ଭୁବନେଶ୍ୱର,୭।୨(ବ୍ୟୁରୋ): ଦିଲ୍ଲୀ ଗଲେ ଓଲିଉଡ୍ ଅଭିନେତା ପିଣ୍ଟୁ ନନ୍ଦ। ଗୁରୁତର ଲିଭର ସିରୋସିସ୍ ଜନିତ ରୋଗରେ ପୀଡ଼ିତ ଥିବା ପିଣ୍ଟୁଙ୍କୁ ଅଧିକ ଚିକିତ୍ସା ଲାଗି ଦିଲ୍ଲୀ ନିଆଯାଇଛି। ମଙ୍ଗଳବାର ସକାଳେ ସେ ଭୁବନେଶ୍ୱର ବିମାନବନ୍ଦରରେ ପହଞ୍ଚି ଦିଲ୍ଲୀ ଯାଇଛନ୍ତି। ସେଠାରେ ଇନ୍ଷ୍ଟିଚ୍ୟୁଟ୍ ଅଫ୍ ଲିଭର୍ ଆଣ୍ଡ ବିଲିଆରି ସାଇନସେସ(ଆଇଏଲ୍ବିଏସ୍) ହସ୍ପିଟାଲରେ ତାଙ୍କୁ ଭର୍ତ୍ତି କରାଯାଇ ଲିଭର ଟ୍ରାନ୍ସପ୍ଲାଣ୍ଟ ସହ ଅନ୍ୟାନ୍ୟ ଚିକିତ୍ସା କରାଯିବ। ଏ ନେଇ ଆଇଏଲ୍ବିିଏସ୍ ଡାକ୍ତର ଅଶୋକ ଚୌଧୁରୀଙ୍କ ସହିତ କଥାବାର୍ତ୍ତା କରାଯାଇ ଆବଶ୍ୟକ ପ୍ରସ୍ତୁତି ହୋଇଥିବା ସୂଚନା ମିଳିଛି।
ଲିଭର ସିରୋସିସ୍ରୁ ଆରୋଗ୍ୟ ପାଇଁ ଲିଭର ଟ୍ରାନ୍ସପ୍ଲାଣ୍ଟ କରିବାକୁ ପଡ଼ିବ। ଏହା ପୂର୍ବରୁ ଅନ୍ୟ ଗୁରୁତ୍ୱପୂର୍ଣ୍ଣ ଅଙ୍ଗପ୍ରତ୍ୟଙ୍ଗ ମଧ୍ୟ ଷ୍ଟେବୁଲ ରହିବା ଦରକାର। ସେ ପର୍ଯ୍ୟନ୍ତ ଅପେକ୍ଷା କରିବାକୁ ପଡ଼ିବ ବୋଲି କୁହାଯାଇଛି। ଦିଲ୍ଲୀ ଯିବା ପୂର୍ବରୁ ଭୁବନେଶ୍ୱରର ଏକ ଘରୋଇ ହସ୍ପିଟାଲରେ ଚିକିତ୍ସିତ ହେଉଥିଲେ ପିଣ୍ଟୁ। ଦିଲ୍ଲୀ ପହଞ୍ଚିବା ପରେ ତୁରନ୍ତ ସେଠାରେ ତାଙ୍କର ଅଧିକ ଚିକିତ୍ସା ଚାଲିବ। କେବଳ ଲିଭର୍ ଟ୍ରାନ୍ସପ୍ଲାଣ୍ଟ ପାଇଁ ୫୦ ଲକ୍ଷ ଟଙ୍କା ଆବଶ୍ୟକ ଥିବାବେଳେ ଏହା ପରବର୍ତ୍ତୀ ଚିକିତ୍ସା ପାଇଁ ମଧ୍ୟ ଅର୍ଥର ଆବଶ୍ୟକତା ରହିଛି। ଶୁଭେଚ୍ଛୁମାନେ ତାଙ୍କ ଆଶୁ ଆରୋଗ୍ୟ କାମନା କରିଥିବାବେଳେ ବ୍ୟୟବହୁଳ ଚିକିତ୍ସା ପାଇଁ ସାରା ରାଜ୍ୟରୁ ସହାୟତାର ହାତ ଲମ୍ବିଛି। ଏମ୍ପି ଅଚ୍ୟୁତ ସାମନ୍ତ ୨ଲକ୍ଷ ଟଙ୍କା ସହାୟତା ରାଶି ପ୍ରଦାନ କରିଛନ୍ତି। ସେହିଭଳି ଯୁବ ସମାଜସେବୀ ଦୀପକ କୁମାର ମହାପାତ୍ର ଓ ସହଯୋଗୀମାନେ ୟୁନିଟ-୨ ମାର୍କେଟ ବିଲ୍ଡିଂ, ମାଷ୍ଟର କ୍ୟାଣ୍ଟିନ, ଖାରବେଳନଗର ଓ ୟୁନିଟ-୯ ଅଞ୍ଚଳରେ ବୁଲିବୁଲି ବ୍ୟବସାୟୀଙ୍କ ସାହାଯ୍ୟ ଲୋଡିବା ସହ ପାଣ୍ଠି ସଂଗ୍ରହ କରିଛନ୍ତି। ଏଥିସହ ଓଡିଶା ସିନେ କ୍ରିଟିକ ଆସୋସିଏଶନ ତରଫରୁ ଅଭିନେତା ଶ୍ରୀତମ ଦାସ, ସିଦ୍ଧାନ୍ତ ମହାପାତ୍ରଙ୍କ ଭଳି ବହୁ କଳାକାର ଓ ବ୍ୟବସାୟୀ ଅମିୟକାନ୍ତ ଦାଶ ସହଯୋଗର ହାତ ବଢ଼ାଇଛନ୍ତି ।