ବମ୍ବେ: କରୋନା ଦ୍ୱିତୀୟ ଲହର ସହ ଲଢ଼ୁଛି ଭାରତ। ଏହାକୁ ନେଇ ବିଭିନ୍ନ ରାଜ୍ୟରୁ ହୃଦୟ ବିଦାରକ ଘଟଣା ସାମ୍ନାକୁ ଆସୁଛି। ଦୈନିକ ସଂକ୍ରମଣ ବୃଦ୍ଧି ପାଉଥିବା ବେଳେ ଡାକ୍ତରଖାନାରେ ରୋଗୀଙ୍କୁ ସ୍ଥାନ ମିଳୁନାହିଁ। କିଏ ଅକ୍ସିଜେନ ପାଇଁ ତ କିଏ ସଠିକ୍ ସମୟରେ ଚିକିତ୍ସା ନ କରିପାରି ପ୍ରାଣ ହରାଉଛନ୍ତି। ଏପରିସ୍ଥିତିରେ ଆଗଧାଡ଼ିକୁ ଆସି ଲୋକଙ୍କ ସେବାରେ ମନୋନିବେଶ କରିଛନ୍ତି କିଛି କଳାକାର। ଖାଲି ପରଦାରେ ନୁହେଁ ବାସ୍ତବ ଜୀବନରେ ମଧ୍ୟ ଜଣେ ଜଣେ ହିରୋର ଭୂମିକା ସେମାନେ ତୁଲାଉଛନ୍ତି। କନ୍ନଡ ଫିଲ୍ମର ସୁପରଷ୍ଟାର ଅର୍ଜୁନ ଗୌଡ଼ା ଲୋକଙ୍କ ସହାୟତା ପାଇଁ ଆଗକୁ ଆସିଛନ୍ତି। ସେ ଏବେ ଆମ୍ବୁଲାନ୍ସ ଡ୍ରାଇଭର ହୋଇଯାଇଛନ୍ତି। ରୋଗୀମାନଙ୍କୁ ଡାକ୍ତରଖାନାରେ ପହଞ୍ଚାଉଛନ୍ତି ଅର୍ଜୁନ। ଏଥିସହ ସେ ଏକ ପ୍ରୋଜେକ୍ଟ ଆରମ୍ଭ କରିଛନ୍ତି, ଯାହାର ନାମ ରହିଛି ସ୍ମାଇଲ୍ ଟ୍ରଷ୍ଟ।
ଲୋକମାନଙ୍କ ସହାୟତା ପାଇଁ ଗତ କିଛି ଦିନରୁ ଅର୍ଜୁନ ଘରକୁ ଯାଇନାହାନ୍ତି। ଏବେ ଯାଏ ସେ ୬ଜଣ ଲୋକଙ୍କ ଶେଷକୃତ୍ୟ ମଧ୍ୟ କରିସାରିଛନ୍ତି। ଏଭଳି ଭୟଙ୍କର ସମୟରେ ଆମ ସମସ୍ତଙ୍କୁ ଅନ୍ୟମାନଙ୍କ ସହାୟତା କରିବା ଆବଶ୍ୟକତା ରହିଛି। ଅନ୍ୟଜଣଙ୍କ କିଏ ଏବଂ କେଉଁଠାରୁ ଆସିଛି ତାହା ନ ଭାବି କେବଳ ସାହାଯ୍ୟ କରିବା ଉଚିତ। ଏଥିପାଇଁ ସେ ସହରର କେଉଁଠିକୁ ମଧ୍ୟ ଯିବା ପାଇଁ ପ୍ରସ୍ତୁତ ବୋଲି ଅଭିନେତା କୁହନ୍ତି।
ତେବେ ବଲିଉଡ୍ ଅଭିନେତା ସୋନୁ ସୁଦଙ୍କ ସହ ଭୂମି ପେଡନେକର, ରବିନା ଟଣ୍ଡନ, ଗୁରମିତ ଚୌଧୁରୀ, ବିନିତ ସିଂହ, ପଙ୍କଜ ତ୍ରିପାଠୀ ପ୍ରମୁଖ ଲୋକଙ୍କ ସହାୟତାରେ ଲାଗିଛନ୍ତି। ସୋସିଆଲ ମିଡିଆ ମାଧ୍ୟମରେ ସେମାନେ ଲୋକଙ୍କ ଆବଶ୍ୟକତା ପୂରଣ କରିବାକୁ ଚେଷ୍ଟା କରୁଛନ୍ତି।
