ଅଭିନେତା ବବି ମିଶ୍ର ଖୁବ୍ଶୀଘ୍ର ନୂଆ ରୂପରେ ଦେଖାଦେବେ। ଅବଶ୍ୟ ‘ଜୟଶ୍ରୀରାମ’ ଚଳଚ୍ଚିତ୍ରର ନାୟକ ସାଜିବା ପରେ ସେ ଅନେକ ସିନେମାରେ ଖଳନାୟକ, ଚରିତ୍ର ଅଭିନେତା, କମେଡି ଆଦି ରୋଲ୍ରେ ନିଜ ଦକ୍ଷତା ଦେଖାଇସାରିଛନ୍ତି। ହେଲେ ଏହାପୂର୍ବରୁ ସେ ଓଡ଼ିଆ ଆଲବମ୍ ଜଗତରେ ସେ କେତେ ସୁନାମ ଅର୍ଜନ କରିଛନ୍ତି ତାହା କହିବା ବାହୁଲ୍ୟ। ଏବେ ସେ ଚଳଚ୍ଚିତ୍ର ପ୍ରଯୋଜନା କ୍ଷେତ୍ରରେ ପାଦ ଦେଇଛନ୍ତି। ତାଙ୍କ ପ୍ରଯୋଜିତ ତଥା ନିରଞ୍ଜନ ବେହେରାଙ୍କ ନିର୍ଦ୍ଦେଶିତ ‘ଫ୍ଲପ୍ ସିନେମା’ର ପୋଷ୍ଟ ପ୍ରଡକ୍ସନ କାମ ଚାଲୁ ରହିଛି। ବର୍ତ୍ତମାନ ସେ ସିରିଜ ସିନେମାର ନିର୍ମାଣ କରିବାକୁ ଯାଉଛନ୍ତି। ଏ ସମ୍ପର୍କରେ ବବି କହନ୍ତି, ‘ମୋର ହୋମ ବ୍ୟାନର ‘ବବି ମିଶ୍ର ଏଣ୍ଟରଟେନମେଣ୍ଟ’ରେ ଏକାଥରେ ଛଅଟି ସିନେମା ନିର୍ମାଣ କରିବାକୁ ଯୋଜନା କରିଛି। ଖୁବ୍ଶୀଘ୍ର ଏକାଥରେ ଦୁଇଟି ସିନେମାର ଶୁଟିଂ ଆରମ୍ଭ ହେବ। ଗୋଟିଏ ସିନେମା ‘ଭିଲିଆନ୍’ର ନିର୍ଦ୍ଦେଶନା ଦେବେ ନିରଞ୍ଜନ ବେହେରା ଏବଂ ଅନ୍ୟ ଅନଟାଇଟଲଡ ଫିଲ୍ମର ଏହି ଦାୟିତ୍ୱ ତୁଲାଇବେ ଆଗଧାଡିର ନିର୍ଦ୍ଦେଶକ ଅଶୋକ ପତି। ଅନ୍ୟପକ୍ଷରେ ଅବଶିଷ୍ଟ ସିନେମା ବିଷୟରେ ସବିଶେଷ ତଥ୍ୟ ମୁଁ ଖୁବ୍ଶୀଘ୍ର ଘୋଷଣା କରିବି।’ ତାଙ୍କ ଦ୍ୱାରା ପ୍ରଯୋଜିତ ‘ଫ୍ଲପ ସିନେମା’ ଏବଂ ପ୍ରାରମ୍ଭିକ କାମ ଚାଲିଥିବା ‘ଭିଲିଆନ୍’ର ସଙ୍ଗୀତ ଦାୟିତ୍ୱ ତୁଲାଇଛନ୍ତି ଅଭିଜିତ ମଜୁମଦାର। ତେବେ ଜଣେ ଅଭିନେତା ଭାବରେ ସିନେପ୍ରେମୀଙ୍କ ହୃଦୟରେ ସ୍ବତନ୍ତ୍ର ସ୍ଥାନ ଅଧିକାର କରିଥିବା ବବି ପ୍ରଯୋଜକ ଭାବରେ ସଫଳତା ହାସଲ କରିବାକୁ ଆଶା ରଖିଛନ୍ତି।
