ବମ୍ବେ: ବଲିଉଡ ଅଭିନେତା ସଞ୍ଜୟ ଦତ୍ତଙ୍କ ଆଜି ହାପି ବାଲା ବର୍ଥ ଡେ। ଫିଲ୍ମ ରକିରୁ ସଞ୍ଜୁବାବା ନିଜର କ୍ୟାରିୟର ଆରମ୍ଭ କରି ସଫଳତାର ଶୀର୍ଷରେ ପହଞ୍ଚିଛନ୍ତି। ସେ ବଲିଉଡ୍ ଫିଲ୍ମ ଜଗତରେ ଚାରି ଦଶକରୁ ଅଧିକ ସମୟ ଧରି ରାଜ୍ କରି ଆସୁଛନ୍ତି। ବ୍ୟକ୍ତିଗତ ଜୀବନରେ ନାନାଦି ଝଡ଼ଝଞ୍ଜା ସତ୍ତ୍ୱେ ସଞ୍ଜୁବାବା ହାର ମାନି ନାହାନ୍ତି। ଜୁଲାଇ ୨୯ରେ ସେ ୬୧ ବର୍ଷରେ ପଦାର୍ପଣ କରିଛନ୍ତି।
ପିତା ସୁନିଲ ଦତ୍ତଙ୍କ ନିର୍ଦ୍ଦେଶନାରେ ନିର୍ମିତ ଫିଲ୍ମ ରକିରୁ ଫିଲ୍ମ ଦୁନିଆରେ ପାଦ ରଖିଥିଲେ। ଫିଲ୍ମଟି ବକ୍ସ ଅଫିସରେ ହିଟ୍ ହେବା ପରେ ଯୁବବର୍ଗଙ୍କ ମଧ୍ୟରେ ତାଙ୍କ ଷ୍ଟାଇଲ୍ ବେଶ ଲୋକପ୍ରିୟ ହୋଇଥିଲା। ଏହାପରେ ମହେଶ ଭଟ୍ଟଙ୍କ ଫିଲ୍ମ ‘ନାମ’ରେ ସେ ନଜର ଆସିଥିଲେ। ଏହାଛଡ଼ା ମାଧୁରୀଙ୍କ ସହ ‘ସାଜନ୍’-‘ଖଳନାୟକ’, ପୁଜା ଭଟ୍ଟଙ୍କ ସହ ସଡକ୍, ବାସ୍ତବ, ମିଶନ କାଶ୍ମୀର, ମୁନ୍ନା ଭାଇ ଏମ୍ବିବିଏସ୍, ଧମାଲ, ଅଗ୍ନିପଥ ଆଦି ସଫଳ ଫିଲ୍ମ ସେ ନିଜ ନାମରେ କରିଥିଲେ। ଫିଲ୍ମରେ ଖଳନାୟକ ଭୂମିକାରେ ସଞ୍ଜୁବାବା ଅଧିକ ପ୍ରଶଂସିତ ହୋଇଥିଲେ। ଅଗ୍ନିପଥ ଏବଂ ବାସ୍ତବରେ ତାଙ୍କର ଅଭିନୟ ଏବେ ବି ଜୀବିତ ଲାଗେ। ଅଭିନେତାଙ୍କ ଜନ୍ମଦିନ ଉପଲକ୍ଷେ ଚାରିଆଡୁ ଶୁଭେଚ୍ଛାର ସୁଅ ଛୁଟୁଛି।