ବମ୍ବେ: ବଲିଉଡ୍ ଅଭିନେତା ଇମ୍ରାନ ହାସମୀ ପ୍ରଶଂସକଙ୍କ ଗହଣରେ ‘ସିରିୟଲ କିସର’ ଭାବେ ପରିଚିତ। କାରଣ ତାଙ୍କ ଫିଲ୍ମରେ ପ୍ରେମ ସହ ଭରପୂର ରୋମାନ୍ସ ଦେଖିବାକୁ ମିଳେ। ରୋମାଣ୍ଟିକ ହିରୋ ଭାବେ ସେ ଅନେକ ଫିଲ୍ମରେ କାମ କରିଛନ୍ତି। ଫିଲ୍ମଗୁଡ଼ିକ ସୁପରହିଟ୍ ମଧ୍ୟ ହୋଇଛି। ହେଲେ ସେସବୁରେ ଗୋଟିଏ ସମାନତା ଦେଖିବାକୁ ମିଳେ। ସେଇଟି ହେଲା ମୃତ୍ୟୁ। ଇମରାନ ଅଭିନୟ କରିଥିବା ଅଧିକାଂଶ ଫିଲ୍ମର ଶେଷଭାଗରେ ତାଙ୍କ ଚରିତ୍ରର ମୃତ୍ୟୁ ହୋଇଯାଇଥାଏ। ଫଳରେ ଶେଷ ବେଳକୁ ପ୍ରଶଂସକଙ୍କ ଆଖି ଓଦା ହୋଇଥାଏ।
୨୦୦୩ରେ ଫିଲ୍ମ ‘ଫୁଟପାଥ’ ଜରିଆରେ ବଲିଉଡ୍ରେ ଡେବ୍ୟୁ କରିଥିଲେ ଇମ୍ରାନ। ଏଥିରେ ସହ କଳାକାର ଭାବେ ତାଙ୍କୁ ଦେଖିବାକୁ ମିଳିଥିଲା। ପରବର୍ତ୍ତୀ ସମୟରେ ‘ମର୍ଡର, ତୁମ୍ସା ନେହିଁ ଦେଖା, ଜନ୍ନତ, ମର୍ଡର ୨, ଆଶିକ ବନାୟା ଆପନେ, ଜହର, ଓ୍ବାନ୍ସ ଅପନ୍ ଏ ଟାଇମ୍ ଇନ୍ ମୁମ୍ବାଇ, ମିଷ୍ଟର ଏକ୍ସ, ଅଜହର, ହମାରୀ ଅଧୁରୀ କାହାନୀ, ଡାର୍ଟି ପିକ୍ଚର, ଦିଲ୍ ତୋ ବଚ୍ଚା ହୈ ଜି, ଦ ବଡି ଏବଂ ଚେହେରେ’ ଭଳି ଫିଲ୍ମରେ କାମ କରିଛନ୍ତି। ଏଥିରୁ ଅଧିକାଂଶ ଫିଲ୍ମର କାହାଣୀ, ନିର୍ମାତା, ନିର୍ଦ୍ଦେଶକ, ଲେଖକ ଭିନ୍ନ ଥିବା ସତ୍ତ୍ୱେ ତାଙ୍କ ଚରିତ୍ରର ମୃତ୍ୟୁ ହୋଇଥାଏ। ଏପରିକି ତାଙ୍କ ପ୍ରେମ କାହାଣୀ ଅଧା ରହି ଯାଇଥାଏ।