ଚେନ୍ନାଇ,୨୮ା୧୨- ତାମିଲନାଡୁରେ ଏବେ ଦିନକୁ ହଜାରେରୁ ଅଧିକ ନୂଆ କରୋନା ଆକ୍ରାନ୍ତ ଚିହ୍ନଟ ହେଉଛନ୍ତି। ଆଉ ରାଜ୍ୟରେ ଏପର୍ଯ୍ୟନ୍ତ ୧୨,୦୬୯ କରୋନା ସଂକ୍ରମିତଙ୍କ ମୃତ୍ୟୁ ଘଟିଛି, ଯାହାକି ପୂରା ଦେଶରେ ଦ୍ୱିତୀୟ ସର୍ବାଧିକ। ହେଲେ କଲିଉଡ୍ ଆକ୍ଟର ବିଜୟ ସିନେମା ହଲରେ ୧୦୦ ପ୍ରତିଶତ ଦର୍ଶକ ଚାହୁଁଛନ୍ତି। ଏ ନେଇ ରବିବାର ରାତିରେ ମୁଖ୍ୟମନ୍ତ୍ରୀ ଇ. କେ. ପଲାନିସ୍ବାମୀଙ୍କୁ ଭେଟିଛନ୍ତି। ତାଙ୍କ ପରବର୍ତ୍ତୀ ଫିଲ୍ମ ‘ମାଷ୍ଟର’ର ରିଲିଜ ସମ୍ପର୍କରେ ମୁଖ୍ୟମନ୍ତ୍ରୀଙ୍କ ସହ ଆଲୋଚନା କରିଥିବା କୁହାଯାଉଛି। ଫିଲ୍ମରେ ବିଜୟ, ବିଜୟ ସେଥୁପଥି, ଆଣ୍ଡ୍ରେଆ ଜେରେମି, ମାଳବିକା ମୋହାନା ଓ ଅର୍ଜୁନ ଦାସଙ୍କୁ ପ୍ରମୁଖ ଭୂମିକାରେ ଦେଖିବାକୁ ମିଳିବ। ପାଣ୍ଡେମିକ୍ ପରେ ତାମିଲର ଏହା ସବୁଠୁ ବଡ଼ ରିଲିଜ ହେବ।
ରିପୋର୍ଟ ଅନୁଯାୟୀ, ଥିଏଟରରେ ୧୦୦ ପ୍ରତିଶତ ଦର୍ଶକଙ୍କୁ ଫିଲ୍ମ ଦେଖିବାର ଅନୁମତି ପାଇଁ ଅନୁରୋଧ କରିଛନ୍ତି ବିଜୟ। ବର୍ତ୍ତମାନ କୋଭିଡ୍-୧୯ କାରଣରୁ ସିନେମା ହଲ୍ରେ ୫୦ ପ୍ରତିଶତ ଦର୍ଶକଙ୍କ ପାଇଁ ଦିଆଯାଇଛି ଅନୁମତି। ଏହାକୁ ବଢ଼ାଇବା ଲାଗି ମୁଖ୍ୟମନ୍ତ୍ରୀ ପଲାନିସ୍ବାମୀଙ୍କୁ ଅନୁରୋଧ କରିଛନ୍ତି ଫିଲ୍ମର ଅନ୍ୟ କଳାକାରମାନେ । ବିଜୟଙ୍କ ଫିଲ୍ମ ଭଳି ସୁରୟାଙ୍କ ଫିଲ୍ମ ସୁରାରାଇ ପୋଟରୁ ମଧ୍ୟ ଲକ୍ଡାଉନ କାରଣରୁ ରିଲିଜ ହୋଇପାରି ନ ଥିଲା। ସୁରୟା ଫିଲ୍ମ ରିଲିଜ ପାଇଁ ଓଟିଟି ପ୍ଲାଟଫର୍ମର ସହାୟତା ନେଇଥିବାବେଳେ ବିଜୟ ହଲରେ ହିଁ ରିଲିଜ କରିବାକୁ ଅଡ଼ି ବସିଛନ୍ତି। ଆଶା କରାଯାଉଛି, ମାଷ୍ଟର ଜାନୁୟାରୀ ୧୩ ତାରିଖରେ ପୋଙ୍ଗଲ ଅବସରରେ ରିଲିଜ ହେବ।