ମୁମ୍ବାଇ,୯।୮: ନିଜର ଉତ୍କୃଷ୍ଟ ଅଭିନୟ ସହିତ ଚଳଚ୍ଚିତ୍ର ଏବଂ ଛୋଟ ପରଦାରେ ଏକ ପରିଚୟ ସୃଷ୍ଟି କରିଥିବା ଅଭିନେତା ଅନୁପମ ଶ୍ୟାମ ଓଝାଙ୍କର ପରଲୋକ ଘଟିଛି। ତାଙ୍କୁ ଏକ ସପ୍ତାହ ପୂର୍ବରୁ ଗୁରୁତର ଅବସ୍ଥାରେ ମୁମ୍ବାଇର ଗୋରଗାଓଁ ଅଞ୍ଚଳର ଲାଇଫଲାଇନ ହସ୍ପିଟାଲରେ ଭର୍ତ୍ତି କରାଯାଇଥିଲା ଯେଉଁଠାରେ ରବିବାର ବିଳମ୍ବିତ ରାତିରେ ତାଙ୍କର ମୃତ୍ୟୁ ହୋଇଛି। ୬୩ ବର୍ଷୀୟ ଅନୁପମ ଶ୍ୟାମ ଦୀର୍ଘ ସମୟ ଧରି କିଡନୀ ସମସ୍ୟାରେ ପୀଡିତ ଥିଲେ। ୧୯୫୭ ସେପ୍ଟେମ୍ବର ୨୦ରେ ସେ ପ୍ରତାପଗଡ଼ରେ ଜନ୍ମ ଗ୍ରହଣ କରିଥିଲେ।
ଡାକ୍ତରଖାନାରେ ଉପସ୍ଥିତ ଜଣାଶୁଣା ଅଭିନେତା ତଥା ଅନୁପମ ଶ୍ୟାମଙ୍କ ବନ୍ଧୁ ଯଶପାଲ ଶର୍ମା ଅନୁପମ ଶ୍ୟାମଙ୍କ ମୃତ୍ୟୁ ସୂଚନା ଦେଇଛନ୍ତି। ସୂଚନାଯୋଗ୍ୟ ଯେ ଗତ ବର୍ଷ ମାର୍ଚ୍ଚ ମାସରେ ଅନୁପମ ଶ୍ୟାମ କିଡନୀ ସଂକ୍ରମଣ ହେତୁ ଏହି ଲାଇଫଲାଇନ ହସ୍ପିଟାଲରେ ଭର୍ତ୍ତି ହୋଇଥିଲେ ଏବଂ ସେଠାରେ କିଛି ଦିନ ଚିକିତ୍ସା ପରେ ସେ ଘରକୁ ଫେରିଥିଲେ। ଗତ ୯ ମାସ ଧରି ଡାୟଲିସିସରେ ଥିଲେ। ପାଖରେ ଟଙ୍କା ନଥିବାରୁ ତାଙ୍କୁ ଚିକିତ୍ସା ୬ ମାସ ପୂର୍ବରୁ ବନ୍ଦ କରିବାକୁ ପଡିଥିଲା।
୨୦୦୯ରେ ଅନୁପମ ଶ୍ୟାମ ଷ୍ଟାର ପ୍ଲସରେ ଲୋକପ୍ରିୟ ସିରିଏଲ ‘ମନ କି ଆୱାଜ ପ୍ରତିଜ୍ଞା’ରେ ଠାକୁର ସାଜନ ସିଂଙ୍କ ଭୂମିକାରେ ଅଭିନୟ କରି ବହୁ ଲୋକପ୍ରିୟତା ହାସଲ କରିଥିଲେ। ସମ୍ପ୍ରତି ଏହି ସିରିଏଲର ଦ୍ୱିତୀୟ ସିଜିନର ପ୍ରସାରଣ ମଧ୍ୟ ଆରମ୍ଭ ହୋଇଥିଲା ଯେଉଁଥିରେ ଅନୁପମ ଶ୍ୟାମ ଠାକୁର ପୁଣି ଥରେ ସଜନ ସିଂ ଭୂମିକାରେ ଅଭିନୟ କରିଥିଲେ। ଶେଖର କପୁରଙ୍କ ଫୁଲନ ଦେବୀଙ୍କ ଉପରେ ୧୯୯୪ରେ ନିର୍ମିତ ହୋଇଥିବା ବାଣ୍ଡିଟ୍ କୁଇନ୍, ସ୍ଲମଡଗ ମିଲେନେୟାର, ହଜାରୋଁ ଖ୍ବାଇସିଆଁ ଏସି, ପରଜାନିଆ, ଲଜ୍ୱା, ନାୟକ, ଦୁବାଇ ରିର୍ଟନ୍ସ, ଶକ୍ତି: ଦି ପାଓ୍ବାର ଆଦି ଫିଲ୍ମରେ ଅଭିନୟ କରିଥିଲେ। ତାଙ୍କ ବିୟୋଗରେ ବଲିଉଡ୍ରେ ଶୋକର ଛାୟା ଖେଳି ଯାଇଛି।
