ଚଣ୍ଡିଗଡ଼, ୭।୭- ଲକ୍ ଡାଉନ ଉଠିବା ପରେ ବଲିଉଡ୍ ଅଭିନେତା ଆୟୁଷ୍ମାନ ଖୁରାନା ଗତ ସପ୍ତାହରେ ମୁମ୍ବାଇରୁ ଆସି ନିଜ ଘରୋଇ ସହର ଚଣ୍ଡିଗଡ଼ରେ ପରିବାର ସହ ରହୁଛନ୍ତି। ଆୟୁଷ୍ମାନଙ୍କ ସହ ତାଙ୍କ ସ୍ତ୍ରୀ ତାହିରା କାଶ୍ୟପ୍ ମଧ୍ୟ ଚଣ୍ଡିଗଡ଼ ଆସିଛନ୍ତି। ତେବେ ଆୟୁଷ୍ମାନ ସ୍ଥାନୀୟ ପଞ୍ଚକୁଲା ସହରରେ ୯ କୋଟି ମୂଲ୍ୟର ଏକ ଘର କିଣିଥିବା ରିପୋର୍ଟ ପ୍ରକାଶ ପାଇଛି। ଏହି ଘରର ରେଜିଷ୍ଟ୍ରେଶନ ପାଇଁ ମଙ୍ଗଳବାର ଆୟୁଷ୍ମାନ ସ୍ତ୍ରୀ ତାହିରାଙ୍କ ସହ ପଞ୍ଚକୁଲା ତହସିଲ ଅଫିସରେ ପହଞ୍ଚତ୍ଥିଲେ। ରେଜିଷ୍ଟ୍ରେଶନ ସମୟରେ ସେ ୨ କୋଟି ୨୧ ଲକ୍ଷ ୨୫ ହଜାର ଟଙ୍କା ଦେଇଥିବା ଜଣାପଡ଼ିଛି। ଏଥିପୂର୍ବରୁ ଆୟୁଷ୍ମାନ ଅଗ୍ରୀମ ଆକାରରେ ୬ କୋଟି ୭୨ ଲକ୍ଷ ଏବଂ ଟିଡିଏସ୍ ବାବଦକୁ ୬.୫୭ ଲକ୍ଷ ଟଙ୍କା ପ୍ରଦାନ କରିଥିଲେ। ସେକ୍ଟର-୬ ଠାରେ ରହୁଥିବା ବିଜନେସମ୍ୟାନ ସୁବାଷ ବିନ୍ଦ୍ରା ଓ ବୀଣା ବିନ୍ଦ୍ରାଙ୍କ ନିକଟରୁ ସେ ଏହି ମୂଲ୍ୟବାନ ଘର କିଣିଥିବା ଜଣାପଡ଼ିଛି। ଆୟୁଷ୍ମାନ ଯେଉଁଠାରେ ଘର କିଣିଛନ୍ତି ତାହା ପଞ୍ଚକୁଲାର ଏକ ଭିଆଇପି ସେକ୍ଟର। ସେଠାରେ ଅନେକ ବଡ଼ ବଡ଼ ବ୍ୟବସାୟୀ, ଆଇଏଏସ୍ ଓ ଆଇପିଏସ୍ ଅଧିକାରୀ ରୁହନ୍ତି। ଆୟୁଷ୍ମାନ ରେଜିଷ୍ଟ୍ରେଶନ କରିବା ସମୟରେ ତହସିଲ କାର୍ଯ୍ୟାଳୟ ବାହାରେ ତାଙ୍କୁ ଦେଖିବାକୁ ବହୁଲୋକଙ୍କ ସମାଗମ ହୋଇଥିଲା।
