ମୁମ୍ବାଇ,୨୫।୧୨: ଚଳଚ୍ଚିତ୍ର ସମାଲୋଚକ ତଥା ଅଭିନେତା କମାଲ ରସିଦ ଖାନଙ୍କୁ ବିମାନବନ୍ଦରରୁ ମୁମ୍ବାଇ ପୋଲିସ ଗିରଫ କରିଛି। କେଆରକେ ନିଜେ ସୋସିଆଲ ମିଡିଆ ଏକ୍ସ ମାଧ୍ୟମରେ ଏହି ସୂଚନା ଦେଇଛନ୍ତି । କେଆରକେ କହିଛନ୍ତି, ସେ ନୂଆବର୍ଷ ପାଳନ କରିବାକୁ ଦୁବାଇ ଯାଉଥିଲେ ଏବଂ ଏହି ସମୟରେ ପୋଲିସ ତାଙ୍କୁ ଗିରଫ କରିଛି। ଏହି ଗିରଫ ପାଇଁ ଅଭିନେତା ସଲମାନ ଖାନଙ୍କ ହାତ ଥିବା କହିଛନ୍ତି।
କେଆରକେ ପୋଷ୍ଟ କରି ଲେଖିଛନ୍ତି , ମୁଁ ଗତ ଏକ ବର୍ଷ ହେଲା ମୁମ୍ବାଇରେ ଅଛି ଏବଂ ମୋର ସମସ୍ତ କୋର୍ଟ ତାରିଖ ପାଇଁ ମୁଁ ନିୟମିତ କୋର୍ଟକୁ ଯାଉଛି। ଆଜି ମୁଁ ନୂଆ ବର୍ଷ ପାଇଁ ଦୁବାଇ ଯାଉଥିଲି କିନ୍ତୁ ମୁମ୍ବାଇ ପୋଲିସ ମୋତେ ବିମାନବନ୍ଦରରେ ଗିରଫ କରିଛି। ପୋଲିସର ସୂଚନାନୁସାରେ, ମୁଁ ୨୦୧୬ର ଏକ ମାମଲାରେ ଜଡିତ ଅଛି। ସଲମାନ ଖାନ କହୁଛନ୍ତି ଯେ ତାଙ୍କ ଫିଲ୍ମ ଟାଇଗର ୩ ମୋ କାରଣରୁ ଫ୍ଲପ୍ ହୋଇଛି।
କେଆରକେ ଦେଶର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ବିଭିନ୍ନ ଗଣମାଧ୍ୟମ ସଂଗଠନକୁ ମଧ୍ୟ ଏହି ପୋଷ୍ଟରେ ଟ୍ୟାଗ କରିଛନ୍ତି। ଅଭିନେତା ଏହି ପୋଷ୍ଟରେ ଆହୁରି ଲେଖିଛନ୍ତି , ଯଦି କୌଣସି ପରିସ୍ଥିତିରେ ମୁଁ ପୋଲିସ ଷ୍ଟେସନ କିମ୍ବା ଜେଲରେ ମରିଯାଏ, ତେବେ ଆପଣ ସମସ୍ତେ ଜାଣିବା ଉଚିତ୍ ଯେ ଏହା ଏକ ହତ୍ୟା ଏବଂ ଆପଣ ସମସ୍ତେ ଜାଣନ୍ତି କିଏ ଦାୟୀ!
ଆପଣଙ୍କୁ କହିରଖୁଛୁ ଯେ, କେଆରକେ ୨୦୦୮ରେ ଫିଲ୍ମ ‘ଦେଶଦ୍ରୋହୀ’ ସହିତ ବଲିଉଡରେ ଡେବ୍ୟୁ କରିଥିଲେ। ତେବେ ଏହା ପରେ ତାଙ୍କୁ କୌଣସିି ଫିଲ୍ମରେ ହିରୋ ଭାବରେ ଦେଖିବାକୁ ମିଳି ନ ଥିଲା।