ମୁମ୍ବାଇ: ବଲିଉଡ ଅଭିନେତା ରଣଦୀପ ହୁଡା ବିବାହ କରିବାକୁ ଯାଉଛନ୍ତି। ଦୀର୍ଘ ସମୟର ବାନ୍ଧବୀ ଲିନ୍ ଲୈଶ୍ରାମଙ୍କ ସହ ଖୁବଶୀଘ୍ର ବିବାହ କରିବେ ବୋଲି ଆଲୋଚନା ଜୋର ଧରିଛି। ମିଡିଆ ରିପୋର୍ଟ ଅନୁଯାୟୀ ଚଳିତ ମାସ ଶେଷରେ ରଣଦୀପ ବିବାହ କରିବେ। ତେବେ ରଣଦୀପଙ୍କ ବିବାହ ତାରିଖ ଏପର୍ଯ୍ୟନ୍ତ ଜଣାପଡିନାହିଁ।
ଇଟାଇମ୍ସ ରିପୋର୍ଟ ଅନୁଯାୟୀ, ରଣଦୀପ ହୁଡା ଏବଂ ଲିନଙ୍କ ବିବାହରେ କେବଳ ତାଙ୍କ ପରିବାର ଏବଂ କିଛି ଘନିଷ୍ଠ ବନ୍ଧୁ ଯୋଗଦେବେ। ସୂତ୍ରରୁ ମିଳିଥିବା ସୂଚନା ଅନୁଯାୟୀ, ରଣଦୀପ ତାଙ୍କ ବିବାହ ଗଣମାଧ୍ୟମର ଦୃଷ୍ଟି ଆକର୍ଷଣ କରିବାକୁ ଚାହୁଁନାହାଁନ୍ତି। ବିବାହ ପରେ ହିଁ ସେ ଏହାର ଅଫିସିଆଲ୍ ଘୋଷଣା କରିବେ ବୋଲି ଅଭିନେତା କହିଛନ୍ତି।
କିଛି ଦିନ ପୂର୍ବରୁ ରଣଦୀପ ତାଙ୍କ ପ୍ରେମିକାଙ୍କ ସହ ଇନଷ୍ଟାଗ୍ରାମରେ ଏକ ଫଟୋ ସେୟାର କରି ତାଙ୍କ ସମ୍ପର୍କକୁ ନିଶ୍ଚିତ କରିଥିଲେ। ସେ ଲିନଙ୍କ ଜନ୍ମଦିନରେ ଏକ ପ୍ରେମ ଭରା ପୋଷ୍ଟ ସେୟାର କରି ଉଭୟଙ୍କ ମଧ୍ୟରେ ଥିବା ସମ୍ପର୍କକୁ ନିଶ୍ଚିତ କରିଥିଲେ। ରଣଦୀପଙ୍କ ଗର୍ଲଫ୍ରେଣ୍ଡ ମଣିପୁରର ଅଟନ୍ତି। ଲିନ ମଡେଲିଂ ସହିତ ଅଭିନୟ ମଧ୍ୟ କରନ୍ତି। ତେବେ ରଣଦୀପଙ୍କଠାରୁ ସେ ପ୍ରାୟ ୧୦ ବର୍ଷ ସାନ ହେବେ।