦୦ କୋଟି ମୂଲ୍ୟର ସମ୍ପତ୍ତିର ମାଲିକ।